نۇر-سۇلتان قالاسى اكىمدىگىنىڭ قولداۋىمەن «استانا» كونتسەرت زالىندا كورنەكتى كومپوزيتور, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ يەگەرى تولەگەن مۇحامەدجانوۆ پەن قازاقستان جانە تاتارستاننىڭ حالىق ءارتىسى, مەملەكەتتىك سىيلىقتىڭ لاۋرەاتى نۇرجامال ۇسەنباەۆانىڭ «جاساي بەر, قازاق ەلى» اتتى شىعارماشىلىق كەشى ءوتتى. تاۋەلسىزدىكتىڭ 30 جىلدىعىنا ارنالعان كەشتى ەلوردانىڭ ە.راحماديەۆ اتىنداعى مەملەكەتتىك اكادەميالىق فيلارمونياسى ۇيىمداستىردى.
نۇرجامال ۇسەنباەۆانى جۇرت وپەرا ءانشىسى رەتىندە جاقسى بىلەدى. كەش شىمىلدىعى دا قازاق ونەرىنىڭ التىن قورىنا ەنگەن ە.برۋسيلوۆسكيدىڭ «قىز جىبەك» وپەراسىنداعى جىبەكتىڭ پارتياسىمەن اشىلدى. كونتسەرتتىڭ ءبىرىنشى ءبولىمى دە, نەگىزىنەن, ايگىلى ءانشىنىڭ شىعارماشىلىعىنا ارنالدى. وندا ول ۇلتتىق وپەرا مەن ەۋروپانىڭ الەمگە تانىمال وپەرالىق تۋىندىلارىمەن ونەرسۇيەر قاۋىمدى سۋسىنداتتى. ءانشىنى استانالىق فيلارمونيانىڭ سيمفونيالىق وركەسترى مۋزىكامەن سۇيەمەلدەدى. ونەر ۇجىمىنىڭ كوركەمدىك جەتەكشىسى بەرىك باتىرحان مەن باس ديريجەرى ەرنار نۇرتازين ديريجەرلىك پۋلتكە كەزەكپەن-كەزەك تۇردى. نۇرجامال ۇسەنباەۆا جەكە داۋىستا, قازاقستاننىڭ ەڭبەك سىڭىرگەن قايراتكەرى مەدەت شوتاباەۆپەن دۋەتتە جانە قازاقستاننىڭ ەڭبەك سىڭىرگەن قايراتكەرى گۇلميرا قۇتتىباداموۆا جەتەكشىلىك ەتەتىن كامەرالىق حورمەن قوسىلىپ ءان سالدى.
تولەگەن مۇحامەدجانوۆ – ەل ءسۇيىپ تىڭدايتىن اسەم اندەردىڭ عانا ەمەس, بىرنەشە سيمفونيا مەن وپەرانىڭ, كلاسسيكالىق تۋىندىلاردىڭ اۆتورى. سونىمەن قاتار كينو جانە تەاتر رەجيسسەرى, قازاقستاننىڭ حالىق ءارتىسى تالعات تەمەنوۆتىڭ «ادامدار اراسىنداعى بولتىرىك», «قىزعىش قۇس», «ماحاببات بەكەتى», «كىشكەنتاي حانزادا» فيلمدەرى مەن قازاقستاننىڭ حالىق ءارتىسى, ەكى مارتە مەملەكەتتىك سىيلىقتىڭ يەگەرى دوسحان جولجاقسىنوۆتىڭ «ءبىرجان سال» كينوتۋىندىسىنا, باسقا دا كينوفيلمدەرگە مۋزىكا جازدى.
بيىل سەمەي پوليگونىنىڭ جابىلعانىنا 30 جىل تولدى. كومپوزيتوردىڭ «زامان-اي» ءانى «سەمەي-نەۆادا» قوزعالىسىنىڭ ءانۇرانىنا اينالدى. كونتسەرتتىڭ ەكىنشى بولىمىندە كورەرمەندەر تولەگەن مۇحامەدجانوۆتىڭ وسىنداي بەلگىلى تۋىندىلارىنا قۇلاق قۇرىشىن قاندىردى. اسەم اندەر قازاقستاننىڭ ەڭبەك سىڭىرگەن ءارتىسى مايرا ءىلياسوۆا, قازاقستاننىڭ ەڭبەك سىڭىرگەن قايراتكەرلەرى ايگۇل قوسانوۆا, التىناي جوراباەۆا, ارايلىم راحىمقىزى, مادەنيەت قايراتكەرى ەستاي مۇقاشەۆ, ەلوردا فيلارمونياسىنىڭ سوليستەرى ورىنداۋىندا ۇسىنىلدى. كەشتى فيلارمونيانىڭ «Alem» ەسترادالىق بي ءانسامبلى مەن «شالقىما» حالىق بي ءانسامبلى كوركەمدەدى. كۇيشى-كومپوزيتور, مادەنيەت سالاسىنىڭ ۇزدىگى ايبەك بەكبوسىن رويالگە وتىرعان كومپوزيتورمەن بىرگە «جالعىزدىق» كومپوزيتسياسىن كۇمبىرلەتتى. ال كونتسەرت نۇكتەسىن قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ يەگەرى سۇندەت بايعوجين ەلباسى نۇرسۇلتان نازارباەۆتىڭ ولەڭىنە جازىلعان «گورود موي» جانە اقيىق اقىن مۇقاعالي ماقاتاەۆتىڭ ولەڭىنەن تۋىنداعان «وتان» اندەرىمەن قويدى.
