«استانا» فۋتبول كلۋبى ۋەفا ەۋروپا ليگاسىنىڭ ەكىنشى ىرىكتەۋ كەزەڭىندە ءوز الاڭىندا يزرايل ەلىنىڭ «حاپوەل» كومانداسىن قابىلداپ, 3:0 ەسەبىمەن ايقىن باسىمدىلىقپەن جەڭدى. بۇل جەڭىس ەلوردالىقتاردىڭ عانا ەمەس, بارشا قازاقستاندىقتاردىڭ قۋانىشىنا سەپ بولدى.
العاشقى گول پەنالتيدەن سوعىلدى. قوناقتاردىڭ قورعاۋشىسى ورەل دگاني كەتەۆوامانىڭ ادەمى پاسىنا ۇمتىلعان تاڭات نوسەرباەۆتى ءوز ايىپ الاڭىندا شالىپ جىققانىمەن قويماي, تورەشى تاراپىنان قىزىل قاعاز الدى. 11 مەترلىكتى روحەر كانياس ورىنداپ, استانالىقتار 1:0 ەسەبىمەن العا شىقتى. ويىننىڭ ءبىرىنشى ءبولىمى وسىلاي اياقتالعان بولاتىن.
ال ەكىنشى تايمدا تاعى دا قوس دوپ سوعىلىپ, «استانانىڭ» كەلەسى كەزەڭگە ءوتۋ مۇمكىندىگى ۇلعايا ءتۇستى. ەكىنشى تىنىسى اشىلعان ءبىزدىڭ فۋتبولشىلار سان باسىمدىعىن پايدالانا وتىرىپ, شابۋىلدى ۇدەتە ءتۇستى. سونداي ساتتەردىڭ بىرىندە كوماندا كاپيتانى تاڭات نوسەرباەۆ فوكسي كەتەۆوامادان تاعى ءبىر ادەمى پاس قابىلداپ الىپ, دوپتى ون التىلىقتىڭ سىرتىنان شىرەنە تەپتى. بۇل سوققى «حاپوەل» قاقپاسىن قاقىراتىپ جىبەردى. ورىنداۋ شەبەرلىگى جاعىنان تاڭاتتىڭ وسى گولى جىل ۇزدىگى اتانۋعا ابدەن لايىق.
ءۇشىنشى گول دا الىستان سوعىلدى. ونىڭ اۆتورى – ابزال بەيسەبەكوۆ. وسىلايشا ەلوردالىق كوماندا قارىمتا ويىنعا باسىمدىقپەن اتتانادى. ەندىگى كەزدەسۋ 24 شىلدە كۇنى سىرت الاڭدا وتەدى.
سونىمەن قاتار, قازاقستاندىق تاعى ەكى كوماندا ۋەفا اياسىنداعى كەزەكتى ماتچتارعا قاتىستى. الماتىلىق «قايرات» دانيانىڭ «ەسبەرگ» كومانداسىن 1:0 ۇتىپ جاتىپ, سوڭعى مينۋتتاردا ءوز قاقپالارىنا 2 دوپ وتكىزىپ السا, قاراعاندىلىق «شاحتەر» سىرت الاڭدا ليتۆانىڭ «اتلانتاسىمەن» تەڭ وينادى. ەسەپ 0:0.
وسى ويىنداردان كەيىن 2.125 بالل جيناعان قازاقستان ۋەفا رەيتينگىندە ەكى ساتى جوعارىلاپ, 32-ورىنعا تابان تىرەدى.
نۇريسلام قۇسپانعالي
