پرەزيدەنت تاپسىرماسىنا وراي ەلىمىزدىڭ بارلىق ايماعىندا «تسيفرلىق قازاقستان» باعدارلاماسى ءساتتى جۇزەگە اسۋدا. وسى باعىتتا مونوپوليستەردىڭ قىزمەتتەرى «ءبىر تەرەزە» قاعيداتى بويىنشا بىرىكتىرىلىپ, بارلىق قىزمەت كورسەتۋ سالاسى تسيفرلاندىرىلدى. حالىقتىڭ ءومىر سۇرۋىنە ىڭعايلى جاعداي جاساۋ ماقساتىندا العاشقىلاردىڭ ءبىرى بولىپ باس قالادا قولعا الىنعان جوبانىڭ ءبىرى – iQala.
ول 2019 جىلى استانا قالاسى اكىمدىگىنىڭ باستاماسىمەن «استانا – ادالدىق الاڭى» جوباسى اياسىندا قۇرىلدى. iQala قالالىق قىزمەتتەر ورتالىعى جشس ديرەكتورىنىڭ ورىنباسارى تالعات بالتابەكوۆتىڭ ايتۋىنشا, اتالعان ورتالىقتى قۇرۋداعى باستى ماقسات – تۇرعىن ءۇي-كوممۋنالدىق شارۋاشىلىق ۇيىمدارىنىڭ قىزمەتتەرىن الۋدى وڭايلاتۋ, اكىمشىلىك كەدەرگىلەردى قىسقارتىپ, سىبايلاس جەمقورلىق تاۋەكەلدەرىن ازايتۋ جانە بولدىرماۋ, بارلىق قىزمەتتەردى ءبىر جەردە الۋعا ىڭعايلى جاعداي جاساۋ. سونداي-اق وسى ورتالىقتىڭ قىزمەتى قاعازباستىلىقتى جويىپ, حالىقتىڭ تسيفرلىق ساۋاتىن ارتتىرۋ, تۇرعىن ءۇي سەكتورىنىڭ قىزمەتتەرىن اۆتوماتتاندىرۋ پرينتسيپتەرىنە دە نەگىزدەلگەن. قازىر قالا تۇرعىندارى كوممۋنالدىق ۇيىمداردىڭ ورنالاسقان جەرىن ىزدەپ اۋرەگە تۇسپەيدى, بۇل رەتتە قىزمەتتەردى ءبىر جەردە جەتكىزۋگە شارتتار جاساسۋ مۇمكىندىگى پايدا بولدى.
2022 جىلعى 1 مامىردان باستاپ iQala قالالىق قىزمەتتەر ورتالىعى بويىنشا وپەراتورلىق قىزمەت استانا قالاسىنىڭ تسيفرلاندىرۋ جانە مەملەكەتتىك قىزمەتتەر باسقارماسىنا بەرىلدى. ال ورتالىقتىڭ جۇمىسى «قالالىق قىزمەتتەر ورتالىعى» جشس-كە جۇكتەلگەن.
بۇگىندە بۇل ورتالىق ءازىربايجان مامبەتوۆ كوشەسى بويىنداعى 24-ۇيدە ورنالاسقان. ونىڭ بۇرىنعى ورنىن وزگەرتۋگە اسىرەسە ەگدە ادامداردىڭ ءوتىنىش-تىلەگى تۇرتكى بولدى. ويتكەنى وسى باعىتتا قوعامدىق كولىك كوپ جۇرەدى جانە بۇل جەر قالا تۇرعىندارىنىڭ كەلىپ-كەتۋىنە دە وتە ىڭعايلى.
بيىل جىل باسىنان بەرى 143000-نان استام ادام ورتالىقتا قىزمەت الدى. قازىرگى ۋاقىتتا ورتالىق 144 قىزمەت ءتۇرىن كورسەتەدى
– iQala قالالىق قىزمەتتەر ورتالىعى ءۇش باعىتتا قىزمەت كورسەتەدى. بىرىنشىدەن, ونلاين, ياعني تۇرعىندار بارلىق كوممۋنالدىق قىزمەتتى ونلاين فورماتتا www.ns.gov.kz قالالىق قىزمەتتەر پورتالىنان الا الادى. ەكىنشىدەن, قالالىق قىزمەتتەر ورتالىعىنىڭ فرونت-وفيسىنە كەلىپ تىكەلەي كونسۋلتاتسيا الۋعا بولادى جانە ءبىزدىڭ ورتالىقتا الدىن الا قىزمەت كورسەتىلەدى. ورتالىق فرونت-ءوفيسىنىڭ جۇمىسى قازاقستان رەسپۋبليكاسى پرەزيدەنتى اكىمشىلىگىنىڭ وكىلدەرى مەن قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرىنە بارۋ بارىسىندا وڭ باعاسىن الدى, – دەدى ت.بالتابەكوۆ.
جىل وتكەن سايىن ەلوردا حالقىنىڭ سانى وسۋىمەن بىرگە ولاردىڭ سۇرانىسى دا ارتا تۇسۋدە. ماسەلەن, ەگەر 2019 جىلدىڭ ماۋسىم-جەلتوقسان ايىندا ورتالىق 3701 قىزمەت كورسەتسە, 2020 جىلى – 69560 قىزمەت, 2021 جىلى 148586 قىزمەت كورسەتكەن. بيىل جىل باسىنان بەرى 143000-نان استام ادام ورتالىقتا قىزمەت الدى.
