ۇكىمەتتىڭ كەڭەيتىلگەن وتىرىسىندا مەملەكەت باسشىسى نۇرسۇلتان نازارباەۆ دەنساۋلىق ساقتاۋ سالاسىنداعى كادر تاپشىلىعىنا, اسىرەسە ەل وڭىرلەرىندە دارىگەر مامانداردىڭ جەتىسپەۋشىلىگىنە توقتالىپ, ەمدەۋ مەكەمەلەرىن بىلىكتى كادرلارمەن قامتاماسىز ەتۋ جايىن قوزعاعان بولاتىن.
وسىعان وراي بۇرناعى كۇنى قازاقستاننىڭ ورتالىق كوممۋنيكاتسيالار قىزمەتىنىڭ بريفينگىنە كەلگەن دەنساۋلىق ساقتاۋ ۆيتسە-ءمينيسترى ەرىك ءبايجۇنىسوۆ, س.اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ رەكتورى ايقان اقانوۆ, الماتى مەملەكەتتىك دارىگەرلەردىڭ بىلىكتىلىگىن ارتتىرۋ ينستيتۋتىنىڭ رەكتورى عالىمجان توعىزباەۆ, سەمەي مەملەكەتتىك مەديتسينالىق ۋنيۆەرسيتەتىنىڭ رەكتورى تولەۋباي راحىپبەكوۆ وسى باعىتتاعى ەلباسى تاپسىرماسىنىڭ ورىندالۋ بارىسىمەن تانىستىردى.
ەرىك ابەنۇلىنىڭ ايتۋىنشا, دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرىنشە, الەمدە قازىردە 4,5 ملن دارىگەر جەتىسپەيدى. وسى ۇيىمنىڭ ستاتيستيكاسىنا جۇگىنسەك, قازاقستان مەديتسينا قىزمەتكەرلەرىمەن قامتىلۋ جاعىنان 10-شى ورىندا تۇر. بۇگىنگى تاڭدا وتاندىق مەديتسيناعا قاجەت دارىگەرلەردىڭ ناقتى سانى – 5855. سونىڭ 3486-سى العاشقى مەديتسينالىق-سانيتارلىق جاردەم سالاسىنا تيەسىلى. وسى ماسەلەنى شەشۋ ءۇشىن مەديتسينالىق ءبىلىم بەرەتىن جوعارى وقۋ ورىندارىنا بولىنەتىن گرانتتاردىڭ سانى ارتتىرىلعان. ماسەلەن, بۇل كۇندەرى دارىگەرلىك ماماندىقتى تاڭداعان 5 مىڭ ستۋدەنت گرانت نەگىزىندە وقىپ ءجۇر. ولاردىڭ العاشقى لەگى 2019 جىلى قولدارىنا ديپلومدارىن الىپ, دەنساۋلىق ساقتاۋ جۇيەسىندە, اسىرەسە اۋىلدىق جەرلەردە 3 جىل جۇمىس ىستەۋى شارت. وسىدان ەكى جىل بۇرىن «ءبىلىم تۋرالى» زاڭعا ەنگىزىلگەن وزگەرىستەر وسىنى مىندەتتەيدى. سول ماقساتتا 2007 جىلى اۋىلدىق جەرلەردەن كەلىپ وقيتىن ستۋدەنتتەرگە 30 پايىزدىق كۆوتا بولىنگەن. وسىنداي كۆوتا ارقىلى ءبىلىم العان ستۋدەنتتەردىڭ ءبىرىنشى توبى – 638 ادام كەلەسى جىلى وقۋلارىن ءبىتىرىپ, جۇمىسقا كىرىسۋى ءتيىس. ياعني, اۋىلعا بارۋلارى كەرەك.
