مىندەتتى الەۋمەتتىك مەديتسينالىق ساقتاندىرۋ جۇيەسى ەنگىزىلگەن ساتتەن باستاپ ەلىمىزدە وتە قىمبات زەرتتەۋلەر مەن جوعارى تەحنولوگيالىق قىزمەتتەردى پايدالانۋ مۇمكىندىكتەرى پايدا بولدى. ويتكەنى كورسەتىلەتىن قىزمەتتەر سانى الدەقايدا كەڭەيدى جانە جوعارى تەحنولوگيالىق, زەرتحانالىق قىزمەتتەر ءتىزىمى ەنگىزىلدى.
ەڭ پايدالىسى زەرتتەۋدىڭ قوسىمشا ادىستەرى, زەرتحانالىق زەرتتەۋلەردىڭ باسقا دا تۇرلەرى, كونسۋلتاتسيالىق-دياگنوستيكالىق قىزمەتتەردى الۋدىڭ مۇمكىندىكتەرى, كت, مرت جانە ت.ب. وتە قىمبات زەرتتەۋلەر ەنگىزىلە باستادى. بۇرىن بولماعان كونسۋلتاتسيالىق-دياگنوستيكالىق قىزمەتتەرگە جەكە قاراجات ءبولىندى. سونىڭ ارقاسىندا مەديتسينالىق قىزمەت كورسەتۋ ساپاسى جاقساردى. بۇعان دەيىن ولار ەمحانالاردا جان باسىنا شاققانداعى كەشەندى نورماتيۆكە ەنگىزىلەتىن.
ءمامس ەنگىزىلگەننەن كەيىن قازاقستاننىڭ قازىرگى زامانعى دەنساۋلىق ساقتاۋ جۇيەسىندەگى قىزمەتتەر پاكەتىنە بارلىق جوسپارلى ستاتسيونارلىق كومەك, سونداي-اق وڭالتۋ ءىسى كىردى. سونىمەن قاتار قازىر قارجىلاندىرۋ سحەماسىندا مەكتەپ مەديتسيناسى مەن شۇعىل مەديتسينالىق كومەك كورسەتىلگەن. بالالار جىلىنا ەكى رەت, سونىڭ ىشىندە ءتىس دارىگەرلەرىنەن تەكسەرۋدەن وتەدى. كوپتەگەن جوسپارلى, قۇنى بىرنەشە ميلليون تەڭگە تۇراتىن جوعارى تەحنولوگيالىق وتالار قولجەتىمدى بولدى. بارلىق ەمحانالاردا قىمبات جابدىقتار, بەيىندى ماماندار بولماعاندىقتان باسقا ۇيىمدارمەن كەلىسىمشارت جاساۋ مۇمكىندىگى بار. باستى تالاپ بارلىق جەكە مەديتسينالىق كلينيكالار ليتسەنزيالانعان جانە مىندەتتى مەديتسينالىق ساقتاندىرۋ قورىنىڭ پروۆايدەرلەر تىزىلىمىندە بولۋى كەرەك.
الايدا وكىنىشكە قاراي, قارجىلاندىرۋ بويىنشا بەلگىلى ءبىر ماسەلەلەر بار. بۇل, ارينە, قوردىڭ ناشار جۇمىس ىستەيتىندىگىمەن ەمەس, حالىقتىڭ سالىمدارى ەسەپتەلگەندەي ءجۇز پايىز تۇسپەگەندىگىمەن بايلانىستى. كوپتەگەن ناۋقاستار «مەن ەمحاناعا قارالعان جوقپىن, نەگە جارنا تولەۋىم كەرەك؟» دەيدى. اقپاراتتىق-ءتۇسىندىرۋ جۇمىستارى جۇرگىزىلىپ جاتقانىنا قاراماستان ءوز ەمحانامىزدىڭ مىسالىندا ءبىز كۇن سايىن جىلدار بويى جارنا تولەمەيتىن ناۋقاستاردى (جۇمىس ىستەمەيتىندەر, ادەيى تولەمەگەندەر جانە ت.ب.) كەزدەستىرىپ كەلەمىز.
