بۇگىن ەلباسى نۇرسۇلتان نازارباەۆتىڭ قاتىسۋىمەن «قازاقستانداعى جاڭا يندۋستريالاندىرۋ: ورنىقتى دامۋ مەن پروگرەسس ءۇشىن» اتتى جالپىۇلتتىق تەلەكوپىر وتەدى. وسى يندۋستريالاندىرۋ كۇنى اياسىندا استانا قالاسىندا قۇرىلىس ماتەريالدارىن وندىرەتىن زاماناۋي زاۋىت ىسكە قوسىلادى. وندا ارنايى قۇرىلىس قوسپالارى مەن جىلۋ وقشاۋلاۋعا ارنالعان ونىمدەر شىعارىلادى.
كەشە استانا قالاسىنىڭ اكىمى اسەت يسەكەشەۆ پەن «Selena FM S.A.» ديرەكتورلار كەڭەسىنىڭ ءتوراعاسى كشيشتوف دومارەتسكي نىساندى ىسكە قوسۋ ماسەلەسىن تالقىلادى. كاسىپورىن وندىرەتىن قۇرىلىس جۇمىستارىنا قاجەتتى ونىمدەر ەو-دا سەرتيفيكاتتالعان. زاۋىتتىڭ وندىرىستىك تسەحى 5 مىڭ شارشى مەتر اۋماقتى الادى. جوبانىڭ ماقساتى – باسەكەگە قابىلەتتى جوعارى تەحنولوگيالىق ءوندىرىس قۇرۋ. سونىمەن قاتار, قۇرىلىس سالاسىنا يننوۆاتسيالىق جانە ەنەرگيا ۇنەمدەۋشى تەحنولوگيالاردى ەندىرۋدى, قوسىمشا جۇمىس ورىندارىن قۇرۋدى, ورتا ازيا مەن رەسەيگە ءونىم ەكسپورتى ءۇشىن مۇمكىندىكتەر جاساۋدى كوزدەيدى.
قالا اكىمدىگىنىڭ ءباسپاسوز قىزمەتىنىڭ حابارلاۋىنشا, زاۋىتتىڭ ءونىمدەرى عيماراتتىڭ ەنەرگەتيكالىق تيىمدىلىگىن ارتتىرىپ قانا قويماي, اۋاعا تاستالاتىن CO2 كولەمىن ازايتۋعا دا مۇمكىندىك بەرمەك. جوبا بويىنشا 70 ادام جۇمىسپەن قامتىلادى. ونىڭ وندىرىستىك قۋاتى جىلىنا 10 000 تونناعا جۋىق ديسپەرسيوندىق جانە 120 000 توننا قۇرعاق قوسپانى قۇرايدى. ءونىمنىڭ 40%-ى ەكسپورتقا شىعارىلادى.
ايتا كەتەيىك, «سەلەنا گرۋپپ» كومپانياسى 1992 جىلى قۇرىلعان. ءوز ونىمدەرىن الەمنىڭ 70 ەلىنە جەتكىزەدى.
