يندۋستريالاندىرۋ كۇنى شەڭبەرىندە «سەلەنا گرۋپپ» تۇك استانادا قۇرىلىس ماتەريالدارىن ءوندىرۋشى زاۋىت اشادى
بۇگىن استانا اكىمى اسەت يسەكەشەۆ پەن «Selena FM S.A.» ديرەكتورلار كەڭەسىنىڭ توراعاسى كشيشتوف دومارەتسكي نىساندى ىسكە قوسۋ ماسەلەسىن تالقىلادى. كاسىپورىن ەو-دا سەرتيفيكاتتالعان سىرتقى وقشاۋلاعىش جۇيەلەرىنە ارنالعان قۇرامداستار, كاسىبي قاسبەت سىرلارىن, قاسبەتتەرگە ارنالعان پايدالانۋعا دايىن سىلاقتار (سۇيىق ديسپەرستىك جۇيەلەر), ىشكى جۇمىستارعا ارنالعان ارنايى سىرلار, ارميرلەۋشى قۇرىلىس قوسپالارىن, سۋ وقشاۋلاعىشتىعى جوعارى سىلاقتار, بەتون بلوكتارعا ارنالعان جۇقا قاباتتى قالاۋ ەرىتىندىلەرىن, وزدىگىنەن جازىلاتىن قۇيۋ ماسسالارىن جانە ت.ب. شىعارادى.
زاۋىتتىڭ وندىرىستىك تسەحى 5 مىڭ شارشى مەتر اۋماقتى الىپ جاتىر. جوبانىڭ ماقساتى – باسەكەگە قابىلەتتى جوعارى تەحنولوگيالىق ءوندىرىس قۇرۋ:
– قر قۇرىلىس سالاسىندا يننوۆاتسيالىق جانە ەنەرگيا ۇنەمدەۋشى تەحنولوگيالاردى ەندىرۋ;
– يمپورت الماستىرۋدى قامتاماسىز ەتۋ جانە قر ەكونوميكاسىنىڭ سالالارىنا اسا قاجەت قوسىمشا قۇنى جوعارى ونىمدەردىڭ ءوندىرىسىن ۇيىمداستىرۋ;
– قوسىمشا جۇمىس ورىندارىن قۇرۋ;
– ورتا ازيا مەن رف-عا ءونىم ەكسپورتى ءۇشىن مۇمكىندىكتەر جاساۋ.
زاۋىتتىڭ ونىمدەرى عيماراتتاردىڭ ەنەرگەتيكالىق تيىمدىلىگىن ارتتىرىپ, اۋاعا تاستالاتىن CO2 كولەمىن ازايتۋعا مۇمكىندىك بەرەدى. سونداي-اق, ول زياندى زاتتار شىعارمايدى, ىلعالعا, كوگەرۋگە جانە ميكرواعزالارعا ءتوزىمدى. قۇرامىندا وزون قاباتىن بۇزاتىن پارنيك گازدارى جوق (مىسالى, حفۋ جانە گحفۋ) جانە ەنەرگيا تۇتىنۋدى ازايتاتىن جاڭاشا فورمۋلالار مەن تەحنولوگيالارعا ساي وندىرىلەدى.
جوبا 70 ادامدى جۇمىسپەن قامتيدى. ونىڭ وندىرىستىك قۋاتى جىلىنا 10 000 تونناعا جۋىق ديسپەرسيوندىق, 120 000 توننا قۇرعاق قوسپا. ءونىمنىڭ 40% ەكسپورتقا شىعارىلادى.
«سەلەنا گرۋپپ» 1992 جىلى قۇرىلعان جانە ونىمدەرىن الەمنىڭ 70 ەلىنە جەتكىزەدى. كومپانيا الەمدەگى بىركومپونەنتتى پوليۋرەتان كوپىرشىگى وندىرۋشىلەرىنىڭ ۇزدىك ۇشتىگىنە كىرەدى.
