استانادا ولشەۋسىز شىعارماشىلىق ەڭبەگىمەن ەلوردامىزدىڭ قالىپتاسۋىنا جانە دامۋىنا ۇلەس قوسقان, جارىق دۇنيەدەن ەرتە ءوتىپ كەتكەن كورنەكتى قالامگەر-جۋرناليستەردى ەسكە الۋعا ارنالعان «ولاردىڭ ەسىمدەرى ءبىزدىڭ جۇرەگىمىزدە» – «ۆ پامياتي ناشيح سەردتساح» اتتى كەش ءوتتى.
«قازمەديا» ورتالىعىنىڭ كينو-كونتسەرت زالىنا جينالعان قاۋىمعا «تۇمار» جۋرنالىنىڭ باس رەداكتورى بولعان فاريزا وڭعارسىنوۆا, «جاڭا سارىارقا» جۋرنالىنىڭ باس رەداكتورى نۇرعوجا وراز, «استانا اقشامى» گازەتى باس رەداكتورىنىڭ ورىنباسارى ديداحمەت ءاشىمحانۇلى, «الەم ادەبيەتى» جۋرنالىنىڭ باس رەداكتورى كەڭەس يۋسۋپوۆ, «ەگەمەن قازاقستان» گازەتىنىڭ شولۋشىسى مارات اققۇل, قر «تەلەراديو كەشەنىنىڭ» رەداكتورى سماعۇل راحىمبەك, «حابار» اگەنتتىگىنىڭ تىلشىلەرى ازامات قالىمبەتوۆ پەن سەرگەي ناسىروۆ, الەكسەي پان, ەرلان اقمۇرزين, ولگا لاتىنينا, ايجان جۇماباەۆا, سەمباي قيسىمۇلى, سۆەتلانا گاليەۆا, ءاليا ءجۇسىپوۆا سىندى بەلگىلى جۋرناليستەردىڭ ءومىر جولى, شىعارماشىلىق جەتىستىكتەرى تۋرالى ەستەلىكتەر ايتىلىپ, بەينەشولۋلار كورسەتىلدى. ايتۋلى جۋرناليستەر قىزمەت اتقارعان ۇجىمدار دا وسى شاراعا ارنايى شاقىرىلعان وتباسى مۇشەلەرىنە سىي-سياپات ۇسىنىپ, قۇرمەت ءبىلدىردى.
استانا قالاسى اكىمىنىڭ ورىنباسارى ەرمەك امانشاەۆ ەلوردامىزدىڭ 20 جىلدىعىنا ارنالعان يگىلىكتى ءىس-شارالاردىڭ باسى وسىنداي تاعىلىمدى دا مازمۇندى ەسكە الۋ كەشىمەن باستالىپ وتىرعانىن ماڭىزدى ەكەنىن اتاپ ءوتتى. استانامىزدىڭ دامۋىنا وزدەرىنىڭ شىعارماشىلىق تالانتتارى ارقىلى ەرەكشە ۇلەس قوسقان وسىنداي ەل ازاماتتارىن ەلوردا اكىمدىگى ەستەن شىعارمايتىنىن ءارى ولاردىڭ اسىل ەسىمدەرىن ۇلىقتاۋعا قاشاندا قولداۋ بىلدىرەتىنىن ايتىپ, وسى شارانى ۇيىمداستىرۋعا باستاماشىل بولعان ازاماتتارعا ريزاشىلىعىن ءبىلدىردى.
كەش بارىسىندا جارىققا شىعا باستاعانىنا 27 جىل تولعان «استانا اقشامى» گازەتىندە باس رەداكتوردىڭ ءبىرىنشى ورىنباسارى بولىپ جەمىستى ەڭبەك ەتكەن ديداحمەت ءاشىمحانۇلىنىڭ زايىبى ليزا ساياقىزىنا «ەلوردا اقپارات» مەديا رەسۋرسى اتىنان اتا داستۇرمەن قامزول كيگىزىلىپ, گۇل شوقتارى ۇسىنىلدى.
– بۇل شارا ەلباسىمىز نۇرسۇلتان نازارباەۆتىڭ باستاماسىمەن جۇزەگە اسىرىلىپ جاتقان «رۋحاني جاڭعىرۋ» باعدارلاماسى اياسىندا جانە استانا قالاسىنىڭ 20 جىلدىعىنا وراي وتكىزىلىپ وتىر. جۋرناليست قاي ۋاقىتتا بولسىن قوعامدىق ماڭىزى ەرەكشە شىعارماشىلىق يەسى بولىپ قالا بەرمەك. سوندىقتان استانامىزدىڭ دامۋىنا وزىندىك ۇلەس قوسا بىلگەن, وزدەرىنىڭ سوڭىنان ايشىقتى ءىز قالدىرعان جۋرناليستەردى ەسكە الىپ وتىرۋدى وزىمىزگە پارىز سانادىق. وسى شارانى وتكىزۋگە قولداۋ بىلدىرگەن استانا قالاسىنىڭ اكىمدىگىنە, قر مادەنيەت جانە سپورت مينيسترلىگىنە, تۇڭعىش پرەزيدەنت-ەلباسى قورىنا, «قازمەديا» ورتالىعىنا, «باس رەداكتورلار كلۋبىنا», «ۇلى دالا قىراندارى» رەسپۋبليكالىق قوزعالىسىنا العىسىمىز شەكسىز, – دەدى ايتۋلى شارانىڭ ۇيىمداستىرۋشىسى سادىبەك تۇگەل.
ەسكە الۋ شاراسى اياسىندا تاقىرىپتىق-قايىرىمدىلىق كونتسەرت ءوتتى.
عالىم قوجابەكوۆ
