مەملەكەت باسشىسى قاسىم-جومارت كەمەلۇلى توقاەۆتىڭ «ءبىز قاراپايىم ەڭبەك ادامىنا قۇرمەت كورسەتۋىمىز قاجەت» دەگەن سوزدەرىنەن ەڭبەك ادامىنىڭ زاڭدى قۇقىقتارىن قورعاۋ, الەۋمەتتىك قولداۋ, ءومىر ساپاسىن جاقسارتۋ ارقىلى الەۋمەتتىك ادىلەتتىلىكتى قالىپتاستىرۋ مىندەتتەرى ايقىندالادى.
جىل سايىن ۇكىمەت تاراپىنان ازاماتتىق قىزمەتشىلەردىڭ جالاقىسىندا بىلىكتىلىك ساناتتارىنا قولدانىلاتىن كوەففيتسيەنتتەردى ارتتىرۋ قاراستىرىلىپ, جالاقىلارى كىشىگىرىم ءوسىپ كەلەدى. وكىنىشتىسى سول, بيۋدجەتتىك مەكەمەلەردەگى ەدەن جۋشى, اۋلا تازالاۋشى, سانتەحنيك, پلوتنيك, ەلەكتريك سەكىلدى قاراپايىم ەڭبەك ادامدارى ازاماتتىق قىزمەتشىلەر رەەستىرىندە بولماۋىنان, ۇكىمەت تاراپىنان ازاماتتىق قىزمەتشىنىڭ ايلىعى ارتتىرىلعاندا, وسى ەڭبەگى اۋىر جۇمىسشىلاردىڭ مۇددەسى ەسكەرىلمەي كەلەدى.
اسىرەسە, دەنساۋلىق ساقتاۋ, وقۋ-اعارتۋ سالاسىنداعى ەڭ اۋىر جۇمىستاردى اتقاراتىن جۇمىسشىلاردىڭ ايلىق جالاقىسى تومەن.
مىسالى, مەكتەپتەردەگى ەدەن جۋشى – 82 856 تەڭگە, ەلەكتريك 81 575 تەڭگە, اۋلا سىپىرۋشى – 79 317 تەڭگە. بۇگىنگى تاڭدا, تەك ورتا ءبىلىم سالاسىندا 261 مىڭنان استام وسى ساناتتاعى جۇمىسشىلار بار, ولاردىڭ 254 مىڭى قولىنا تيەتىن ايلىق جالاقىسى 74 مىڭ تەڭگەدەن 85 مىڭ تەڭگە ارالىعىندا. ءبىز, وڭىرلەردى ارالاعاندا بيۋدجەتتىك ەڭبەك ۇجىمدارىنىڭ بارلىعىندا دەرلىك وسى سۇراق كوتەرىلدى.
بيۋدجەتتىك مەكەمەلەرىندەگى ورتا جانە كىشى بۋىن ماماندارى مەن قىزمەتشىلەردىڭ ەڭبەكاقىسىن كەمىندە ەكى ەسەگە كوتەرۋ قاجەت دەپ سانايمىز. اتقاراتىن جۇمىسىنىڭ كۇردەلىلىگىنە جانە اۋىرلىعىنا ءارى ەرەكشەلىگىنە قاراي لايىقتى جالاقى تاعايىندالۋى ءتيىس دەپ ەسەپتەيمىز. الەۋمەتتىك ادىلدىك زامانىندا جۇمىسى اۋىر, ەڭبەگى ادال جۇمىسشىلاردىڭ جالاقىسى ارتۋى قاجەت.
حالقىمىزدا «ەڭبەك ادامى – ەلدىڭ قۇتى» دەگەن جاقسى ءسوز بار. اmanat پارتياسىنىڭ فراكتسياسى قاراپايىم ەڭبەك ادامدارى ساناتىنداعى جۇمىسشىلارعا لايىقتى جالاقى تولەۋدىڭ شىن مانىندە ءادىل ءارى بىرىڭعاي جۇيەسىن قۇرۋ جونىندە ۆەدومستۆوارالىق جۇمىس توبى قۇرىلۋى كەزەك كۇتتىرمەيتىن ماسەلە دەپ بىلەمىز. وسىعان وراي, مىناداي ۇسىنىستارىمىزدى ەنگىزەمىز:
- ەڭ باستىسى, قازاقستان رەسپۋبليكاسى ۇكىمەتى تاراپىنان بارلىق باسقا دا بيۋدجەتتىك مەكەمەلەردەگى جالاقى تەڭسىزدىگىن زەردەلەپ, ولقىلىقتاردى جويۋعا شارا قابىلداۋى ءۇشىن «ازاماتتىق قىزمەتشىلەرگە, مەملەكەتتىك بيۋدجەت قاراجاتى ەسەبىنەن ۇستالاتىن ۇيىمداردىڭ قىزمەتكەرلەرىنە, قازىنالىق كاسىپورىنداردىڭ قىزمەتكەرلەرىنە ەڭبەكاقى تولەۋ جۇيەسى تۋرالى» قازاقستان رەسپۋبليكاسى ۇكىمەتىنىڭ 2015 جىلعى 31 جەلتوقسانداعى № 1193 قاۋلىسىنا ءتيىستى وزگەرىستەر مەن تولىقتىرۋلار ەنگىزىلسىن.
- وقۋ-اعارتۋ مينيسترلىگى ۇلتتىق ەكونوميكا مينيسترلىگىمەن جانە قارجى مينيسترلىگىمەن بىرلەسە وتىرىپ, ەدەن جۋشى, پلوتنيك, سانتەحنيك, اۋلا تازالاۋشى, ەلەكتريك ساناتىنداعى جۇمىسشىلاردىڭ ەڭبەك دەمالىسىنا تولەنەتىن تولەم مولشەرىنە ساۋىقتىرۋ جاردەماقىسىن قوسۋ مۇمكىندىگىن قاراستىرىپ, رەسپۋبليكالىق بيۋدجەتتەن شىعىنداردى ەسەپتەسىن. رەسپۋبليكالىق بيۋدجەتتى ناقتىلاۋ كەزەڭىندە اتالعان جۇمىسشىلاردىڭ بازالىق لاۋازىمدىق جالاقىسىن ينفلياتسياعا جانە جۇمىستاردىڭ كۇردەلىلىگىنە سايكەس ۇلعايتۋدى قاراستىرسىن.
- وقۋ-اعارتۋ مينيسترلىگى 2016 ج. 29 قاڭتارداعى №123 قازاقستان رەسپۋبليكاسى ءبىلىم جانە عىلىم ءمينيسترى بۇيرىعىمەن بەكىتىلگەن ءبىلىم جانە عىلىم سالاسىنداعى ازاماتتىق قىزمەتشىلەر لاۋازىمدارىنىڭ ءتىزىلىمىن قايتا قاراپ, ەدەن جۋشى, پلوتنيك, سانتەحنيك, اۋلا تازالاۋشى, ەلەكتريك ساناتىنداعى جۇمىسشىلاردىڭ وسى تىزىلىمگە ەنگىزىلۋىن قاراستىرسىن.
جۇلدىز سۇلەيمەنوۆا,
ءماجىلىس دەپۋتاتى
