ەلوردانىڭ الماتى اۋدانى اكىمدىگى جانە وسى اۋداننىڭ بەلسەندى ءومىر ءسۇرۋ ورتالىعىنىڭ قولداۋىمەن الماتى اۋدانىنىڭ ارداگەرلەرى اراسىندا شاحماتتان تۋرنير ءوتتى. اۋداندىق ارداگەرلەر كەڭەسى ۇيىمداستىرعان جارىس ەلىمىزدىڭ كونستيتۋتسياسى كۇنىنە ارنالدى.
جارىستى الماتى اۋدانى ارداگەرلەر كەڭەسىنىڭ توراعاسى مارات مۇستافين جانە «بەلسەندى ءومىر ورتالىعى» كوممۋنالدىق مەملەكەتتىك مەكەمەسىنىڭ ديرەكتورى مۇحتار ەركەتاەۆ اشتى.
اتالمىش ءتۋرنيردى اۋداندىق ارداگەرلەر كەڭەسى جىل سايىن وتكىزەدى. وعان جاس بويىنشا شەكتەۋ قويىلماي, ءبارى قاتىسا الادى. وسى جولى 89 جاسار كليمەنتي تساي, كوبەس امىشەۆ جانە 75 جاستاعى سۇلۋشاش ەسەنباەۆا ەڭ ۇلكەن قاتىسۋشىلار بولدى. ولارعا ويىنعا بەلسەندى قاتىسقاندارى ءۇشىن العىس حات پەن باعالى سىيلىق تاپسىرىلدى. ال ورىن الا الماعاندارعا ەستەلىك سىيلىق تابىستالدى.
ەرلەر اراسىندا ءبىرىنشى ورىندى سەرىك قۋانىشباەۆ, ەكىنشى ورىندى تۇرسىن قادىرباەۆ, ءۇشىنشى ورىندى سوۆەت كەلدىباەۆ يەلەندى. ايەلدەر اراسىندا جۇلدەلى ورىنداردى سايكەسىنشە كەنجەتاي جانۇزاقوۆا, سۇلۋشاش ەسەنباەۆا جانە ءباتيما ءتۇسىپوۆا الدى.
شاحمات ءتۋرنيرى «ارقا اۋەندەرى» حالىق ءانسامبلى, «ەلوردا» حالىق حورىنىڭ سوليستەرى ءۇمىتجان قيقىموۆا مەن ەرمەك تۇرلىباەۆتىڭ مۋزىكالىق نومەرلەرىمەن جانە ەسكەندىر حاسانعاليەۆتىڭ «اتامەكەن» انىمەن اياقتالدى.
