«استانا اقشامى» گازەتىندە ۇزاق جىل قىزمەت ىستەگەن, ەلىمىزدىڭ اقپارات-ءباسپاسوز سالاسىندا 40 جىل تەر توگىپ, وسى سالانىڭ وركەندەپ دامۋىنا ءوز ۇلەسىن قوسقان مايتالمان جۋرناليست تاڭاتار ابدوللاۇلى تولەۋعاليەۆ «اقپارات سالاسىنىڭ ۇزدىگى» توسبەلگىسىمەن ماراپاتتالدى. توسبەلگىنى «Elorda Aqparat» جشس ديرەكتورى ولجاس سىدىقبەك تابىس ەتتى.
تاڭاتار تولەۋعاليەۆ جۋرناليستىك سالادا قىرىق جىل قىزمەت ىستەدى. ەڭبەك جولىن وبلىستىق «ورال ءوڭىرى» گازەتىندە كوررەكتور بولىپ باستاعان ول وسى باسىلىمدا ءتىلشى, اعا ءتىلشى, ءبولىم مەڭگەرۋشى بولدى. باتىس قازاقستان وبلىسى اكىمى جانىنداعى قازاقستان حالقى كىشى اسسامبلەياسى حاتشىلىعىندا كەڭەسشى بولىپ قىزمەت ىستەدى.
ءجۋرناليستىڭ شيرەك عاسىرلىق ءومىرى ەلوردامىز – نۇر-سۇلتان قالاسىنىڭ تىنىس-تىرشىلىگى, ءوسىپ-وركەندەۋىمەن تىكەلەي بايلانىستى. 1998 جىلى ەلورداعا كوشىپ كەلىپ, «استانا اقشامى» گازەتىنە جۇمىسقا تۇردى. قالامىنىڭ قارىمىن تانىتىپ, استانالىق باسىلىمنىڭ ءبولىم مەڭگەرۋشىسى, باس رەداكتوردىڭ ورىنباسارى قىزمەتتەرىن اتقاردى. بۇدان كەيىن «استانا» جۋرنالى, استانا قالاسى تىلدەردى دامىتۋ باسقارماسى, «قازاقستان تەمىرجولشىسى» گازەتى, «كازكونتەنت» اكتسيونەرلىك قوعامىندا باسشىلىق قىزمەتتەر اتقاردى. كەيىن «استانا اقشامى» گازەتىنە قايتىپ ورالىپ, سودان بەرى ەلوردانىڭ باس باسىلىمى ارقىلى قالانىڭ دامۋىنا وزىندىك ۇلەسىن قوسىپ كەلەدى. «استانا اقشامى» گازەتىندە «قۇقىق» بەتىن جۇرگىزىپ, قوعامدا ورىن الىپ جاتقان كەلەڭسىز جاعدايلاردى قالامىمەن تۇيرەپ, سودان ساقتانۋعا شاقىردى. اقىندىعىمەن دە تانىلعان ارىپتەسىمىزدىڭ قازىرگە دەيىن ەكى كىتابى (پوەزيالىق جانە پۋبليتسيستيكالىق) جارىق كوردى.
