استاناداعى اشىق مۇز ايدىندارى مەن سىرعاناقتار, مۇز قالاشىقتارى قىسقى دەمالىستى ۇناتاتىندار ءۇشىن قىس بويى قىزمەت كورسەتەدى. ەلورداداعى كونكي تەبۋشىلەردىڭ قۇزىرىندا – تاعى ءبىر سۋ جاڭا مۇز ايدىن. ول – جاقىندا عانا اشىلعان ەكسپو-2017 اۋماعىنداعى العاشقى مۇز ايدىنى.
جالپى, قىس باستالسا, جىل سايىن «حان شاتىر» سوو جانىنداعى الاڭدا, قالالىق اكىمدىك الدىنداعى الاڭدا, «جەرۇيىق» ساياباعىندا جانە وقۋشىلار سارايىنىڭ جانىندا, بىرقاتار مەكتەپتەردىڭ ماڭىندا جانە باسقا دا قالانىڭ ءبىراز جەرىندە مۇز ايدىندارىنىڭ ءداستۇرلى تۇردە جاسالاتىنى بەلگىلى. اشىق مۇز الاڭدارىنان باسقا, «الاۋ» مۇز ايدىنى سارايىنا دا بارۋشىلار جەتەرلىك. ەندى ەكسپو-2017 اۋماعىنداعى مۇز ايدىنى دا ادام اياعى ارىلمايتىن ورىنداردىڭ بىرىنە اينالادى. اۋدانى 4 مىڭ شارشى مەتردى قۇرايتىن مۇز ايدىنىندا ءبىر ۋاقىتتا 700 ادام كونكي تەبە الادى. مۇز ايدىنىنىڭ استىندا ورنالاسقان توڭازىتقىش قۇرالدارى +10 گرادۋسقا دەيىن مۇزدى ەرىتپەي, ۇستاپ تۇرۋعا قاۋقارلى. سونىڭ ارقاسىندا سىرعاناۋ ماۋسىمى دا كەلەسى جىلدىڭ ءساۋىر ايىنا دەيىن ۇزارتىلماق.
كۇندەلىكتى ساعات 12.00-دەن 23.00-گە دەيىن, ال دەمالىس كۇندەرى ساعات 10.00-دەن 23.00-گە دەيىن جۇمىس ىستەيتىن مۇز ايدىنىنا كىرۋ بيلەتىنىڭ قۇنى 1000 تەڭگە بولسا, زەينەتكەرلەر مەن وقۋشىلارعا 500 تەڭگە, ال 6 جاسقا دەيىنگى بالالارعا تەگىن ەكەن.
سونداي-اق, مۇندا كونكيدى قايراۋ جانە جالعا الۋ قىزمەتىن پايدالانۋعا بولادى. مۇزداعى جاتتىعۋ قۇرىلعىسى, 300 ورىندىق تريبۋنا, جىلى كيوسكىلەر بار. بۇل كوممەرتسيالىق جوبانى استانالىقتار مەن قالا قوناقتارى ءۇشىن «Mega Ice» كومپانياسى جاساعان.
نۇرداۋلەت كاكىشەۆ
