يتاليانىڭ ايگىلى «كارلو فەليچە» تەاترىندا «پاريج قۇداي اناسىنىڭ سوبورى» بالەتىن ۇسىنعان «استانا وپەرا» ارتىستەرىنىڭ شەبەرلىگىنە كورەرمەن ىستىق ىقىلاسىن ءبىلدىرىپ, زور قوشەمەت كورسەتتى.
استانانىڭ ونەر ۇجىمى يتاليا ەلىنە «رۋحاني جاڭعىرۋ» باعدارلاماسى اياسىندا «جاھانداعى زاماناۋي قازاقستاندىق مادەنيەت» جوباسىن جۇزەگە اسىرۋ ماقساتىندا قر مادەنيەت جانە سپورت مينيسترلىگىنىڭ باستاماسىمەن بارعان بولاتىن. اتالمىش تەاترلار اراسىنداعى ەكىجاقتى قارىم-قاتىناس 2015 جىلى باستالعان-دى. قازىرگى ۋاقىتتا «استانا وپەرا» تەاترىنىڭ قويىلىمدارى مەن ارتىستەردىڭ جەكە ونەر كورسەتۋلەرى گەنۋيادا ۇلكەن تانىمالدىلىققا يە. «استانا وپەرا» قويىلىمدارى التى الاشتىڭ التى قىرىنان اسىپ, التى قۇرلىقتىڭ تالاي ەلىندە ۇسىنىلىپ ءجۇر. ەۋروپا ەلدەرىنەن بولەك امەريكا, ازيادا دا ونەرلەرىن كورسەتىپ جۇرگەن «استانا وپەرا» ارتىستەرى كورەرمەندەردى قويىلىمداردىڭ جاڭا ءۇلگىسى مەن كوستيۋمدەردىڭ كەرەمەت كوركەمدىك دەڭگەيىمەن دە قىزىقتىرۋدا. يتاليادا كەزەكتى رەت ءوزىنىڭ شەبەرلىگى مەن ارتىستىك قابىلەتىنە نەگىزدەلگەن بىرەگەي ناقىشىن كورسەتكەن قازاقستاندىق ترۋپپا يتاليالىقتاردى ەرەكشە اسەرگە بولەگەن.
– قازاقستاندىق ارتىستەردىڭ ونەر كورسەتۋى ءمىنسىز بولدى. مۋزىكا مەن بي تولىق ۇيلەسىم تاپتى. بۇل – ەڭ ادەمى جانە ەڭ باستىسى سيرەك ورىندالاتىن بالەت. سەبەبى الەمنىڭ بارلىق تەاتر ساحناسىندا قويىلا بەرمەيدى. «پاريج قۇداي اناسىنىڭ سوبورى» – تاڭداۋلى, مانەرلى ءارى وتە كورىنىستى سپەكتاكل. كوپشىلىك بۇقارا قاتىسقان كورىنىستەر ۇلكەن سەرپىنمەن ءوتتى, كوردەبالەت تاماشا ونەر كورسەتتى. پريما ايگەرىم بەكەتاەۆا ەسمەرالدا بەينەسىن شىعىس ەلىنە ءتان سۇيكىمدىلىگىمەن جەتكىزدى. ول – ءان سالاتىن تاڭعاجايىپ كەربەز ءارتىس. كۆازيمودو پارتياسىندا كوپتەگەن ايتۋلى بيشىلەردى كورسەم دە, باقتيار ادامجاننىڭ كەيىپكەرى بەينەنىڭ ۇلگىلى كورىنىسى بولدى دەپ ايتا الامىن. باقتيار ادامجان – كەشتىڭ شىنايى قاھارمانى. قازاقستاندىق ديريجەر ارمان ورازعاليەۆ سپەكتاكلدى كەرەمەت وتكىزدى, كوپ نارسە وعان دا بايلانىستى ەدى, – دەپ ءوز اسەرىمەن ءبولىسىپتى اننانزيەتا سالۆي ەسىمدى گەنۋياداعى كورەرمەننىڭ ءبىرى.
اتى اڭىزعا اينالعان فرانتسۋز حورەوگرافى رولان پەتيدىڭ 1965 جىلعى «پاريج قۇداي اناسىنىڭ سوبورى» تۇپنۇسقا قويىلىمىن استانالىق ونەر مايتالماندارى قايتا جانداندىرعان. بۇل تۋىندى ونەر الەمىندەگى ءۇش قايتالانباس تۇلعانىڭ ەسىمىمەن بايلانىستى. ماسەلەن, كومپوزيتورى موريس جارر بولسا, حورەوگرافى – رولان پەتي جانە كوستيۋمدەردى جاساعان يۆ سەن-لوران ەكەنىن ايتا كەتكەن ءجون.
نۇرداۋلەت كاكىشەۆ
