مەملەكەت باسشىسى «ۇلت جوسپارى – ءجۇز ناقتى قادام» باعدارلاماسىندا ەت ءوندىرىسى مەن وڭدەۋدى دامىتۋ ءۇشىن ستراتەگيالىق ينۆەستورلاردى تارتۋ ماسەلەسىنە ايىرىقشا توقتالعان بولاتىن. بۇل 61-قادامدا جان-جاقتى ايتىلدى. ەكونوميكانىڭ شيكىزاتتىق ەمەس سەكتورىندا ورتا بيزنەستىڭ ناقتى كوشباسشى كومپانيالارىن قالىپتاستىرۋ ءۇشىن وسىنداي مەملەكەتتىك قولداۋدىڭ ماڭىزى ەرەكشە.
«ۇلت جوسپارى – ءجۇز ناقتى قادام» باعدارلاماسى اياسىندا سوڭعى ۋاقىتتا كوپتەگەن ءىس-شارالار اتقارىلا باستادى. سونىڭ ءبىرى – استانانىڭ ازىق-تۇلىك بەلدەۋى اۋماعىندا قۇرىلىسى باستالعان ەت وڭدەۋ زاۋىتى, قۇس وسىرەتىن كەشەندەر قۇرىلىسى. ورايى كەلگەندە ايتا كەتۋ كەرەك, ەت جانە ەت ونىمدەرىن وڭدەۋ جوباسى بويىنشا ءۇش كاسىپورىننىڭ قۇرىلىسى باستالعان. بۇلاردىڭ ءبارى دە استانانىڭ ازىق-تۇلىك بەلدەۋىندە, دالىرەك ايتقاندا, اقمولا وبلىسىنىڭ ءۇش اۋدانىندا ىسكە قوسىلادى.
ماسەلەن, بۋراباي اۋدانىندا جىلىنا 1,5 مىڭ توننا ەت ونىمدەرى وڭدەلەتىن زاۋىت جوباسى قولعا الىندى. ال بۇلاندى اۋدانىنداعى قۇس فابريكاسىندا ەتتى برويلەرلەر وسىرىلمەك. شورتاندى اۋدانىندا 1300 باسقا ارنالعان شوشقا وسىرەتىن كەشەن جانە جىلىنا 60 توننا ەت دايىنداي الاتىن قاز فەرماسى جۇمىس ىستەيتىن بولادى. اقمولا وبلىسى اكىمىنىڭ ورىنباسارى داۋرەن ادىلبەكوۆتىڭ ايتۋىنشا, زاۋىت پەن فەرمالاردىڭ قۇرىلىس جۇمىستارى قارقىندى ءجۇرىپ جاتىر. بۇيىرتسا, بىرەر جىلدا استانا حالقى ءوز بەلدەۋىندە دايىندالعان ەت ونىمدەرىن كەڭىنەن تۇتىنۋعا كوشەدى.
«ۇلت جوسپارى – ءجۇز ناقتى قادام» باعدارلاماسى اياسىندا استانا ازىق-تۇلىك بەلدەۋىندە بۇدان وزگە دە قولعا الىنعان جوبالار كوپ. الىسقا بارماي-اق وسى شورتاندى اۋدانى اۋماعىن ءسوز ەتەر بولساق, مۇندا ءسۇت وندىرەتىن جانە وڭدەيتىن كاسىپورىن قۇرىلماقشى. ونىڭ وندىرىستىك قۋاتى كۇنىنە 25 مىڭ ليتر ءسۇت الۋعا جەتەدى ەكەن. ساۋىن سيىرلاردىڭ سانى ءۇش مىڭنان كەم بولمايدى. سونداي-اق, وسى اۋداندا بۇرىننان جۇمىس ىستەپ كەلە جاتقان «اگروفيرما «رودينا» ءسۇت-تاۋار فەرماسىنىڭ وندىرىستىك قۋاتىن ساۋىن سيىر سانىن ەكى مىڭعا جەتكىزۋ ارقىلى ءوسىرۋ جوسپارلانعان. وسى كاسىپورىنداردىڭ ءبارى تولىق قۋاتىمەن جۇمىس ىستەۋگە كوشكەندە, استانانىڭ ءوز بەلدەۋىندەگى ازىق-تۇلىك قورى قازىرگىدەن بىرنەشە ەسە ارتادى.
مەڭدوللا شامۇراتوۆ
