جاقىندا وتكەن ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازارباەۆ ەلىمىزدەگى اۆتوموبيل جولدارىنىڭ ساپاسىن سىنعا الىپ, بۇل باعىتتا جاڭا تەحنولوگيالاردىڭ جۇمىس ىستەمەيتىنىن اتاپ وتكەن بولاتىن. كەشە قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ بريفينگىنە قاتىسقان كولىك جانە كوممۋنيكاتسيا ءمينيسترى اسقار جۇماعاليەۆ اۆتوكولىك جولدارىنىنىڭ دامۋ پەرسپەكتيۆاسى جايلى بايانداپ بەردى.
– قازىرگى كەزدە جول سالاسىندا بىرنەشە پروبلەمالار بار. ەلىمىزدەگى جولداردىڭ 33 پايىزىنىڭ ساپاسى سىن كوتەرمەيدى. جوندەۋ جۇمىستارىنىڭ ساپاسىن جاقسارتۋ كەرەك. وسى ماسەلەلەردى شەشۋ ماقساتىندا ءبىز كەلەسىدەي جۇمىستى قولعا الدىق: بيىل ءبىز 5898 شاقىرىم جولعا جوندەۋ جۇمىستارىن ءجۇرگىزدىك. سونداي-اق, باتىس ەۋروپا – باتىس قىتاي مەگا جوباسىندا قازىرگى كەزدە قارقىندى جۇمىس اتقارىپ جاتىرمىز. بيىل جوسپار بويىنشا 806 شاقىرىمىن سالۋىمىز كەرەك بولسا, بۇگىنگى كۇنى ونىڭ 710 شاقىرىمىن سالدىق. قالعانىن وسى جىلدىڭ اياعىنا دەيىن ءبىتىرەمىز دەگەن ءۇمىتىمىز بار, – دەدى مينيستر.
پرەزيدەنت بەرگەن تاپسىرماعا سايكەس استانا – پاۆلودار, استانا – تەمىرتاۋ, الماتى – قاپشاعاي جول ۋچاسكەلەرىندە قۇرىلىس جۇمىستارى باستالىپتى. جاڭا تەحنولوگيالارعا ارنالعان 40 ەكسپەريمەنتالدى ۋچاسكە بار. مەملەكەت باسشىسى ايتقان مونوليتتى تەمىر بەتون تەحنولوگياسىن قازىر سىناقتان وتكىزىلىپ جاتىر. پيلوتتىق جوبا قازىرگى كەزدە جاقسى ناتيجە كورسەتۋدە. سىناقتان ءوتكەننەن سوڭ, ول قولدانىسقا ەنگىزىلمەك.
– سىبايلاس جەمقورلىقتى بولدىرماۋ, باعالاۋدى كۇشەيتۋ ماقساتىندا باسقارۋ قۇرىلىمىن وزگەرتتىك. FIDIC حالىقارالىق ساپا ستاندارتىن ەنگىزدىك. ەندى جول ساپاسىن وسى ستاندارتقا ءسايكەس باقىلاۋدا ۇستاپ وتىرمىز», – دەپ مينيستر اسقار جۇماعاليەۆ تاعى ءبىر سونى جاڭالىقپەن ءبولىستى. سونداي-اق, اۆتوموبيل جولدارىن باسقارۋدىڭ اۆتوماتتاندىرىلعان جۇيەسى ءازىرلەنىپ جاتقانىن, ول دايىن بولعاننان كەيىن ءجۇرگىزۋشىلەر جولدىڭ ساپاسىن كورە الاتىنىن جانە باعىتتى جوسپارلاي الاتىنىن جەتكىزدى. سىبايلاس جەمقورلىقتى جويۋ ماقساتىندا ستاتسيونارلىق بەكەتتەردە اۆتوماتتاندىرىلعان اركالار ورناتىلاتىنىن, بيىل وسىنداي 13 اركا قويىلاتىنىن, كەلەسى جىلى 31 اركا ورناتۋ جوسپارلانعانىن, 2015 جىلعا قاراي ولاردىڭ سانى 80-گە دەيىن جەتەتىنىن ايتتى. سونىمەن بىرگە ەلباسىنىڭ تاپسىرماسىمەن كولىك ينفراقۇرىلىمىن دامىتۋ باعدارلاماسى دايىندالىپ جاتقانىن 2020 جىلعا قاراي قولدانىستاعى جولداردىڭ 29 مىڭ شاقىرىمىن جوندەۋدەن ءوتكىزۋدى جوسپارلاپ وتىرعانىن حابارلادى.