جۋىردا نۇر-سۇلتان قالاسىندا استانادا تۇراتىن بەلگىلى سۋرەتشىلەر مەن قولدانبالى ونەر شەبەرلەرىنىڭ «كوكتەمگى سەرۋەن» اتتى كورمەسى اشىلدى.
ناۋرىز مەرەكەسىنە وراي قر قك اسكەري-تاريحي مۋزەيىندە ۇيىمداستىرىلعان كورمەگە وتىز بەس سۋرەتشىنىڭ جۇزگە جۋىق تۋىندىلارى قويىلدى. ولاردىڭ قاتارىندا بەينەلەۋ ونەرىنىڭ بەلگىلى وكىلدەرى ك.مۋللاشەۆ, س.ماحانبەت, ۆ.پيروجكوۆ, م.تۇقسايتوۆ, ا.باياندين, ە.ايتۋاروۆ, م.بايتەنوۆ, ت.باتانوۆ, ر.احمەتجانوۆا جانە تاعى باسقالار بار.
سونداي-اق كورمەدەن گ.جۇرقاباەۆا, ا.اۋباكىروۆا, ا.مينايداروۆا, ا.ءالي سياقتى جاس تالانتتاردىڭ شىعارمالارىن دا تاماشالاۋعا بولادى. استانالىق قىلقالام شەبەرلەرى ءوز تۋىندىلارىندا ۇلتتىق مادەنيەت پەن باي سالت-ءداستۇردىڭ تابيعاتىن ءارتۇرلى جانر مەن مانەردە بارىنشا اشىپ كورسەتە بىلگەن.
سىرتتاعى بوران مەن داۋىلعا قاراماستان كورمەگە كەلگەن كوپشىلىكتىڭ كوكتەمگى كوڭىل-كۇيگە بولەنىپ, جاقسى اسەر الىپ قايتقاندارى انىق.
