ءۇش جارىم ايداي بۇرىن «Qazaq Cybersport Federation» قوعامدىق بىرلەستىگىنىڭ ءوتىنىشى نەگىزىندە مادەنيەت جانە سپورت مينيسترلىگى كيبەرسپورتتى قازاقستان اۋماعىنداعى سپورتتىڭ ءبىر ءتۇرى رەتىندە رەسمي تانىدى. بۇل سپورت بيىل دجاكارتادا وتكەن ازيا ويىندارىنىڭ باعدارلاماسىنا دا ەنگىزىلىپ, ەلىمىزدىڭ اتىنان اتالمىش دوداعا 9 كيبەرسپورتشى قاتىستى. الايدا استانا قالالىق ءماسليحاتىنا كيبەرسپورتقا بايلانىستى ارىز-شاعىمدار تۇسكەن. بەيسەنبى كۇنى ءماسليحاتتىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسياسى وتىرىسىندا كيبەرسپورتتىڭ جايى قارالدى.
اتالمىش كوميسسيا توراعاسى ميراس شەكەنوۆتىڭ ايتۋىنشا, كيبەرسپورتشىلار جينالىپ, دايىندالۋ ءۇشىن بەلگىلى ءبىر بازا كەرەك. «قازاقستان كيبەرسپورتتى سپورت ءتۇرى بولىپ تانىعانمەن, سالىق كودەكسىندە سپورت سەكتسياسى مەن ويىن كلۋبىن اجىراتاتىن باپ جوق. سونىڭ سالدارىنان كيبەرسپورتقا دا قابىلدانعان سالىق ستاۆكاسى قولدانىلىپ ءجۇر. وسىعان بايلانىستى كومپيۋتەر كلۋبتارىنا, بوۋلينگتەرگە, ويىن اۆتوماتتارىنا سالىق ستاۆكاسىن وزگەرتۋ ماسەلەسى تۋىنداپ وتىر» دەيدى ول.
دەپۋتات سول سەبەپتەن كەيبىر كومپيۋتەر كلۋبتارى كولەڭكەلى بيزنەسپەن اينالىسىپ وتىرعانىن ايتادى. استاناداعى كلۋبتاردا 620 كومپيۋتەر تىركەلگەن. م.شەكەنوۆ ودان دا كوپ دەپ ەسەپتەيدى. «كلۋبتار ينتەرنەت كافەلەردىڭ اتىن جامىلىپ, كەز كەلگەن تەكسەرۋ كەزىندە دەمدە ينتەرنەت-كافەگە اينالىپ شىعا كەلەدى. بۇل جاعداي جەمقورلىققا جول اشادى. نەگە كلۋبتار «كولەڭكەدەن» شىقپايدى؟ وزدەرىنە پايدالى نەمەسە قازىرگى سالىق ستاۆكاسى ءتيىمسىز بولعان سوڭ ارينە. سوندا كىلتيپان مەملەكەتتىك كىرىستەر دەپارتامەنتىنىڭ جۇمىسىندا ما, الدە سالىق ستاۆكاسىندا ما؟ بۇگىندەرى سونى انىقتاۋىمىز كەرەك. قازىرگى تاڭدا ءار كومپيۋتەرگە سالىق ستاۆكاسى 4 اەك-ءتى قۇرايدى» دەيدى دەپۋتات.
وتىرىس سوڭىندا ءتيىستى ساراپتاما جۇمىستارىنان سوڭ ماسەلەنى رەتتەۋ ءۇشىن جوعارعى ورگاندارعا ۇسىنىس-حات جولداۋ ۇيعارىلدى.
