بيىل – تاۋەلسىزدىگىمىزگە شيرەك عاسىر تولىپ, ەگەمەن ەلىمىزدىڭ مەرەيى تاسىعان تاريحي جىل. وسىنداي شۋاققا تولى جىلدى ەلورداداعى العاشقى وقۋ ورىندارىنىڭ ءبىرى, تالاي ماماندى باپتاپ ۇشىرعان س.سەيفۋللين اتىنداعى قازاق اگروتەحنيكالىق ۋنيۆەرسيتەتى دە اۋىز تولتىرىپ ايتار جاقسىلىقتارمەن اياقتاعالى وتىر.
مەشىن جىلى ءبىزدىڭ وقۋ وردامىز ءۇشىن جايلى, تابىستى, تاماشا جەتىستىكتەرگە تولى جىل بولدى. ەلىمىزدى ورگە سۇيرەپ, دامۋىنا تىڭ سەرپىن بەرەتىن كەلەشەك مامانداردىڭ ساپالى ءبىلىم الۋى ۇستاز بىلىكتىلىگى مەن وقۋ ورنىنىڭ عىلىمي-تەحنيكالىق مۇمكىندىكتەرىنە عانا ەمەس, سونىمەن قاتار جاس تۇلەكتەردىڭ الەۋمەتتىك جاعدايىنا دا بايلانىستى ەكەندىگى ايان. وسىندايدا ءبىر دانىشپاننىڭ «سانانى تۇرمىس بيلەيدى» دەگەن قاناتتى ءسوزى ويىمىزعا ورالادى. سوندىقتان وقۋ ۇدەرىسىن جاقسارتۋمەن قاتار, ستۋدەنتتەردىڭ الەۋمەتتىك جاعدايىن ۇنەمى نازاردا ۇستاۋ – ءبىزدىڭ باستى ماقساتتارىمىزدىڭ ءبىرى.
تاياۋ ارادا قازاقستان رەسپۋبليكاسى ءبىلىم جانە عىلىم مينيسترلىگىنىڭ قولداۋىمەن ۋنيۆەرسيتەتكە 800 ورىندىق جاتاقحانا سالىنىپ, پايدالانۋعا بەرىلمەكشى. بۇل – ءبىز ءۇشىن ۇلكەن قۋانىش. بىزدە وقىپ جاتقان تۇلەكتەردىڭ كوبى – الىس اۋىلدان كەلگەن بالالار. ارينە, مۇنىمەن بارلىق ستۋدەنتتەردى جاتاقحانامەن تولىق قامتيمىز دەپ ايتا المايمىز. دەگەنمەن مۇمكىندىگىمىز كەلگەنشە ولاردىڭ تەڭ جارتىسىن جاتاقحانامەن قامتاماسىز ەتتىك. اسىرەسە, شالعايدان كەلگەن بالالاردى ورنالاستىرۋعا جاعداي جاسادىق. اينالىپ كەلگەندە, جاتاقحانا پروبلەماسى – ەلوردادا كۇن تارتىبىنەن تۇسپەگەن وزەكتى ماسەلەلەردىڭ ءبىرى. ونى دا ورنىقتى شەشۋ ءۇشىن بىرقاتار جوبالاردى جوسپارلاپ وتىرمىز.
سونىمەن بىرگە, وقۋ ورداسىندا ستۋدەنتتەرگە ارنالعان الەۋمەتتىك دۇكەن, ەمحانا, ءدارىحانا جۇمىس ءىستەيدى. ونىڭ باعالارى دا قولجەتىمدى.
اسىرا ايتتى دەمەڭىز, باس قالاداعى جوعارى وقۋ ورىندارى اراسىندا ءبىزدىڭ ۋنيۆەرسيتەتتىڭ اسحانالارىنداعى تاعامدار باعاسى ەڭ تومەنى سانالادى.
ءبىزدىڭ مەملەكەتىمىز نارىقتىق جاعدايدا ءومىر ءسۇرىپ وتىرعاندىقتان, الەمدىك ەكونوميكانىڭ اسەرى كوپ. سوڭعى جىلدارداعى مۇناي باعاسىنىڭ تومەندەۋى ءبىراز مەملەكەتتەردىڭ دامۋىنا ىقپالىن تيگىزدى. ءبىزدىڭ ەلىمىز دە داعدارىستىڭ الدىن الىپ, ەكونوميكانى تۇراقتى ساقتاپ قالۋ ءۇشىن بىرقاتار شارالاردى قولعا الدى. سونىڭ بارلىعى قاراپايىم حالىققا وڭاي تيگەن جوق. سوندىقتان بۇگىنگى ەكونوميكالىق جاعدايدى ەسكەرە وتىرىپ, وقۋ اقىسىن وسىرمەي, بىلتىرعى باعامەن قالدىردىق. بۇل دا ءبىزدىڭ جاستارعا جاساعان قامقورلىعىمىز دەپ ويلايمىن.
