كولىكتە راديونى قوسقانمىن. «سەنى جىلىتاتىن, سەنى جىلاتاتىن دا ەندى سۇمىراي جوق! ەندى سۇمىراي جوق!» دەگەن ءاندى ەستىپ, ەسەڭگىرەپ قالدىم. سۇمىرايى نەسى دەدىم؟ ءاننىڭ ءمانى وسىنشالىقتى تومەندەيتىندەي ءسوزدىڭ ءمان-ماعىناسىن تۇسىنۋدەن قالدىق پا سوندا؟
Gakku TV-نىڭ YouTube-تاعى ارناسىندا وسى ءاندى 500 مىڭعا جۋىق ادام تىڭداپتى. ارينە, جاستار تىڭداپ, تاماشالادى. سودان كەيىن جاستار ءبىر-بىرىنە «سۇمىراي» دەپ ايتىپ جۇرسە, كىمگە رەنجيسىز؟ ەشكىمگە. ويتكەنى جاستارعا «سۇمىراي» ترەند سوزگە اينالىپ كەتپەسىنە كىم كەپىل؟ سۇراقتان سۇراق وسىلاي تۋىنداي بەرەدى.
بىلە بىلسەك, سۇمىراي – جاۋىز, زالىم, جەكسۇرىن دەگەن ماعىنا بەرەدى. تاعى ءبىر ءمانى – جالعىز اياقتى, جالعىز كوزدى ماقۇلىق. حالىق ىشىندە سۇمىراي كەلگەن جاقتان ءبىر اپات, نە جۇت, نە اشارشىلىق بولادى دەگەن نانىم بار. سۇمىراي كەلسە, سۋ قۇريدى دەگەندى دە جاقسى بىلەمىز.
باياعىدا سۇمىرايدىڭ اتىن اتاتپاي, جامان ىرىمعا بالايتىن بولسا, بۇگىن انگە قوسىپ, وعان بەينەبايان ءتۇسىرىپ, جاستاردىڭ جاپپاي قولدانۋىنا جول اشىپ وتىر. ءبىزدىڭ يدەولوگيانىڭ ءتۇرى وسى!
شىنى كەرەك, رۋحاني سانامىزدى سۋسىنداتاتىن انگە ەمەس, داڭعىر-دۇڭگىرى باسىم انگە اۋەس بولدىق.
مىنا ءاننىڭ سوزىنە نازار سالايىقشى: «جۇرەگىم مەنىڭ – مولودوي. دوستارىم مەنىڭ – زولوتوي. باۋىرلارىم – دوروگوي…». شىركىن-اي, باياعى اقىنداردىڭ, سازگەرلەردىڭ كوركەمدىك كەڭەسى بولسا: «قاراعىم, شاماڭ كەلمەيتىن شوقپاردى بەلىڭە بايلاما» دەپ قايتارار ەدى.
جەلىدەگى جەلىككەن مىنا رەپتىڭ ءسوزىن قاراڭىز: «ەي, جىندى قىز, تىڭدا! بۇل ساعان ارنالادى, مەن ساعان بارا الام قاتتى ساعىنعاندا, مىنا ومىردە ءبارى جالعان, تازالىق قالماعان, ادالدىق دەگەن نارسە كىشكەنە عانا قالعان, ويلانىپ قاراسام, سەنىمەن عانا جاراسام, ەي, جىندى قىز!». سونداعى جىندى قىزدىڭ جاۋابى: «ەي, جىندى بالا مەنى تىڭدا, مەنى سۇيەمىن دەسەڭ كوروچە, قۋما, مەندە ساعان دەگەن سەزىم جوق…».
مىنە, جەتكەن جەرىمىز وسى!
ادام سوزبەن ءوز ويىن ايتادى, ىشكى ويىن تانىتادى, ءوز ويىن جۇيەلەيدى, ياعني ءتىل – بولمىسىن بىلدىرەتىن قۇرال. ەندەشە, بۇگىنگى جاستاردىڭ تانىم-تۇسىنىگى مەن تالعام-تالابىن تۇسىنۋگە بولاتىنداي.
