كوزى تىرىسىندە-اق اتى اڭىزعا اينالعان قالامگەر, رەداكتورلاردىڭ رەداكتورى, حالقىنىڭ قايعىسىنا جانى اۋىرىپ, ەلىنىڭ قۋانىشىن ءوز باقىتىنداي كورگەن, ۇلت بولاشاعى مەن باقىتى ءۇشىن كۇرەسىپ وتكەن قايراتكەر شەرحان مۇرتازا دۇنيە سالدى وتكەن اپتادا.
جەتى كۇندىك اسى دا كەلدى, مىنە.
شەرحانداي الىپتىڭ قازاسى ۇستىندە قالىڭ قازاعى عانا قايعىرعانداي كورىندى بىزگە. ونىڭ وزىندە نەگىزىنەن, قازاق تىلىندە وقىپ, قازاقشا سويلەيتىن قازاقتار عانا. «قازاقستان» تەلەارناسى, قازاقشا گازەتتەر, قازاقشا سايتتار, الەۋمەتتىك جەلىلەردەگى قازاقتار ءبىر-بىرىنە كوڭىل ايتىپ, كۇڭىرەنىپ جاتتى…
ەلباسى ن.نازارباەۆ تۋعان-تۋىستارىنا كوڭىل ايتۋ جەدەلحاتىن جولداپ, تاۋەلسىز مەملەكەتتىڭ ىرگەتاسىن قالاعان جىلداردا جانىندا ءجۇرىپ, ەلدى ىلگەرىلەتۋ ىسىنە زور ۇلەس قوستى دەپ باعا بەرگەن شەرحان
مۇرتازا قازاقتىڭ عانا قاستەرلى تۇلعاسى ما ەدى؟..
نەگە بۇل قازادا قازاق قانا قارا جامىلدى؟ نەگە قادىرلى تۇلعامىزدى قازاق قانا جوقتادى؟
ءيا, قازاق جۋرناليستيكاسىنىڭ پاتريارحى, اتاسى دۇنيەدەن وتكەندە ەلىمىزدەگى بارشا اقپارات قۇرالدارى قايعىعا ورتاقتاسا الماعانى وكىندىرەدى.
قايران قازاق ماڭدايىنىڭ جۇلدىزى جارقىراپ, ەلىنە قىزمەت ەتكەندەردى تىلىنە دە, تۇسىنە دە, ناسىلىنە دە قاراپ الالاعان ەمەس. مانەرلەپ سىرعاناۋشى دەنيس تەن دۇنيەدەن وزعاندا ونى ءوز بالاسىنداي كورىپ بوزداعان قازاق ايەلدەرى قانشاما؟! نەمىس ۇلتىنىڭ وكىلى گەرولد بەلگەردى «گەر-اعا» دەپ, كوپشىلىك توبەسىنە كوتەردى. ال لاۋازىمدى قىزمەتتەر اتقارعان سەرگەي دياچەنكونى فاريزاداي اڭىزعا اينالعان قازاق اقىنى جەرلەنگەن ۇلتتىق قورىمعا قاتار جاتقىزدى…
«قازانى بولەكتىڭ قايعىسى بولەك» دەگەن بار. قازاقستاننىڭ ورتاق قازانىنان اس ءىشىپ وتىرعان حالىقتىڭ ءبارىنىڭ قايعىسى دا, قۋانىشى دا ءبىر بولۋعا ءتيىس ەدى عوي…
ءبىزدىڭ قازانىمىز ورتاق. بىراق قايعىمىز نەگە بولەك؟
