كوماندالار مەن ويىنشىلار

ماۋسىمنىڭ 4-ءى كۇنى, چەمپيوناتتىڭ باستالۋىنا تۋرا 10 كۇن قالعاندا, وعان قاتىساتىن 32 كوماندا ءوز قۇرامدارى جونىندە رەسمي وتىنىمدەرىن تاپسىردى.

* مۋنديالدا ءار كوماندانىڭ ساپىندا 23 فۋتبولشىدان بار.
* فينالدىق تۋرنيرگە بارلىعى 736 ويىنشى قاتىسادى.
* وتىنىمگە ەنگەن فۋتبولشىلار 55 ەلدىڭ چەمپيوناتتارىندا ويناپ ءجۇر. بۇلاردىڭ 74 پايىزى ەۋروپا ەلدەرىندە دودالارعا تارتىلعان.
* ويىنشىلاردىڭ 124-ءى – انگليا, 81-ءى – يسپانيا, 67-ءى – گەرمانيا, 58-ءى – يتاليا جانە 49-ى فرانتسيا جاساقتارىندا وينايدى.
* مۋنديالدا انگليانىڭ «مانچەستەر سيتي» كومانداسىنىڭ 16 فۋتبولشىسى ءارتۇرلى ەلدەردىڭ قۇرامالارى ساپىندا باسەكەگە قوسىلادى. بۇدان كەيىن ءمادريدتىڭ «رەالى» (15), «بارسەلونا» (14), «چەلسي», «پاري سەن-جەرمەن» جانە «توتتەنحەم» (12-دەن) كلۋبتارى تۇر.
* انگليا قۇراماسى مۇشەلەرى تۇگەل ءوز ەلىنىڭ چەمپيوناتىندا ونەر كورسەتەدى. بۇل جونىندەگى بۇدان كەيىنگى جوعارى كورسەتكىشكە رەسەي (21/23) مەن ساۋد ارابياسى (20/23) قۇرامالارى يە.
* سەنەگال مەن شۆەتسيا قۇرامالارىندا ءوز ەلدەرىنىڭ چەمپيوناتتارىندا جۇرگەن بىردە-ءبىر فۋتبولشى جوق. ال بەلگيا, يسلانديا, نيگەريا جانە شۆەيتساريا تەرمە جاماعاتتارىندا ءبىر-ءبىر ويىنشىدان عانا بار.
* گەرمانيا قۇراماسى قۇرامىندا 9 الەم چەمپيونى الاڭعا شىعادى. ولاردىڭ توبىن 2014 جىلعى چەمپيوناتتا التىن مەدال العان مانۋەل نويەر, ماتتياس گينتەر, ماتس حۋممەلس, دجەروم بواتەنگ, سامي حەديرا, يۋليان دراكسلەر, توني كرووس, مەسۋت وزيل جانە توماس ميۋللەر قۇرايدى.
* 736 فۋتبولشىنىڭ 200-ءى بۇعان دەيىن الەم چەمپيوناتىنىڭ فينالدىق تۋرنيرىنە قاتىسقان. بۇلاردىڭ 186-سى – 2014 جىلى برازيليا, 61-ءى – 2010 جىلى وڭتۇستىك افريكا, 21-ءى – 2006 جىلى گەرمانيا, 1-ءى 2002 جىلى كورەيا/جاپونيا الاڭدارىندا ويناعان.
* مەكسيكالىق 39 جاسار رافاەل ماركەس الەم چەمپيوناتى تاريحىندا بەس مۋنديالعا قاتىسقان ءتورتىنشى ويىنشى بولعالى تۇر. بۇعان دەيىن بۇل بەلەستەن مەكسيكالىق انتونيو كارباحال, نەمىس لوتار ماتتەۋس جانە يتاليان دجانلۋيدجي بۋففون اسىپ ەدى.
* چەمپيوناتتا كۇش سىناساتىن فۋتبولشىلاردىڭ 53-ءى بۇعان دەيىن جاھاندىق جارىستاردا گول سوققان. بۇلاردىڭ اراسىندا 10 گولدىڭ اۆتورى اتانعان گەرمانيالىق توماس ميۋللەر ءبىرىنشى ورىندا. ال كولۋمبيالىق حامەس رودريگەستىڭ ەنشىسىندە 6 گول بار, اۆستراليالىق تيم كەحيلل, ارگەنتينالىقتار گونسالو يگۋاين مەن ليونەل مەسسي, ۋرۋگۆايلىق لۋيس سۋارەس ءوز ەسەپتەرىنە 5 گول جازعان.
* 45 جىل جانە 5 اي – ەگيپەتتىك ەسسام ءال-حاداري وسىنشا جاسقا كەلۋىمەن بۇل عانا ەمەس, بۇكىل الەم چەمپيوناتتارى تاريحىنداعى ەڭ «كارى» فۋتبولشى بولعالى تۇر. ول تەك ويىنشىلار عانا ەمەس, اليۋ سيسسە (سەنەگال), ملادەن كرستايچ (سەربيا) جانە روبەرتو مارتينەس (بەلگيا) سەكىلدى جاتتىقتىرۋشىلاردان دا ۇلكەن.
* چەمپيوناتتاعى ەڭ جاس ويىنشى – اۆستراليا قۇراماسىنىڭ ۆينگەرى دەنيەل ارزاني. ول 19-دان 5 اي عانا اسقان.
* بۇعان دەيىن رافاەل ماركەس پەن ارگەنتينالىق حاۆەر ماسكەرانو الەم چەمپيوناتىنىڭ 16 ماتچىندا ويناعان. بۇلاردان كەيىن ليونەل مەسسي (15), مەسۋت وزيل (14), توماس ميۋللەر, مانۋەل نويەر, يسپانيالىق سەرحيو راموس جانە پورتۋگاليالىق كريشتيانۋ رونالدۋ (13-تەن) كەلەدى.
* ەڭ ۇزىن ويىنشى – حورۆاتيا قاقپاشىسى لوۆرە كالينيچ. ونىڭ بويى – 201 سم.
* پانامالىق رومان توررەس 99 كگ سالماقپەن ەڭ اۋىر سالماقتى فۋتبولشى بولىپ وتىر.