كولىك قىزمەتكەرلەرى كۇنى مەرەكەسىنە وراي استاناداعى جولاۋشىلار كولىگى كاسىپورىندارى اراسىندا سپارتاكيادا ءوتتى.
ايتۋلى شاراعا قاتىسۋشىلار ۆولەيبول, ۇستەل تەننيسى جانە شاعىن فۋتبولدان باق سىناستى. سايىسقا شامامەن العاندا 150-دەن استام قىزمەتكەر قاتىستى. ءبارى دە مەرەكەلىك كوڭىل-كۇيدە, جۇيرىككە مىنگەندەي تاماشا اسەردە ءجۇردى.
الدىمەن كولىك سالاسىنىڭ ماماندارى ۆولەيبولدىڭ كورىگىن قىزدىردى. وندا ءتورت كوماندا سايىسقا ءتۇستى. ۇشقىرلىقتى, جىلدامدىقتى قالايتىن ويىندا ماماندار ءبىر-بىرىنە دەس بەرگەن جوق. ءتاپ-ءتاۋىر ونەر كورسەتتى. جارىسقا تاس ءتۇيىن ازىرلەنگەندىگىن دالەلدەدى. ۆولەيبول ويىنىندا قالاداعى №2 اۆتوبۋس پاركىنىڭ كومانداسى توپ جاردى. ەكىنشى ورىندى №1 اۆتوبۋس پاركىنىڭ ۇجىمى يەلەندى. ءۇشىنشى ورىن №3Sk اۆتوبۋس پاركىنىڭ كومانداسىنا بۇيىردى.
ۇستەل تەننيسى دە قىزىقتى بولدى. ناعىز الامان ويىنعا اينالدى. جەتى كوماندا مۇشەلەرى ۇزاق تارتىستى. ءبارى دە «سەن تۇر, مەن اتايىن» دەيتىن سايىپقىراندار. كۇشتىلەر سىناسقان باسەكەدە №2 اۆتوبۋس پاركىنىڭ تەننيسشىلەرى جەڭىس تۋىن كوتەردى. ەكىنشى جۇلدەگە №1 اۆتوبۋس پاركىنىڭ ۇجىمى قول جەتكىزدى. ءۇشىنشى جۇلدەنى «جورعا مت» جشس-ءنىڭ سپورتشىلارى قاناعات تۇتتى.
سوڭعى سايىس قاجىمۇقان مۇڭايتپاسوۆ اتىنداعى ورتالىق ستاديوندا وتكەن شاعىن فۋتبولعا ۇلاستى. مۇندا 7 كوماندا ءوزارا سىنعا ءتۇستى. جەرەبە سالۋ داستۇرىمەن كوماندالار «ا» جانە «ب» توپتارىنا ءبولىندى. «ا» توبىنا: №7 اۆتوبۋس پاركى, «ەcىل – استانا» مەكەمەسى, №3Sk اۆتوبۋس پاركى جانە «LRT قۇرىلىسى بويىنشا ديرەكتسيا» جشس-ءى كىرسە, «ب» توبىنىڭ قۇرامىنا №2 اۆتوبۋس پاركى, «جورعا مت» جشس جانە №1 اۆتوبۋس پاركى ەندى.
ويىن وتە جان الىپ, جان بەرىسكەن جاعدايدا ءوتتى. جىگىتتەر الا دوپ قۋىپ جۇرگەن كاسىبي فۋتبولشىلاردان ءبىر كەم ونەر كورسەتكەن جوق. جارتىلاي فينالعا ءتورت كوماندا سۋىرىلىپ شىقتى. اقىرى, ناتيجەدە بەلگىلى بولدى.
شاعىن فۋتبول تۋرنيرىندە №2 اۆتوبۋس پاركىنىڭ جىگىتتەرى جەڭىس تۇعىرىنا كوتەرىلدى. ەكىنشى ورىندى «LRT قۇرىلىسى بويىنشا ديرەكتسيا» جشس جەڭىپ الدى. ءۇشىنشى ورىندى «جورعا مت» جشس يەلەندى.شارا سوڭىندا بارلىق جۇلدەگەرلەر باعالى سىيلىقتارمەن ماراپاتتالدى.
