ءىىى دۇنيەجۇزىلىك كوشپەندىلەر ويىنى قىرعىز ەلىندە دۇبىرلەتىپ ءوتتى. بايراقتى باسەكەدە 74 مەملەكەتتىڭ ەكى مىڭعا جۋىق سپورتشىسى 37 سپورت ءتۇرى بويىنشا باق سىنادى.
ءدۇبىرلى دودادا 72 مەدالدى قورجىنعا سالعان قازاقستان سپورتشىلارى جالپى كوماندالىق ەسەپتە ەكىنشى ورىندى قانجىعالادى. ونىڭ 18-ءى – التىن, 24-ءى – كۇمىس, 30-ى قولا بولدى. ال ءبىرىنشى ورىندى 103 مەدالمەن قىرعىزستان يەلەنسە, ءۇشىنشى ورىن 56 مەدالمەن رەسەيلىك سپورتشىلارعا بۇيىردى.
وسىعان وراي كوشپەندىلەر ويىنىن قورىتىندىلاۋ ماقساتىندا كەشە قر ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان مەن مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى جونىندەگى كوميتەتىنىڭ توراعاسى سەرىك جاراسباەۆ ءباسپاسوز ءماسليحاتىن وتكىزدى. جيىندا الەۋمەتتىك جەلىلەردە قىزۋ تالقىلانعان قازاق كوكپارشىلارىنىڭ ماسەلەسى دە ءسوز بولدى.
– ءبىزدىڭ كوكپارشىلاردىڭ جەڭىلگەنى وسىنشالىقتى ۇلكەن داۋ بولعانىنا تاڭ قالىپ وتىرمىن. ءيا, ارينە, كوكپار – قازاقتىڭ ەجەلدەن كەلە جاتقان ۇلتتىق ويىنى. بىراق جاپون بالۋاندارى وزدەرىنىڭ دزيۋدو سپورتى بويىنشا قازاق بالۋانىنان ۇتىلعاندا نەمەسە فۋتبول وتانى برازيليا اياقدوپشىلارى باسقا ەلگە جول بەرگەندە ولاردىڭ حالقى نەگە داۋرىقپادى؟ ونىڭ ۇستىنە كوشپەندىلەر ويىنىنا ءبىزدىڭ كوكپارشىلاردىڭ جاستار قۇراماسى بارىپ, ەرەسەكتەرگە قارسى ونەر كورسەتكەن بولاتىن. سوعان قاراماستان سپورتشىلارىمىز ەلدى جەرگە قاراتپادى, كوماندالىق ەسەپتە ءۇشىنشى ورىندى يەلەندى. ەگەر ەرەسەكتەر قۇراماسىن اپارعانىمىزدا ولار ءسوزسىز جەڭىسكە جەتەر ەدى. سوندىقتان بۇعان تۇسىنىستىكپەن قاراۋ كەرەك, – دەگەن بەكبولات تىلەۋحان ءسوز اراسىندا ۇلتتىق سپورتتى دامىتۋعا لايىقتى ازامات بولسا, ءوزىنىڭ ورنىن بوساتۋعا دايىن ەكەنىن اشىق ايتتى.
ال ءوز كەزەگىندە سەرىك جاراسباەۆ ءىىى دۇنيەجۇزىلىك كوشپەندىلەر ويىنىندا قازاق سپورتشىلارىنىڭ جوعارى كورسەتكىشكە قول جەتكىزگەنىن اتاپ ءوتتى. «مىسالى, وتكەن جىلى سپورتشىلارىمىز ءۇشىنشى ورىنعا تابان تىرەسە, بيىل ەكىنشى ورىندى ەنشىلەدى. بۇل دا جامان جەتىستىك ەمەس» دەدى ول.
ايتا كەتۋ كەرەك, كەلەسى دۇنيەجۇزىلىك كوشپەندىلەر ويىنى ەكى جىلدان كەيىن تۇركيادا وتكىزىلەتىن بولادى.
