دۇنيەجۇزىنىڭ ەلۋ ساۋلەتشىسى ەحرو–2017 كورمە كەشەنى مەن سيمۆولىنا ءوز نوبايلارىن ۇسىندى. سەيسەنبى كۇنى مەملەكەت باسشىسى نۇرسۇلتان نازارباەۆ استاناداعى «كورمە» ورتالىعىنا قويىلعان حالىقارالىق مامانداندىرىلعان كورمە كەشەنىنە ۇمىتكەر جوبالاردىڭ ەسكيز-يدەيالارىمەن تانىستى. ال, ەلوردا تۇرعىندارى ءسانى مەن سالتاناتى كەلىسكەن نەبىر ساۋلەت جوبالارىن بۇگىن جانە ەرتەڭ تاماشالاي الادى.
ەحرو–2017 كورمە كەشەنىنىڭ ەڭ ۇزدىك ەسكيز – يدەياسى, سونىڭ ىشىندە ەحرو–2017 نىسانىنىڭ سيمۆولى بولاتىن حالىقارالىق ساۋلەت بايقاۋى 18 شىلدە كۇنى اياقتالعان ەدى. جۇزگە جۋىق ءوتىنىم تۇسكەن بايگەدە اۆستريا, اۆستراليا, ۇلىبريتانيا, گەرمانيا, يسپانيا, يتاليا, كانادا, قىتاي, اقش, جاپونيا, فرانتسيا جانە تاعى باسقا ەلدىڭ ماماندارى باق سىنادى. ولاردىڭ ىشىندە ەلوردانىڭ ساۋلەت ونەرىنە دە ەرەكشە قولتاڭباسىن قالدىرعان «قازاقستان» كونتسەرتتىك زالى يدەياسىنىڭ اۆتورى مانفرەدو نيكولەتتي, وقۋشىلار سارايىن جوبالاعان سانكت-پەتەربۋرگ قالاسىنىڭ «ستۋديا-44» ساۋلەت شەبەرحاناسى جانە «حان شاتىر» ساۋدا ويىن -ساۋىق ورتالىعىنىڭ باس مەردىگەرى تۇركيانىڭ «سەمبول» قۇرىلىس كومپانياسى بار.
«كورمە» ورتالىعىنا قويىلعان جوبانىڭ بارلىعى قايتالانباس ساۋلەتىمەن ەرەكشەلەنەدى. قاي-قايسىسى بولماسىن «بولاشاقتىڭ ەنەرگياسى» تاقىرىبىن اشۋدى ماقسات ەتكەن. ەحرو قالاشىعىنىڭ اۋماعى 173 گەكتار دەيتىن بولساق, ونىڭ 25 گەكتارىنا ۇزدىك كورمە كەشەنى ورنالاسادى.
بايقاۋعا قاتىسۋشى جوبالاردى ارنايى تەحنيكالىق كەڭەستىڭ قۇرامى سارالادى. كەڭەس جەتەكشىسى – اقش-تىڭ ەكونوميكالىق ۇردىستەردى زەرتتەۋ قورىنىڭ پرەزيدەنتى, ەكونوميست دجەرەمي ريفكين. تەحنيكالىق كەڭەس قۇرامىنداعى ەلىمىزدىڭ قۇرمەتتى ساۋلەتشىسى ساعىندىق جانبولاتوۆ الداعى ءبىر ايدىڭ ىشىندە جوبا تاڭدالىپ, بەكىتىلگەننەن كەيىن كورمە كەشەنىنىڭ قۇرىلىسى باستالاتىنىن ايتتى. «ون ءۇش ادامنان جاساقتالعان كەڭەس قۇرامىندا شەتەلدىك ارىپتەستەرىمىز دە بولدى. ەيكە ۆەبەر, مارسەل ۆولكەرتس, نۋنو دەلگادو, توماس كەرۆين جانە وتاندىق ساۋلەتشىلەردىڭ قاتىسۋىمەن كونكۋرسقا كەلىپ تۇسكەن جوبالاردى شىنايى باعالاۋعا تىرىستىق. جالپى جۇمىستاردىڭ دەڭگەيىن وتە جوعارى باعالايمىن. دەگەنمەن, ءالسىز ەسكيزدەر دە ءتۇسىپ جاتتى. ەڭ ۇزدىك «وندىققا» نەعۇرلىم ەنەرگوۇنەمدى جوبالاردى تاڭداپ الدىق. ويتكەنى, كەشەن كورمە تاقىرىبىنا ساي, ءارى كونكۋرستىڭ بارلىق تالاپتارىنا جاۋاپ بەرۋ كەرەك» دەيدى س.جانبولاتوۆ. ياعني, نىساننىڭ سىرتقى كورىنىسىنىڭ سۇلۋلىعى عانا ەمەس, ەلەكتر قۋاتىنىڭ ساقتالۋى, ۇنەمدىلىگى سياقتى ينجەنەرلىك-تەحنيكالىق جۇمىستاردىڭ ارتىقشىلىعىنا ءمان بەرۋ كوزدەلۋدە.
