كەشە استانا قالاسى اكىمدىگىنىڭ قولداۋىمەن كاسىپكەرلىك قىزمەت پەن تۋريزم سالاسىندا استانالىق جۋرناليستەردىڭ بىلىكتىلىگىن ارتتىرۋ ماقساتىندا «Advert Optimus» جشس سەمينار ۇيىمداستىردى.
جيىنعا «Kazakh Tourizm» ۇك» اق باسقارما توراعاسىنىڭ ورىنباسارى تەمىر دۇيسەنعاليەۆ پەن «اتامەكەن» ۇلتتىق كاسىپكەرلەر پالاتاسىنىڭ قىزمەت كورسەتۋ سالاسى دەپارتامەنتى ديرەكتورىنىڭ ورىنباسارى قارلىعاش التاەۆا, تەلەجۇرگىزۋشى قانات اۋەسباي جانە بيزنەس سالاسىنداعى ساراپشىلار, باق وكىلدەرى قاتىستى.
سەمينار بارىسىندا ىشكى جانە سىرتقى ءتۋريزمنىڭ قازىرگى حال-احۋالى, اتالمىش سالاداعى كاسىپكەرلىكتى دامىتۋ ءۇشىن قانداي جۇمىستاردىڭ جاسالىپ جاتقانى ءسوز بولدى. «اتامەكەن» ۇلتتىق كاسىپكەرلەر پالاتاسى ماماندارىنىڭ مالىمەتىنشە, ءبىر جىلدىڭ ىشىندە استاناداعى 1400 ستارتاپ بيزنەس كۋرسىنان وتكەن. وسىنىڭ ارقاسىندا سەرتيفيكاتقا يە بولعانداردىڭ 70 پايىزى قىزمەت كورسەتۋ سالاسى بويىنشا جەكە كاسىپتەرىن اشقان. ال ءوز كەزەگىندە تەمىر دۇيسەنعاليەۆ قازاقستاننىڭ تۋريزم سالاسىندا كەنجە قالىپ جاتقان تۇستارى كوپ ەكەنىن جاسىرمادى.
– ەلىمىزدە تۋريزم سالاسىنا مامان دايىندايتىن 60-تان اسا وقۋ ورنى بار. جىلىنا 2 مىڭنان اسا جاس مامان ءبىتىرىپ شىعادى. بىراق ولاردىڭ اراسىندا بۇل سالادا جۇمىس ىستەيتىندەرى نەكەن-ساياق. مىسالى, ءتۋريزمى دامىعان ەلدەردە ستۋدەنتتەر 6 اي ساباق وقىسا, 6 اي وندىرىستىك تاجىريبەدەن ءوتىپ, جالاقىعا جۇمىس ىستەيدى. بىراق, وكىنىشكە قاراي, ءبىزىڭ ەلدە ونداي جۇيە جوق. شىنىن ايتقاندا, بىزدە مامان دايىنداۋ دەڭگەيى تومەن. جالپى, الداعى ۋاقىتتا مەملەكەتتىك قىزمەتكەرلەردىڭ بارلىعىن گيد قىزمەتىنىڭ كۋرسىنان وتكىزۋ كەرەك, – دەدى ول.
ونىڭ ايتۋىنشا, الەمدەگى تۋريزم سالاسى دامىعان ەلدەردىڭ ءبىرى – يسپانيا. بۇل ەلگە جىلىنا 82 ملن تۋريست باراتىن كورىنەدى. الايدا يسپان ەلىنىڭ تاريحى مەن گەوگرافيالىق جاعدايىن جاھان جۇرتى جاقسى بىلسە دە, اتالمىش مەملەكەت ءتۋريزمىن دامىتۋ ءۇشىن ماركەتينگ جۇمىسىنا جىلىنا ميلليونداعان ەۋرو بولەدى ەكەن.
– ەلباسىنىڭ «رۋحاني جاڭعىرۋ» باعدارلاماسى اياسىندا «قازاقستاننىڭ كيەلى كارتاسى – 100 كيەلى نىسان» بەلگىلەنگەن بولاتىن. ەندى ەل تۇرعىندارىن وسى كيەلى ورىنداردى ارالاۋعا شاقىرامىز, – دەدى ت.دۇيسەنعاليەۆ تاعى ءبىر سوزىندە. سەمينار سوڭىندا باق وكىلدەرىنە ارنايى سەرتيفيكاتتار تابىس ەتىلدى.
