استانا قالاسىنىڭ كوركىن كەلتىرىپ تۇراتىن نىسانداردىڭ ءبىرى – كوپىرلەر. ەلوردا بولعالى ەسىل وزەنى ۇستىنەن بىرنەشە كوپىر سالىندى. بۇل كوپىرلەر, ءبىر جاعىنان, قالانىڭ ساۋلەتىن اشىپ تۇرسا, ەكىنشى جاعىنان, ەلورداداعى وزەكتى ماسەلەنىڭ ءبىرى – كولىك كەپتەلىسىنىڭ الدىن الىپ تۇرعان ماڭىزدى ينفراقۇرىلىمعا اينالدى. الداعى جىلى تاۋەلسىزدىك داڭعىلى تۇسىنان تاعى ءبىر كوپىر اشىلادى. بۇل جونىندە استانا اكىمى التاي كولگىنوۆ ءمالىم ەتتى.
«جىل سايىن قالا تۇرعىندارىنىڭ قاتارى كوبەيىپ, كولىك ءنوپىرىنىڭ ارتۋىنا بايلانىستى جول-كولىك جەلىسىن دامىتۋعا ءتيىستى كوڭىل ءبولىپ كەلەمىز. ترافيكتى جەڭىلدەتۋ جانە اۋداندار اراسىنداعى قوسىمشا بايلانىستى قامتاماسىز ەتۋ ءۇشىن كوپىرلەر, كوشەلەر سالامىز, سول سياقتى جولداردى كەڭەيتۋ جۇمىسىن جۇرگىزەمىز.
ەسىل وزەنى ارقىلى وتەتىن تاۋەلسىزدىك داڭعىلىنداعى كوپىر قۇرىلىسىنىڭ بارىسىمەن تانىستىم. بۇل كوپىر تاۋەلسىزدىك داڭعىلى, جاڭا تەمىرجول ۆوكزالى, قوشقارباەۆ داڭعىلى, ناجىمەدەنوۆ كوشەسى, ازىرەت سۇلتان مەشىتى, بايتۇرسىنوۆ كوشەسى, قورداي, ايناكول, مومىشۇلى داڭعىلى مەن سول جاعالاۋ اراسىنداعى قوسىمشا بايلانىستى قامتاماسىز ەتەدى. بۇل كوپىردى 2023 جىلى اياقتاۋدى جوسپارلاپ وتىرمىز.
وسى جىلدىڭ تامىز ايىندا ۇلى دالا داڭعىلىنداعى جاڭا كوپىر ۇستىندەگى قوزعالىستى اشتىق. كوپىر ماڭگىلىك ەل داڭعىلىنا, ا.بايتۇرسىنوۆ, ر.قوشقارباەۆ, ج.ناجىمەدەنوۆ كوشەلەرىنە, Nova City اۋدانىندا, «مىڭجىلدىق» اللەياسىندا كولىك اعىنىن سەيىلتۋگە, «نۇرلى جول» جاڭا ۆوكزالىنا, «تەلمان» جانە «پرومىشلەننىي» ەلدى مەكەندەرىنە, مەترو گيپەرماركەتىنە, جۇماباەۆ داڭعىلىنا, جۇرگەنوۆ كوشەسىنە جانە ت.ب. قولجەتىمدىلىكتى ارتتىرادى.
سول سياقتى وسى ايدا ا62 كوشەسىندە (ا91 كوشەسىنەن استانا-قاراعاندى تاس جولىنا دەيىنگى ارالىق) قوزعالىستى اشۋدى جوسپارلاپ وتىرمىز. بۇل كوشە قاراعاندى تاس جولى, «نۇرلى جول» تەمىرجول ۆوكزالى جانە قالانىڭ سول جاعالاۋى اراسىنداعى كولىك قاتىناسىن قامتاماسىز ەتەدى.
سونىمەن قاتار سوڭعى جىلدارى 400-دەن استام كوشە جوندەلدى, ولاردىڭ جارتىسى ەلدى مەكەندەردە ورنالاسقان. وسىعان دەيىن ءبىز كەشەندى كولىك سحەماسى (ككس) تۇجىرىمداماسىن بەكىتتىك. ككس تۇرعىنداردىڭ جىل سايىنعى ءوسىمىن جانە جولدارداعى ترافيكتىڭ ۇلعايۋىن ەسكەرە وتىرىپ, قالالىق كولىكتىڭ 10 جانە ودان دا كوپ جىلعا بىرىڭعاي تەحنيكالىق پايىمىن ازىرلەۋگە مۇمكىندىك بەرەدى» دەپ جازدى ەلوردا اكىمى.