بايقاۋدا ەلىمىزدىڭ ساۋلەتشىلەرىنەن قازاقستاننىڭ قالاسالۋشىلار وداعى, «KAZGOR» جوبالاۋ اكادەمياسى, قازاقستان ديزاينەرلەرى وداعىنىڭ مۇشەسى تيمۋر سۇلەيمەنوۆ, قازاقستان ساۋلەتشىلەر وداعىنىڭ ساۋلەتشىسى ساكەن نارىنوۆتىڭ شەبەرحاناسى جانە تاعى باسقالارى باق سىناۋدا.
تەحنيكالىق كەڭەستىڭ تانىمال ساۋلەتشىلەرى جانە ورنىقتى دامۋ مەن ەنەرگيانى ۇنەمدەۋ سالاسىنىڭ بىلىكتى ماماندارى ەڭ ۇزدىك دەپ تاپقان ەسكيز-يدەيا اۆتورىنا 150 مىڭ اقش دوللارىن قۇرايتىن جۇلدە قورى بەرىلەدى. بايقاۋ قورىتىندىسى قىركۇيەك ايىندا شىعارىلادى.
گۇلميرا ايماعانبەت
ۋىز لەبىز
الىشەر پىرمەتوۆ,
«استانا ەكسپو-2017» ۇلتتىق كومپانياسى»
اق باسقارما توراعاسىنىڭ ورىنباسارى:
– كورمە كەشەندەرىن جوبالاۋعا الەمدىك دەڭگەيدەگى ۇزدىك ساۋلەت شەبەرلەرلەرى قىزىعۋشىلىق تانىتتى. ولاردىڭ ىشىندە 2015 جىلى ميلاندا وتەتىن EXPO كورمەسى جوباسىنىڭ اۆتورى ستەفانو بوەري, 2020 جىلى سان-پاۋلودا وتەتىن EXPO -2020 جوباسىنىڭ اۆتورى GMP International SP ساۋلەت كومپانياسى, 2008 جىلعى وتكەن كورمەدە ساراگوسا كوپىرىنىڭ جوباسىن جاساعان زاحا حاديد جانە تاعى باسقالارى بار. EXPO وتكىزۋشى ءاربىر ەل وزىندىك سيمۆولىمەن ەرەكشەلەنەدى. استانادا وتەتىن كورمەدە بولاشاقتىڭ ەنەرگياسى بولاتىن سيمۆولدى قاراستىرۋدامىز.
قاناعات تىلەمىسوۆ,
قۇرمەتتى قۇرىلىسشى, «استانا ەكسپو-2017»
ۇك» اق باسقارما توراعاسىنىڭ قۇرىلىس جونىندەگى كەڭەسشىسى:
– بالامالى ەنەرگيا كوزدەرىن دامىتۋ بۇگىنگى كۇننىڭ باستى تالابىنا اينالدى. وسى توڭىرەكتە بايقاۋعا قاتىسۋعا نيەت بىلدىرگەن ساۋلەتشىلەر مەن قۇرىلىسشىلاردىڭ ەڭبەگىن قۇپتايمىن.
ساۋلەت ونەرىندە تۇراقتىلىق دەگەن بولادى. ياعني, ورلەۋ جولىنا تۇسكەن قالانىڭ تۇراقتى بەينەسىن ساقتاي ءبىلۋ كەرەك. «سىرلى اياقتىڭ سىرى كەتسە دە, سىنى كەتپەيدى» دەگەندەي, ءوزىنىڭ ادىلدىگىن پاش ەتەتىن ۇزدىك جوبا كەشەنى ۋاقىت وتكەن سايىن ەرەكشەلىگىن جوعالتپاۋى ءتيىس دەپ ويلايمىن.
