باس شاھارداعى №3 بالالار كىتاپحاناسىندا «كىتاپحانا ءتۇنى» اتتى قىزىقتى كەش ءوتتى. بۇل ءىس-شارانى وتكىزۋگە قالالىق مادەنيەت جانە سپورت باسقارماسى مەن سارىارقا اۋدانىنىڭ اكىمشىلىگى قولداۋ كورسەتتى.
كەش اياسىندا كىتاپحاناعا كەلۋشىلەرگە ارنالعان ءتۇرلى باعدارلامالار ۇيىمداستىرىلدى. بەلگىلى بالالار اقىنى تىلەۋعازى بەيسەمبەكتىڭ جاس وقىرماندارمەن جۇزدەسۋى ءوتتى. قالامگەر جەتكىنشەكتەرگە ارناعان جاڭا ولەڭدەرىن وقىدى. وقۋشىلار سۇراقتارىنا جاۋاپ بەردى. كەزدەسۋ سوڭىندا اقىن جاقىندا باسپادان شىققان «سويلەيتىن كۇشىك» اتتى جيناعىن كىتاپحاناعا سىيلادى. قازىر جاس وقىرماندار سانى كوبەيگەن. جازعى كانيكۋلدا 300-دەن استام جەتكىنشەك كىتاپحاناعا ءجيى باس سۇققان. سوعان وراي, كەش بارىسىندا «جازعى وقۋ-2018» شاراسىنىڭ قورىتىندىسى سارالانىپ, سارىارقا اۋدانى اكىمىنىڭ ورىنباسارى ەرجان جاقىباەۆ كىتاپتى كوپ وقىعان بالالارعا سىيلىق تاپسىردى.
سونداي-اق «ءبىر ەل – ءبىر كىتاپ» شاراسى شەڭبەرىندە داڭقتى باتىر اتامىز باۋىرجان مومىشۇلىنىڭ «ۇشقان ۇيا» كىتابىنا ارنالعان وقىرماندار كونفەرەنتسياسى بولدى. وعان بەلگىلى جۋرناليست بەكەن قايرات پەن №15 ورتا مەكتەپتىڭ 7-سىنىپ وقۋشىلارى قاتىسىپ, ايتۋلى تۇلعانىڭ ۇلتتىق قۇندىلىقتاردى ارداقتاعان جيناعى جايىندا تاعىلىمدى سوزدەر ايتىلدى. وقۋشىلار كىتاپتان العان اسەرلەرىمەن ءبولىستى. كىتاپحانا تۇنىنە ارنالعان كەش ءتۇننىڭ ءبىر ۋاعىنا دەيىن سوزىلدى. بالالار اتا-انالارىمەن بىرگە ءتۇرلى ويىندار ويناپ, سپورتتىق شارالارعا قاتىستى.
«كەش وتە قىزىقتى ءوتتى. اسىرەسە, بالالار قۋانىشقا كەنەلدى. مۇنداي شارالار وقىرماندار مەن كىتاپحانا اراسىن جاقىنداتا تۇسەدى. سوندىقتان بىزگە ونىڭ بەرەرى مول بولدى» دەيدى №3 كىتاپحانا مەڭگەرۋشىسى مارال اقتاەۆا.
