كەشە استانا قالاسىندا جاڭادان سالىنعان سوت تورەلىگى سارايىندا رەسپۋبليكا سوتتارىنىڭ 2014 جىلدىڭ ءبىرىنشى جارتىجىلدىعىندا اتقارعان جۇمىسىنىڭ قورىتىندىسى بويىنشا كەڭەيتىلگەن كەڭەس ءوتتى.
كەڭەس جۇمىسى باستالار الدىندا استانا قالاسىنىڭ اكىمى يمانعالي تاسماعامبەتوۆتىڭ قاتىسۋىمەن جاڭا عيماراتتىڭ نەگىزگى اقپاراتتىق-كوممۋنيكاتسيالىق, ينفراقۇرىلىمدىق تانىستىرىلىمى ۇيىمداستىرىلدى.
جوعارعى سوت توراعاسى ق.ءمامي جاڭا سوت تورەلىگى سارايىن سالۋ بارىسىندا كورسەتكەن بەلسەندى قولداۋى ءۇشىن استانا قالاسىنىڭ اكىمىنە العىس ايتتى.
عيماراتتا استانا قالاسىنىڭ سوتى, ەلوردالىق مامانداندىرىلعان اۋدانارالىق ەكونوميكالىق سوتى, ەسىل اۋدانىنىڭ سوتى جانە ەسىل اۋدانىنىڭ №2 سوتى ورنالاسىپتى. جاڭا قونىستا 50 سوت وتىرىس زالى بار. بۇل ءوز كەزەگىندە سوت پروتسەستەرىن جەدەل وتكىزۋگە مۇمكىندىك بەرەدى. نىساننىڭ تەحنولوگيالىق جابدىقتالۋىنا كەلسەك, زالداردا سوت بارىسىن اۋديو-بەينە تىركەۋ قوندىرعىلارى مەن بەينەباقىلاۋ جۇيەلەرى, بەينە كونفەرەنتسيالار وتكىزەتىن ارنايى اپپاراتۋرا ورناتىلعان. ازاماتتارعا قولايلى جاعدايلار جاسالىپ, مەملەكەتتىك باجدار مەن اكىمشىلىك ايىپپۇلدار تولەۋ تەرمينالدارى, سونداي-اق, سمس تاراتۋ جانە ەلەكتروندى پوشتا ارقىلى سوت پروتسەستەرىنە قاتىسۋشىلاردىڭ بارلىعىن اۆتوماتتى تۇردە حاباردار ەتۋدىڭ جۇيەسى قاراستىرىلعان. بۇدان باسقا, سوت عيماراتىندا پروكۋرورلار, ادۆوكاتتار مەن مەدياتورلار كابينەتتەرى, 8 كۇتۋ بولمەسى, پسيحولوگيالىق اۋىرتپالىقتاردان ارىلۋ بولمەلەرى, سونداي-اق مۇراجاي جۇمىس ىستەيدى.
كەڭەس اياسىندا مەملەكەت باسشىسىنىڭ سۋديالاردىڭ VI سەزىندە بەرگەن تاپسىرمالارىن ىسكە اسىرۋدى نازارعا الا وتىرىپ, سوت جۇيەسىن ودان ءارى دامىتۋدىڭ نەگىزگى باعىتتارى تالقىلاندى.
جوعارعى سوت توراعاسى قايرات ءمامي: «وتكەن جارتى جىل ىشىندە رەسپۋبليكا سوتتارى سوت جۇكتەمەسىنىڭ ارتقانىنا قاراماستان, سوت تورەلىگىن جۇزەگە اسىرۋدىڭ جانە سوت ىستەرىن دەر كەزىندە شەشۋدىڭ ساپاسىن ءتيىستى دەڭگەيدە قامتاماسىز ەتتى. جالپى, بارلىق شىعارىلعان سوت اكتىلەرىنىڭ 98,6 پايىزى زاڭدى ءارى نەگىزدى بولىپ تابىلادى» دەپ اتاپ ءوتتى.
جالپى العاندا, ازاماتتاردىڭ سوتتارعا دەگەن سەنىمى ارتىپ كەلەدى. مۇنى سوتتارعا كەلىپ تۇسكەن ءوتىنىشتەر مەن ىستەردىڭ 2013 جىلدىڭ وسى كەزەڭىمەن سالىستىرعاندا 9,5 پايىزعا ارتقانىنان بايقاۋعا بولادى.
ەدىل بوكەەۆ
