ەلباسى نۇرسۇلتان نازارباەۆ «قازاقستان جولى-2050: ءبىر ماقسات, ءبىر مۇددە, ءبىر بولاشاق» اتتى جولداۋىندا ەڭ باستى مىندەت – حالىقتى جۇمىسپەن قامتۋ جانە مۇمكىندىگى شەكتەۋلى ادامدار ءۇشىن كەدەرگىسىز كەڭىستىك ۇيىمداستىرۋ ەكەندىگىن اتاپ وتكەن ەدى. وسى تاپسىرمانى ورىنداۋ ماقساتىندا «كەدەرگىسىز كەلەشەك» جوباسى قولعا الىنىپ, بۇگىندە مەملەكەت, ازاماتتىق سەكتور, بيزنەس وكىلدەرى مۇمكىندىگى شەكتەۋلى جانداردى بەلسەندى الەۋمەتتىك ورتاعا تارتۋ ماسەلەسىن بىرلەسىپ شەشۋگە بەلسەنە كىرىستى.
«كەدەرگىسىز كەلەشەك» جوباسى دەنساۋلىعىنا بايلانىستى مۇمكىندىگى شەكتەۋلى ازاماتتاردىڭ ءومىر ساپاسىن ارتتىرۋعا, ونىڭ ىشىندە تۇراقتى جۇمىس ورىندارىنا جۇمىسقا ورنالاستىرۋعا, كەدەرگىسىز ورتا قۇرۋعا, مۇگەدەكتەردىڭ قۇقىن ءتيىمدى جۇزەگە اسىرۋ ءۇشىن قۇقىقتىق كەڭىستىك قالىپتاستىرۋعا باعىتتالعان. بۇل رەتتە استانادا اتقارىلىپ جاتقان جۇمىستار از ەمەس. وسى جونىندە «حالىققا قىزمەت كورسەتۋ ورتالىعى» رمك استانا قالاسى بويىنشا فيليالىنىڭ ديرەكتورى گۇلميرا بابەنوۆا اڭگىمەلەيدى.
–بۇگىنگى تاڭدا قالاداعى حالىققا قىزمەت كورسەتۋ ورتالىقتارىندا قانشا مۇگەدەك جان جۇمىس ىستەيدى؟
– قازىرگى كەزدە ەلباسى تاپسىرماسىن باسشىلىققا الا وتىرىپ, حالىققا قىزمەت كورسەتۋ ورتالىقتارى مۇگەدەكتەردى جۇمىسقا تارتۋدا. استانا قالاسى بويىنشا حالىققا قىزمەت كورسەتۋ ورتالىقتارىندا بۇگىنگى كۇنى 6 مۇگەدەك جۇمىس ىستەيدى. مۇگەدەك قىزمەتكەرلەرگە ءبىزدىڭ ورتالىقتا قىسقارتىلعان, ياعني اپتاسىنا 36 ساعاتتان اسپايتىن جۇمىس ۋاقىتى كوزدەلگەن. وسىلايشا, مۇگەدەكتىگى بار حقكو قىزمەتكەرى جۇمىستا كۇنىنە 6 ساعاتتان اسپايتىن ۋاقىت وتكىزەدى.
– الداعى ۋاقىتتا ولاردىڭ قاتارى ارتا ما؟
– ءيا, جىل سوڭىنا دەيىن استانا قالاسى بويىنشا حالىققا قىزمەت كورسەتۋ ورتالىقتارىندا ولاردىڭ سانىن 21 ادامعا دەيىن ارتتىرۋ جوسپارلانىپ وتىر. مۇمكىندىگى شەكتەۋلى بولعانمەن, بۇل ادامداردىڭ باسقالارمەن قۇقىعى بىردەي. وسىنى ەسكەرە وتىرىپ, كەلەشەكتە مۇمكىندىگى شەكتەۋلى ازاماتتاردىڭ الەۋمەتتىك ماسەلەلەرى مەن ولارعا كەدەرگىسىز كەڭىستىك ورناتۋ باعىتىنداعى ءىس-شارا¬لاردى جالعاستىراتىن بولامىز.
– جىل باسىنان بەرى حقكو-دا قانشا مەملەكەتتىك قىزمەت كورسەتىلدى؟
– جىل باسىنان بەرى استانا قالاسى بويىنشا حالىققا قىزمەت كورسەتۋ ورتالىقتارىندا 1 302 238 قۇجات قابىلداندى جانە ازاماتتارعا 1 341 458 قۇجات بەرىلدى. استانا قالاسى بويىنشا حالىققا قىزمەت كورسەتۋ ورتالىعىنىڭ موبيلدىك توبى جىل باسىنان بەرى ءبىرىنشى جانە ەكىنشى ساناتتاعى 88 مۇگەدەككە تۇراقتى مەكەجايلارىنا بارىپ مەملەكەتتىك قىزمەت تۇرلەرىن كورسەتتى.
جالپى, حالىققا قىزمەت كورسەتۋ ورتالىعى مۇمكىندىگى شەكتەۋلى ادامداردىڭ مەملەكەتتىك قىزمەتتەر الۋى ءۇشىن قاجەتتى جاعدايلار جاساۋعا باسا نازار اۋدارادى. وسى ماقساتتا ءار ورتالىقتا مۇگەدەكتەردەن قۇجاتتار قابىلداۋ ءۇشىن جەكە جۇمىس ورىندارى ءبولىندى, سونداي-اق, پاندۋستار مەن شاقىرتۋ باتىرمالارى ورناتىلعان.
گۇلبارشىن وكەشقىزى
