ەلوردادا UFC جۇلدىزى, جاستاردىڭ سۇيىكتى سپورتشىسى حابيب نۋرماگومەدوۆتىڭ قاتىسۋىمەن كوپتەن كۇتكەن سپورت كلۋبى اشىلدى.
قالا اكىمدىگىنىڭ «استانا جاستارى» جاستار رەسۋرستىق ورتالىعى ەلوردانىڭ جاستار ساياساتى ماسەلەلەرى جونىندەگى باسقارماسىمەن بىرلەسە اشقان «Profit» اۋلا كلۋبى حالىقتىڭ الەۋمەتتىك وسال توپتارىن قولداۋعا ارنالعان.
– بۇل سپورت كلۋبىن 2019 جىلى «اگروگورودوك» اۋدانىندا اشۋ تۋرالى ۇسىنىستار ايتىلعان ەدى. مىنە, بۇگىن كلۋبتى اشۋعا الەمدىك دەڭگەيدەگى سپورتشى حابيب نۋرماگومەدوۆتىڭ قاتىسۋى ءبارىمىز ءۇشىن ۇلكەن تاريحي ءسات بولدى, – دەيدى «استانا جاستارى» جرو جەتەكشىسى شىڭعىس تىلەۋلين.
الەۋمەتتىك كاسىپكەر الميرا بورامباەۆانىڭ ايتۋىنشا, كلۋب مەكتەپتەرمەن بىرگە جۇمىس ىستەپ, پەداگوگتارمەن بايلانىستى بولادى. مۇندا كوپبالالى, الەۋمەتتىك از قامتىلعان وتباسىلاردان شىققان بالالار جانە جەتىمدەر مەن اسىراۋشىسى جوق بالالار تەگىن جاتتىعاتىن بولادى.
– الەۋمەتتىك پەداگوگتار تىزىمىندە تۇرعان بالالاردى كلۋبقا شاقىرامىز. كلۋبتار الەۋمەتتىك ماڭىزدى اۋدانداردا ورنالاسقان. قازىرگى بالالار ەرەكشە ءپىر تۇتاتىن سپورتشىنى كلۋبتىڭ اشىلۋىنا شاقىرىپ, وعان تۇساۋكەسەر ءراسىمىن جاساتۋ ارقىلى جاڭا جوباعا ەلدىڭ نازارىن كوبىرەك اۋدارۋدى كوزدەدىك. ءبىزدى قولداپ, كەلىسىمىن بەرگەن اتاقتى سپورتشىعا العىس بىلدىرەمىز, – دەيدى كاسىپكەر.
«Profit» ورتالىعىنىڭ اتالعان فيليالىندا 550 بالا تىركەلگەن. اشىلۋ سالتاناتىنا سولاردىڭ ىشىنەن 10 جاستان جوعارى 100-120 بالا قاتىستى.
بايان اسىلبەكوۆا