اۋىلدىق جەرلەرگە باراتىن جاس دارىگەر مامانداردى الەۋمەتتىك تۇرعىدان قولداۋ ءۇشىن جالاقىلارىنا 25 پايىزدىق ۇستەمە قوسۋ, 70 اەك كولەمىندە – 121 مىڭ تەڭگە كوتەرمەاقى تاعايىنداۋ, باسپاناعا دەپ 1500 اەك مولشەرىن قۇرايتىن 2 ملن 596 مىڭ تەڭگەلىك نەسيە بەرۋ قاراستىرىلعان. ولاردان بولەك, بىرقاتار وڭىردە جەرگىلىكتى بيۋدجەتتەن قارجى ءبولىنىپ, جاس مامانداردى ىنتالاندىرۋ شارالارى اتقارىلادى. ماسەلەن, اقتوبە وبلىسىندا اۋىلدىق جەرگە جۇمىسقا كەلگەن جاس دارىگەرگە مەملەكەت قورجىنىنان بەرىلەتىن كومەكتەن تىس 2 ملن تەڭگە بەرىلىپ كەلەدى.
ساننان ساپاعا, ياعني مەديتسينالىق جوو-نان تۇلەپ ۇشقان مامانداردىڭ بىلىكتىلىك دارەجەسىنە كەلسەك, كەلەسى جىلدان باستاپ دارىگەرلەردى وقىتاتىن وقۋ ورىندارىنىڭ رەيتينگىسى تۇزىلەتىن بولدى. سونىمەن بىرگە دارىگەر بولامىن دەپ جوو-عا كەلگەن تالاپكەردىڭ وسى ماماندىققا سايكەستىگى تەست ارقىلى تەكسەرىلەدى. ءۇشىنشى-ءتورتىنشى كۋرسقا كەلگەن ستۋدەنتتى تاعى وسىنداي سىناق كۇتىپ تۇراتىن بولادى.
الداعى جەلتوقسان ايىنىڭ اياعىندا سەمەيدە يادرولىق مەديتسينا ورتالىعى اشىلماق. بۇل جاڭالىقپەن بولىسكەن تولەۋباي راحىپبەكوۆ بۇل ورتالىق 80 پايىز جاعدايدا وبا اۋرۋىن العاشقى كەزەڭدە انىقتاۋعا مۇمكىندىك بەرەتىنىن جەتكىزدى. سەمەي مەملەكەتتىك مەديتسينالىق ۋنيۆەرسيتەتىنىڭ ستۋدەنتتەرىن وقىتۋدا قولدانىپ وتىرعان جاڭا زاماننىڭ ادىستەرىنە توقتالدى.
الماتى مەملەكەتتىك دارىگەرلەردىڭ بىلىكتىلىگىن ارتتىرۋ ينستيتۋتىنا وقۋعا كەلگەن دارىگەر بۇرىن 1 ايدان 5 ايعا دەيىن وقۋ كەرەك بولاتىن. ال, بىلتىردان باستاپ الەمدىك تاجىريبە ەنگىزىلىپ, ءبىر پروبلەما بويىنشا 1-3 كۇندىك وقۋلار, 1 نەمەسە 2 اپتالىق مودۋلدەر ەنگىزىلگەن. ەلىمىزدەگى دارىگەر مامانداردىڭ ساپاسىن جاقسارتۋ ماقساتىندا قىزىلوردا وبلىسىندا پيلوتتىق جوبا سىناقتان وتكىزىلۋدە. ول جوبا سول وڭىرگە دارىگەر مامانداردى تارتۋدى دا كوزدەيدى. سول ءۇشىن سىر بويىنا 12 مەملەكەتتەن تاجىريبەلى ماماندار شاقىرىلعان. مۇنداي جوبا تابىس اكەلسە, بولاشاقتا مەملەكەتتىڭ باسقا دا ايماقتارىنا ەنگىزىلەتىن بولادى. عالىمجان توعىزباەۆتىڭ ايتقان جاڭالىعى وسى بولدى.
بريفينگتە ەستىگەن تاعى ءبىر جاڭالىعىمىز – دەنساۋلىق ساقتاۋدىڭ كادرلىق رەسۋرستارىن دامىتۋ ماقساتىندا تۇجىرىمداما ازىرلەنگەن. ول قۇجات اعىمداعى جىلدىڭ شىلدە ايىندا ۇكىمەت جانىنداعى دەنساۋلىقتى قورعاۋ جونىندەگى ۇلتتىق ۇيلەستىرۋ كەڭەسىنىڭ ماقۇلداۋىنان ءوتىپ, قازىرگى تاڭدا ۇكىمەتتىڭ قاراۋىندا جاتىر.
امانعالي قالجانوۆ