كەشە ءماجىلىستىڭ جالپى وتىرىسىندا ۇكىمەت باسشىسى مەن ۇلتتىق بانك توراعاسىنىڭ اتىنا دەپۋتاتتىق ساۋال جولداعان ايقىن قوڭىروۆ وسىنداي مالىمدەمە جاسادى. ول مۇنايدىڭ ەكسپورتىنان تۇسكەن قاراجاتتان قازاقستاندىقتاردىڭ تابىسىن يندەكستەۋدى ۇسىندى. دەپۋتات تەڭگە باعامىنىڭ قۇبىلۋىنا ەش قارەكەتسىز وتىرعان ۇلتتىق بانكتى ايىپتادى.
«ۇكىمەت پەن ۇلتتىق بانك تەڭگەنىڭ ءالسىرەۋىن جالپىلاما ءتۇسىندىردى: دوللاردىڭ كۇشەيۋى, دامۋشى نارىقتاردان كاپيتالدىڭ اعىلۋى, انتيرەسەيلىك سانكتسيالار. سىرتقى جاعدايلارعا عانا سۇيەنۋ ناقتى كارتينانى بۇركەمەلەيدى. ۇلتتىق بانكتىڭ ستراتەگياسىنا قاراساق, ينفلياتسيانىڭ وسۋىنە جانە ورىن العان جاعدايعا جايباراقاتتىقپەن قاراپ وتىرۋىمىز كەرەك» دەپ مالىمدەدى ايقىن قوڭىروۆ.
ونىڭ ايتۋىنشا, قاراپايىم حالىق ءوزگەرىستەرگە تەك مورالدىق جاعىنان دايىندالا الادى. ويتكەنى جۇرتتىڭ كوپشىلىگىنىڭ تابىسى وزگەرمەيدى. سول سەبەپتەن ۆاليۋتا باعامىنىڭ جاعىمسىز اسەرىنەن حالىقتى قورعايتىن كەز كەلدى. «مەن زەينەتاقى سالىمدارى مەن ۇلتتىق ۆاليۋتاداعى دەپوزيتتەر تۋرالى ايتىپ وتىرمىن. قازىرگى كەزدە زەينەتاقى جارناسى تەك تەڭگەمەن تولەنەدى, سونداي-اق مەملەكەت بانكتەگى سالىمداردى دا تەڭگەمەن تولەۋدى ىنتالاندىرۋدا. مۇنداي جاعدايدا مەملەكەت ازاماتتاردىڭ زەينەتاقى جانە دەپوزيتتىك سالىمدارىن قۇنسىزدانۋدان قورعاۋدى قامتاماسىز ەتۋگە مىندەتتى» دەپ ءتۇسىندىردى دەپۋتات.
ول حالىقتىڭ تابىسىن يندەكستەيتىن اقشانى مۇناي ەكسپورتىنىڭ تۇسىمىنەن الۋدى ۇسىندى. تەڭگەنىڭ باعامى ەكىجىلدىق كورسەتكىشتەن تومەندەدى, ال مۇنايدىڭ باعاسى كۇرت ءوستى. ا.قوڭىروۆتىڭ پىكىرىنشە, ەكى جىل بۇرىن مۇنايدىڭ 1 باررەلى 45 دوللار تۇراتىن, ال دوللاردىڭ باعامى 340 تەڭگەنى قۇراپ, ءار باررەلدەن 15300 تەڭگە تابىس جينالدى. ءبىر جىل بۇرىن مۇنايدىڭ ءبىر باررەلى 50 دوللار بولعاندا, تابىس كولەمى 17000 تەڭگەنى قۇرادى. قازىرگى كەزدە مۇناي باعاسى 80 دوللارعا جۋىقتادى, ال تەڭگەنىڭ باعامى ءبىر دوللارعا 380 تەڭگەگە جەتتى. سونىڭ ناتيجەسىندە ءار باررەل مۇناي سالاسىنا 30400 تەڭگە تابىس اكەلۋدە. «ءبىزدىڭ ەسەبىمىز بويىنشا ەلىمىزدىڭ كۇللى مۇناي ەكسپورتى كولەمىندە جىلدىق ءتۇسىم شامامەن 3 ترلن تەڭگەنى قۇرايدى. ۇلتتىق اقشامىزدىڭ السىرەۋىنەن قالىپتاسقان جاعدايداعى حالىقتىڭ جوعالتاتىن قاراجاتىنا وتەماقى تولەۋگە بۇل جەتكىلىكتى سوما» دەدى دەپۋتات.
