استانادا بىرنەشە كۇن بۇرىن قار جاۋىپ, ارتى جاڭبىرعا ۇلاسقان بولاتىن. سونىڭ سالدارىنان كوشەلەر مەن تروتۋارلار كوكتايعاققا اينالدى. ءوز كەزەگىندە ەلوردا اكىمدىگى 17-19 قازان كۇندەرى استانا قالاسى مەن اقمولا وبلىسىندا دابىلدى ەسكەرتۋ جاريالانعانىن حابارلادى.
سينوپتيكتەردىڭ بولجامىنا سايكەس, 17-19 قازان ارالىعىندا استانادا كوكتايعاق, تۇمان بولادى, جەل وڭتۇستىك-باتىستان 15-20 م/س ەكپىنمەن سوعادى.
استانا اكىمدىگىنىڭ حابارلاۋىنشا, قالانىڭ كوممۋنالدىق قىزمەتى قىس ماۋسىمىنا ساقاداي ساي. قازىرگى ۋاقىتتا ەلوردا كوشەلەرىن قاردان تازارتۋ ءۇشىن 2 مىڭنان اسا تەحنيكا دايىن تۇر. ال قالانى تازالاۋ جۇمىستارىنا 2500 جۇمىسشى جۇمىلدىرىلادى. ياعني, الماتى اۋدانىنا – 578, بايقوڭىر اۋدانىنا – 283, ەسىل اۋدانىنا – 526, سارىارقا اۋدانىنا – 437 ارنايى تەحنيكا قاراستىرىلعان. قورىتا ايتقاندا, ەلوردالىق كوممۋنالدىق قىزمەتتە كىدىرىس جوق. ءبىر ايتا كەتەرلىگى, باس قالامىزدا ءار اۋلانىڭ تازالىعىمەن پيك ەمەس, اۋدان اكىمدىگى تىكەلەي اينالىسادى.
استانادا داۋىلدى ەسكەرتۋ جاريالانعاننان كەيىن جۇمىسشىلار تاڭالاكەۋىمنەن قىزمەتتەرىنە كىرىستى. كوكتايعاقتىڭ الدىن الۋ ءۇشىن ءبىراز كوشەگە قۇم ارالاس تۇز سەبىلدى. سينوپتيكتەردىڭ بولجامى بويىنشا, بيىلعى قىس ەلىمىزدە ەرتە ءتۇسىپ, ەرەكشە قارلى بولماق.
