ەۋروپا ليگاسىنىڭ توپتىق كەزەڭىنەن سۇرىنبەي وتكەن ەلوردالىق «استانا» فۋتبول كلۋبىنىڭ پلەي-وفف كەزەڭىندە كەزدەسەتىن قارسىلاسى انىقتالدى. ول – پورتۋگاليالىق «سپورتينگ» كومانداسى.
ەۋروپا ليگاسىنىڭ 1/16 كەزەڭىنىڭ جەرەبەسى شۆەيتساريانىڭ نەون قالاسىندا تارتىلدى.
«استانا» ەۋروپا ليگاسىنىڭ «ا» توبىندا «ۆيليارەال», «سلاۆيا پراگا» جانە «ماككابي» كوماندالارىمەن ويناپ, ەكىنشى ورىنمەن كەلەسى كەزەڭگە ءوتتى.
ال وعان تاپ كەلگەن ليسسابوننىڭ «سپورتينگ» كلۋبى چەمپيوندار ليگاسىندا «بارسەلونا», «يۋۆەنتۋس» جانە «وليمپياكوس» سەكىلدى تىسقاققان كوماندالارمەن تارتىسىپ, توپتان ءارى اسا الماي, ءۇشىنشى ورىنمەن ەۋروپا ليگاسىنا تۇسكەن ەدى. «سپورتينگ» – جاقىندا عانا ۇزدىك ويىنشى اتانىپ, بەسىنشى «التىن دوبىن» العان داڭقتى كريشتيانۋ رونالدۋدىڭ شىققان كلۋبى.
ەندى اراعا ەكى ايدان اسا ۋاقىت سالىپ, 16 اقپان كۇنى «استانا» ءوز الاڭى – «استانا ارەنا» ستاديونىندا «سپورتينگ» كومانداسىن قابىلدايدى. ال قارىمتا ماتچ 23 اقپان كۇنى ليسسابون قالاسىنىڭ «جوزە الۆالادە» ستاديونىندا وتەدى.
ورىنبەك وتەمۇرات
