استانا بۇگىندە شىن مانىندە حوككەي قالاسى بولعانداي. كحل چەمپيوناتىندا وينايتىن «بارىس» تەك استانالىقتار ءۇشىن ەمەس, بارشا قازاقستاندىقتاردىڭ سۇيىكتى كومانداسىنا اينالىپ وتىر. محل چەمپيوناتىندا «سنەجنىە بارسى», قازاقستان چەمپيوناتىندا «نوماد» جانە «استانا» كوماندالارى ونەر كورسەتىپ ءجۇر. ال بالالار مەن جاسوسپىرىمدەر كوماندالارىنىڭ دا ايتارلىقتاي جەتىستىكتەرگە جەتىپ جۇرگەنىن اتاپ وتكىمىز كەلەدى.
استانا قالاسىنداعى №10 بالالار مەن جاسوسپىرىمدەردىڭ وليمپيادالىق رەزەرۆتى دايارلايتىن مامانداندىرىلعان سپورت مەكتەبى بازاسىندا بۇگىنگى تاڭدا جەتى جاس شاماسى بويىنشا حوككەيشىلەر تاربيەلەنۋدە. بالالار مەن جاسوسپىرىمدەر اراسىنداعى رەسپۋبليكا چەمپيوناتىنا تۇراقتى قاتىساتىن استانالىق حوككەيشىلەر ۇنەمى جۇلدەگەرلەر قاتارىنان كورىنىپ ءجۇر دەسەك بولادى. ماسەلەن, بيىلعى ماۋسىمدى الار بولساق, جەتى جاس شاماسى بويىنشا وتكەن قازاقستان چەمپيوناتىندا استانالىقتار ءۇش التىن, ەكى كۇمىس جانە ەكى قولا مەدال يەگەرى اتاندى. اتاپ ايتقاندا, 1997-1998, 2003 جانە 2004 جىلى تۋعاندار اراسىنداعى رەسپۋبليكا چەمپيونى اتاعىن جەڭىپ السا, 2001 جانە 2005 جىلى تۋعاندار كوماندالارى كۇمىس, 2000 جانە 2002 جىلعى استانالىقتار قولا جۇلدەگەر اتاندى.
ەل جانە ەلوردا حوككەيىنىڭ كەلەشەگى ءۇشىن حوككەي شەبەرلەرىن دايىنداپ جۇرگەن ا.زاۆودوۆ, ۆ.كوروبەنكو, ا.كيسەل, ق.مايجولوۆ, ا.سترۋكوۆ, پ.ماكەروۆ, ي.چەرنيكوۆ, ۆ.زىكين سىندى باپكەرلەردىڭ دە ەڭبەگى ۇشان-تەڭىز ەكەنىن ايتقىمىز كەلەدى.
تۇپتەپ ايتقاندا, «بارىس» سپورت كەشەنىنىدە بولىپ, تەرلەپ-تەپشىپ جاتتىعىپ جۇرگەن, حوككەي دەسە ىشكەن اسىن جەرگە قويۋعا ءازىر تۇرعان بالالاردى كورگەندە استانادا حوككەي سپورتىنىڭ بولاشاعى باياندى بولاتىنىنا سەنىممەن قارادىق.