ال شىندىعىنا كەلگەندە, ءبىر ناۋقاستىڭ ءجۇز مىڭنان كوپ جالاقىسى بار بولسا, ول ءمامس ءۇشىن جىلىنا 40-50 مىڭ تەڭگە تولەي الادى دەپ سانالادى. سول ادام مەديتسينالىق كومەككە مۇقتاج بولعان ساتتە, ايتالىق, 2-3 جىلدان كەيىن وعان تولىق تەكسەرۋ قاجەت بولسا, مىسالى, مرت, كت-دان ءوتۋ, جالپى كلينيكالىق زەرتتەۋلەر, ەكگ, ۋلترادىبىستىق جانە ت.ب. تەكسەرۋلەر كەرەك جاعدايدا بۇل زەرتتەۋلەردىڭ بارلىعىنىڭ قۇنى شامامەن 200 000-300 000 تەڭگەنى قۇراۋى مۇمكىن. وسى كەزدە ءمامس جارنالارىن ۇنەمى تولەيتىن جانە «ساقتاندىرىلعان» مارتەبەسى بار ازاماتتار مەديتسينالىق قىزمەتتەر ءۇشىن قوسىمشا اقى تولەمەۋىنە بولادى.
قور انىقتاعان تاريفتەر بويىنشا ناۋقاستاردى ستاتسيونارعا ءبىر رەت جاتقىزۋ, اۋرۋحاناعا جاتقىزۋ الدىنداعى تەكسەرۋ 200 مىڭ تەڭگەدەن, كەيدە ودان دا كوپ قارجىدان اسادى. ستاتسيوناردا جاسالاتىن كەز كەلگەن وتا, ونىڭ ىشىندە جوعارى تەحنولوگيالىق وتالار, مىسالى, كوروناگرافيا قۇنى 1 ميلليون تەڭگەدەن كوپ شىعادى. قازىر مۇنداي وتالار ءمامس شەڭبەرىندە جاسالادى.
بۇرىن كت, مرت, پەت-كت, زەرتتەۋ اپپاراتتارى, قىمبات تالداۋ سياقتى جوعارى تەحنولوگيالىق مەديتسينالىق قىزمەتتەر بارلىعىنا بىردەي قولجەتىمدى بولمادى. بۇگىندە حالىقتىڭ كوپتەگەن مەديتسينالىق قىزمەتتەردى كەدەرگىسىز الاتىنىن كورىپ ءجۇرمىز. استانا قالالىق №5 ەمحانانىڭ تاجىريبەسىن الساق, ءبىزدىڭ ەمحانادا جىلىنا 60 000 ادامعا 2800 كت, 200 پەت كت, 2000 مرت, 400-دەن استام پتر تالداۋ جاسالادى ەكەن. بۇل – ءبىر جىل ىشىندەگى ءبىر عانا ەمحانا جاساعان تەكسەرۋلەر.
الايدا سۇرانىستىڭ دا كوپ ەكەندىگى جاسىرىن ەمەس, سونىمەن بىرگە مەديتسينالىق قىزمەتتەردى ۋاقتىلى پايدالانۋ, كەزەك كۇتۋ جانە ت.ب. پروبلەمالار بار. مىسالى, قوردىڭ شارتى بويىنشا پاتسيەنتتەرگە 10 كۇن ىشىندە كونسۋلتاتسيالىق-دياگنوستيكالىق قىزمەتتەر كورسەتىلۋى ءتيىس. ياعني, بەيىندى ماماندار جوسپارلى تۇردە پاتسيەنتتى 10 كۇن, ۋچاسكەلىك دارىگەر 3 كۇن ىشىندە تەكسەرۋى كەرەك. ال «جابدىقتار, اپپاراتتار بار ما, ماماندار جەتكىلىكتى مە, دارىگەرلەردىڭ قابىلداۋعا ۋاقىتى بار ما؟» دەگەن جانە ت.ب. سۇراقتاردىڭ تۋىنداۋى بولەك ماسەلە, ونى زەرتتەۋ كەرەك. ءمامس تيىمدىلىگىنە قاراي مۇنداي جايتتاردى قايتا قاراۋ قاجەت دەپ ويلايمىن. مەديتسينالىق قىزمەتتەردىڭ تاريفتەرى مەن كولەمى سايكەسىنشە ەسەپتەلۋى ءتيىس. پرەزيدەنت دەنساۋلىق ساقتاۋدى قارجىلاندىرۋدى ءجىو-ءنىڭ 5%-نا دەيىن جەتكىزۋ تۋرالى ايتتى. مۇنىڭ ءوزى وسىنداي ماقسات قويىلعانىن كورسەتەدى جانە جاقىن ارادا قارجى اعىندارى رەتتەلىپ, ءبارى تۇراقتالادى دەپ ۇمىتتەنەمىز.
التىنشاش تابۋلدينا,
№5 قالالىق ەمحانانىڭ ديرەكتورى,
استانا قالاسى ءماسليحاتىنىڭ دەپۋتاتى
