ەلوردا اكىمى التاي كولگىنوۆ ءۇش اي ىشىندە 445 ادامدى قابىلدادى. نەگىزگى سۇراقتار تۇرعىن ءۇي باعدارلامالارىنا قاتىسۋ, جۇمىسقا ورنالاسۋ, بالالاردى ءبىلىم بەرۋ مەكەمەلەرىنە ايقىنداۋ, ءبىلىم الۋ جانە باسقا دا ماسەلەلەرگە قاتىستى بولدى.
اكىمنىڭ ازاماتتاردى جەكە قابىلداۋى بارىسىندا ايەلدەر مەسسەندجەردە بىرنەشە چاتتاردا تۇراتىنىن اتاپ ءوتتى. چاتتاعى ادمين تۇرعىن ۇيگە كەزەكتە تۇرۋ تۋرالى جالعان اقپارات تاراتقان. «چاتتا ەگەر ءبىز الاڭعا شىقپاساق, ءبىزدى توپتان شىعاراتىندارىن جانە دە بۇدان بىلاي ەش تۇرعىن ءۇي باعدارلاماسىنا قاتىسا المايتىندىعىمىز تۋرالى ايتىلدى. كەزەككە سايكەس پاتەر بەرىلمەيتىندىگى تۋرالى دا ايتىلدى. سول كۇنى بالام اۋىرىپ, الاڭعا شىقپادىم. الاڭعا شىقپاعانىما قۋانامىن. ولار ءبىزدى پايدالانا وتىرىپ, ءوز ماسەلەلەرىن زاڭسىز جولمەن شەشكىسى كەلدى. سودان كەيىن ادمين چاتتان شىعىپ كەتتى. قازىر مەسسەندجەرلەردە تاراتىلاتىن اقپاراتقا سەنبەيمىز, بارلىق اقپاراتتى دۇرىستاپ تەكسەرەمىز. ويتكەنى ەشكىم كەزەكتەن تىس باسپانا الا المايدى» دەپ, قالا تۇرعىنى جالعان اقپاراتتىڭ تارالۋى تۋرالى تۇسىنىك بەردى.
قالا اكىمى وسى كەزدەسۋلەردە ەرەكشە مۇقتاجدىلىعى بار بالالاردىڭ اتا-انالارىنىڭ دا ماسەلەلەرىنە دەن قويدى. وندا وڭالتۋ ورتالىقتارىنان ەم الۋ مەن ينۆاتاكسي جەتىسپەۋشىلىگى بويىنشا ماسەلەلەر كوتەرىلدى. وسى رەتتە اكىم الداعى ۋاقىتتا ەكى بىردەي وڭالتۋ ورتالىعى سالىناتىن جانە قالالىق يپپودروم اۋماعىندا يپپوتەراپيا ورتالىعى بوي كوتەرەتىنىن ايتتى. سونىمەن بىرگە ينۆاتاكسيلەردىڭ سانىن كوبەيتىپ, ەرەكشە قاجەتتىلىگى بار بالالاردى ارناۋلى بالاباقشالارعا ورنالاستىرۋ ارقىلى كوپ ماسەلەنىڭ شەشىلەتىنىن جەتكىزدى.
– جاقىندا پرەزيدەنتتىڭ تاپسىرماسىنا سايكەس «جانۇيا» وتباسى ينستيتۋتىن قولداۋ ورتالىعىن اشتىق. سول ورتالىقتا سۇراقتارىڭىزدىڭ بارىنە جاۋاپ تاباسىزدار. ءبىز دە سول جەردە تۇراقتى قابىلداۋلار وتكىزەمىز, – دەدى ا.كولگىنوۆ كەزدەسۋ سوڭىندا.