– قازىرگى ۋاقىتتا ورتالىق 144 قىزمەت ءتۇرىن كورسەتەدى. ونىڭ ىشىندە جىلجىمايتىن مۇلىك يەسى اۋىسقان جاعدايدا, كوممۋنالدىق مەكەمەلەرمەن شارت جاساسۋ, تەحنيكالىق جانە بىرىڭعاي تولەم شارتىن الۋعا سۇرانىس كوپ. وسىعان وراي, بۇگىنگى تاڭدا استانا قالاسىنىڭ اكىمدىگى مەن «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق بىرلەسە وتىرىپ, كوممۋنالدىق قىزمەت ءتۇرىن ەلەكتروندى فورماتقا كوشىردى. ەندى ەلوردالىقتار iQala ورتالىعىنىڭ كەڭسەسىنە كەلىپ نەمەسە پورتال ارقىلى جىلۋ مەن اۋىز سۋدى, ەلەكتر ەنەرگياسىن تۇتىنۋ جانە تۇرمىستىق قاتتى قالدىقتاردى شىعارۋ قىزمەتىنە كەلىسىمشارت جاساي الادى, – دەدى ديرەكتوردىڭ ورىنباسارى.
بۇل رەتتە, استانالىقتار تەك 1414 نومىرىنەن SMS حابارلاماعا جاۋاپ بەرىپ, ساۋالنامادان ءوتىپ, جەكە دەرەكتەرىن پايدالانۋعا رۇقسات بەرۋى قاجەت. ال بەس مينۋتتان كەيىن بارلىق قاجەتتى كەلىسىمدەردىڭ جاسالعانى تۋرالى حابارلاما كەلەدى.
پرواكتيۆتى قىزمەتتىڭ نەگىزگى مىندەتى – قىزمەت كورسەتۋ ۇدەرىسىن اۆتوماتتاندىرۋ, قاعازباستىلىقتان قۇتىلۋ, سونداي-اق سىبايلاس جەمقورلىقتىڭ الدىن الۋ.
قازىر استانالىقتار اراسىندا گازداندىرۋ ماسەلەسى وزەكتى. وسىعان بايلانىستى iQala-عا «قازترانسگاز ايماق» اق-تىڭ قىزمەت تۇرلەرى ەنگىزىلدى. تابيعي گازدان بولەك, ورتالىق گاز جۇيەسىمەن كەلىسىمشارتقا وتىرۋ قىزمەتى تسيفرلاندىرىلدى. سونىمەن بىرگە كوپپاتەرلى تۇرعىن ۇيلەر اياسىندا ەلوردانىڭ نەگىزگى ەنەرگيامەن جابدىقتاۋشى كومپانيالارىمەن, اتاپ ايتساق, «استانا قالالىق جارىق», «Smart Energy Hub» جانە «تەمىرجولەنەرگو» جشس-پەن بىرقاتار جۇمىس جۇرگىزىلدى جانە بۇگىندە ولارمەن پورتال ارقىلى شارت جاساسۋعا بولادى.
– ءبىز ەلورداداعى ۇيىمدارمەن جۇمىستى جالعاستىرامىز جانە پورتالعا قىزمەتتەردى كوبىرەك قوسۋدى جوسپارلاپ وتىرمىز. وسىلايشا, قالا تۇرعىندارىنىڭ ءومىر سۇرۋىنە ىڭعايلى جاعداي جاسايمىز. iQala پورتالىندا جانە جۇمىس كۇندەرى كاسىپورىننىڭ فرونت-وفيسىندە تاۋلىك بويى قىزمەت كورسەتىلەدى. استانا قالاسى اكىمىنىڭ تاپسىرماسى بويىنشا تۇرعىن ءۇي قۇرىلىسىنىڭ قارقىن الۋىنا بايلانىستى 2023 جىلى iQala قالالىق قىزمەتتەر ورتالىعىنىڭ فرونت-وفيستەرى قاتارىن كوبەيتىپ, ولاردى حالىق كوپ شوعىرلانعان ەلوردانىڭ ەسىل جانە الماتى اۋداندارىنىڭ اۋماعىندا دا اشۋدى جوسپارلاپ وتىرمىز, – دەدى ت.بالتابەكوۆ.
iQala – الەۋمەتتىك جوبا. ول قالا تۇرعىندارىنىڭ, ەلوردا بيلىگى مەن كوممۋنالدىق قىزمەتتەردىڭ ءوزارا ءىس-قيمىلىنىڭ جاڭا فورماتىنا جول اشىپ وتىر.
«استانا – ادالدىق الاڭى» جوباسىنا سايكەس, سىبايلاس جەمقورلىققا قارسى ءىس-قيمىلدىڭ جاڭا قۇرالدارىن ەنگىزۋ ءۇشىن جوبالىق مەنەدجمەنت قولدانىلدى. جوبا ازاماتتاردىڭ مىنەز-قۇلقىنىڭ سىبايلاس جەمقورلىققا قارسى مودەلىن ودان ءارى دامىتۋعا جانە سىبايلاس جەمقورلىقتان باس تارتۋ اتموسفەراسىن قۇرۋعا باعىتتالعان.
