تاياۋدا رەداكتسيامىزعا ايگۇل ەسىمدى ءبىر وقىرمان حابارلاسىپ, «Kazakh TV» قىرعىزشا «سايراپ» جاتقانىنا نارازىلىعىن ءبىلدىردى. «بۇل ارنا ءبىزدىڭ ەلىمىزدى شەت مەملەكەتتەرگە تانىستىراتىن جالعىز ارنامىز ەدى عوي. ول نەگە قىرعىزشا «سويلەيدى»؟ قىرعىز ءتىلى ءبىزدىڭ نە مەملەكەتتىك ءتىلىمىز, نە باسىم حالىقتىڭ ءتىلى ەمەس قوي» دەدى.
راسىندا دا, 2002 جىلدىڭ 25 قازانىندا «Caspionet» اتاۋىمەن ىسكە قوسىلعان, 2016 جىلدان باستاپ «Kazakh TV» جانە «ءبىلىم جانە مادەنيەت» ارنالارىنىڭ بىرىگۋى ناتيجەسىندە «KAZAKH TV» اتاۋىمەن جۇمىسىن جالعاستىرعان ارنا – شەت ەلدەرگە تارايتىن جالعىز تەلەارنامىز. بۇعان دەيىن قازاق, ورىس جانە اعىلشىن تىلدەرىندە حابار كورسەتكەن بۇل تەلەارنا قازاقستاننىڭ مادەنيەتى, تاريحى, ءداستۇرى جانە قازىرگى تىرشىلىگى تۋرالى كورسەتەتىن يميدجدىك ارنا ەدى. بۇگىندە ول 120-دان استام ەلگە تارايدى.
وقىرمان قوڭىراۋىنان كەيىن ءبىز تەلەارنا باسشىلىعىنا حابارلاستىق. تەلەارنا ديرەكتورى ساندۋعاش راحىمجانوۆا سۇراقتارىمىزعا ارنانىڭ پيار-مەنەدجەرى جانسايا ەسىمدى قىز جاۋاپ بەرەتىنىن ءبىلدىردى.
سونىمەن, ءمالىم بولعانداي, بۇل ارنا تەك قانا قازاقستاننىڭ تاريحى مەن مادەنيەتى تۋرالى ەمەس, وتانىمىز بولىنبەس بولشەگىنە اينالعان ورتالىق ازيانىڭ تىنىس-تىرشىلىگىن تانىستىرۋدى دا ماقسات ەتەدى ەكەن. بۇل ورايدا, كورشىلەس قانا ەمەس, باۋىرلاس, تامىرلاس مەملەكەتتەر – قازاقستان مەن قىرعىزستاندى كوپ نارسە ورتاقتاستىرادى. سوندىقتان ەكى جاقتىڭ كەلىسىمى بويىنشا, تەلەارنا حابارلارى قىرعىز تىلىندە دە كورسەتىلەتىن بولىپ شەشىلىپتى. بۇگىنگە دەيىن ارنانىڭ 450-دەن استام جوباسى قىرعىزشاعا اۋدارىلعان. قىرعىز باۋىرلار قازىر وسى ارنادان ءوز تىلىندەگى حابارلاردى كورىپ, قازاق حالقى تۋرالى بۇرىن-سوڭدى كوپ ايتىلماعان مالىمەتتەرگە دە قانىق بولىپ جاتىر ەكەن.
مۇنىڭ ءبارى ءوز كەزەگىندە تەلەارنانىڭ اۋديتورياسىن كەڭەيتۋگە زور ىقپال ەتىپ وتىرعانعا ۇقسايدى…
ال بەيرەسمي دەرەكتەرگە قاراعاندا, «Kazakh TV» ارناسى الدا وزبەك تىلىندە دە حابار تاراتۋى بەك مۇمكىن. بۇل بولاشاقتا تەلەارنانى بۇكىل ورتالىق ازيا كورەرمەندەرىنىڭ ورتاق ارناسىنا اينالدىرۋ, تەلەارنا اۋقىمىن وسى ايماقتا بارىنشا كەڭەيتۋ ماقساتى بولسا كەرەك.
