سارىارقا اۋدانىنىڭ اكىمى ەسەت بايكەن شىدەرتى كوشەسى جانە «كوكتال-1» تۇرعىن الابىنداعى بايقوڭىر كوشەسىن ارالادى. اتالمىش كوشەلەردىڭ تۇرعىندارىمەن كەزدەسىپ, بىرقاتار ماسەلەلەردى تالقىلادى.
اكىمنىڭ ايتۋىنشا, شىدەرتى كوشەسىندەگى ماڭىزدى ماسەلەلەر – كوشەنى جوندەۋ, نوسەر كارىزىن سالۋ, جارىقتاندىرۋ. بۇل ماسەلەلەردى كەلەسى جىلى كەشەندى تۇردە شەشۋ جوسپارلاندى. ەڭ الدىمەن ينجەنەرلىك جەلىلەر سالىنىپ, كارىز جۇيەلەرىن رەتتەگەننەن كەيىن كوشەگە اسفالت توسەلەتىن بولادى. اۋدان باسشىسى جىل سوڭىنا دەيىن كوشەنى جارىقتاندىرۋدى تاپسىردى. وسى كوشەنىڭ بويىندا بالالار ويىن الاڭىن سالۋ ءۇشىن جەر ۋچاسكەسى قاراستىرىلاتىن بولدى.
– تۇرعىنداردى الاڭداتاتىن تاعى ءبىر ماسەلە – گازداندىرۋ. شىدەرتى كوشەسىن گازعا قوسۋ قاراشا ايىنىڭ ورتاسىنا جوسپارلانۋدا, – دەدى ە.بايكەن.
ال بايقوڭىر كوشەسىندەگى ماڭىزدى ماسەلەنىڭ ءبىرى – كارىز جۇيەسى. مۇنى جايلاستىرۋ كولىك جانە جول-كولىك ينفراقۇرىلىمىن دامىتۋ باسقارماسىمەن بىرلەسىپ شەشۋ جوسپارلانۋدا.
– الداعى ۋاقىتتا ءتيىستى قىزمەتتەرمەن كەزدەسىپ, اتالمىش ماسەلەنى جەدەل ءارى ناتيجەلى شەشۋ جولدارىن قاراستىرامىز, – دەدى اۋدان باسشىسى.
كەزدەسۋ كەزىندە وسى كوشەنىڭ تۇرعىندارى تروتۋار سالۋ, قوقىس كونتەينەرلەرىنىڭ ورنىن اۋىستىرۋ, باعدارشام ورناتۋ, اعاش ەگۋ سياقتى بىرقاتار ماسەلەلەردى كوتەردى. بارلىق ماسەلەلەر بويىنشا شارالار جوسپارى ازىرلەنىپ, باقىلاۋعا الىندى.