بيىلعى جاز مەزگىلىندە مەملەكەت باسشىسىنىڭ تاپسىرماسى مەن استانا قالاسى اكىمدىگىنىڭ قولداۋىمەن ۋنيۆەرسيتەتكە ەسىلدىڭ سول جاعالاۋىنان 120 ءپاتەرلى ءۇش قىزمەتتىك جاتاقحانا سالىنىپ, پايدالانۋعا بەرىلدى. ءبىز ونى حالىقارالىق «بولاشاق» باعدارلاماسىمەن جانە اكادەميالىق ۇتقىرلىقپەن شەتەلدە وقىپ كەلگەن جاس عالىمدارعا, عىلىمي جوبالارى بار ماگيسترانتتار مەن دوكتورانتتارعا بەردىك. بۇل قۇرىلىس نىسانىن سوڭعى 30 جىلدا ۋنيۆەرسيتەت يگىلىگى ءۇشىن سالىنعان بىردەن-ءبىر عيمارات دەۋگە بولادى.
سونداي-اق, ۋنيۆەرسيتەت قول قۋسىرىپ وتىرماي, ۋاقىت تالابىنا ساي جاڭاشىل جۇمىستاردى قولعا الدى. ماسەلەن, بىلتىردان باستاپ ەلوردا جانىنان 1200 گەكتار جەر الىپ, ستۋدەنتتەر ءۇشىن ارنايى تاجىريبەلىك شارۋاشىلىق ۇيىمداستىردىق. وعان ءتۇرلى اۋىلشارۋاشىلىق داقىلدارىن: كارتوپ, ارپا, بيداي, سۇلى ەكتىك. العاشقى ءونىم جامان بولعان جوق. ۋنيۆەرسيتەت الەۋمەتتىك جاعىنان از قامتىلعان ادامدارعا كومەك رەتىندە ءبىرنەشە توننا كارتوپتى تەگىن تاراتتى. ءبىز ءۇشىن بۇل دا ۇلكەن جەتىستىك. الداعى جىلى ەت, كوكونىس ونىمدەرىنىڭ تۇرلەرىن ارتتىرۋ ويىمىزدا بار. بۇل كامپۋستى بولاشاقتا زاماناۋي تەحنيكالارمەن قامتاماسىز ەتەمىز. ءارى عىلىم جولىندا جۇرگەن ماماندار سول جەردە وزدەرىنىڭ عىلىمي-زەرتتەۋ جۇمىستارىن جۇرگىزەدى.
ارينە, مۇنىمەن ءبىز ءبارىن تىندىرىپ تاستادىق دەپ ايتا المايمىز. ءالى ويىمىزدا جۇرگەن ماقسات تا, مىندەت تە كوپ.
ءوز باسىم استانا قالالىق ءماسليحاتىنىڭ ەكى مارتە سايلانعان دەپۋتاتى رەتىندە ەلوردا تۇرعىندارىمەن ءجيى كەزدەسەمىن. ولاردىڭ تۇرمىس-تىرشىلىگى مەن الەۋمەتتىك جاعدايلارىنا شامام جەتكەنشە قولداۋ كورسەتىپ كەلەمىن. اسىرەسە, جۇرتشىلىقتى تۇرمىستىق-شارۋاشىلىق ماسەلەلەرى كوبىرەك مازالايدى. تۇرعىندار كوتەرگەن بىرقاتار پروبلەمالار دا وڭ شەشىلدى.
تۇيىندەپ ايتقاندا, بيلىكتە وتىرعان ازامات ءۇشىن حالىقتىڭ قىزمەتشىسى بولۋدان ارتىق مارتەبە جوق. ەلمەن بىرگە كورگەن جاقسىلىقتىڭ قايىرىمى دا مول بولادى. داۋىلپاز اقىن, دارىندى قايراتكەر ساكەن اتامىزدىڭ ەسىمىن يەلەنگەن وقۋ ورداسىنىڭ بيىلعى جىلى جەتكەن جەتىستىكتەرى ىنتىماعى جاراسقان ۇجىمعا تىڭ كۇش, سونى سەرپىن, جاڭا ىزدەنىستەر سىيلادى دەپ ويلايمىن. الداعى تاڭدا دا وسى ۇردىستەن تانباي, ىلگەرىلەي بەرەيىك دەگىم كەلەدى.
ا.كۇرىشباەۆ,
س.سەيفۋللين اتىنداعى
قازاق اگروتەحنيكالىق ۋنيۆەرسيتەتىنىڭ رەكتورى, استانا قالاسى ءماسليحاتىنىڭ دەپۋتاتى
