ەل مەديتسيناسىنىڭ ادىمى ىلگەرىلەي ءتۇستى. ىلكىمدى ىستەرىمەن ىرگەلەنگەن ەلورداداعى ۇلتتىق عىلىمي كارديوحيرۋرگيا ورتالىعى تاعى ءبىر تىڭ جاعالىعىمەن جۇرتتى ەلەڭ ەتكىزدى. الەمدە العاش رەت مەحانيكالىق جۇرەك يمپلانتىن ورناتۋ وپەراتسياسىن ءساتتى ورىندادى. وپەراتسيانى دۇنيەجۇزىلىك كارديوتوراكالدى حيرۋرگتار قوعامىنىڭ (WSCTS) 27-ءىنشى پرەزيدەنتى, دەنساۋلىق ساقتاۋ مينيسترلىگىنىڭ باس كارديوحيرۋرگى, قازاقستاننىڭ ەڭبەك ەرى يۋري پيا باستاعان توپ چەحيا, يزرايل, يتاليا جانە اقش-تاعى سەرىكتەستەرىمەن بىرلەسىپ جاسادى.
الەمدە بالاماسى جوق FIVAD اتتى سىمسىز قاناينالىم قۇرىلعىسىنىڭ باستى ەرەكشەلىگى – سىرتقى قۋات كوزدەرىنە تىكەلەي جالعانباعان. مۇنىڭ قىزمەتى كادىمگى كارديوستيمۋلياتورمەن بىردەي. بىراق اپپارات كەۋدەنىڭ ىشىندە ورناتىلعان, سىمدارى شىعىپ تۇرمايدى. ونى ارنايى بەلبەۋ ارقىلى ماگنيتتىك تولقىنمەن قۋاتتايدى. قۋاتى 8 ساعاتقا جەتەدى. بۇل پاتسيەنتتىڭ اعزاسىن اسقىندىرماي, ەمىن-ەركىن قيمىل-قوزعالىسىنا مۇمكىندىك بەرەدى. بۇعان قوسا, جۇرەكتىڭ سوعىسىن, قاننىڭ قىسىمىن جانە تاعى باسقا دەرەكتەردى كورسەتىپ تۇراتىن ارنايى قولساعاتى بار.
وسىنداي بىرەگەي قۇرىلعى 24 جاستاعى الماتىلىق يسمايل تۇرسىنوۆتىڭ جۇرەگىنە ورناتىلدى. وپەراتسيا 2018 جىلدىڭ 15 جەلتوقسانىندا ءوتتى.
«مەن يسمايل تۇرسىنوۆتى تۇڭعىش عارىشكەرگە تەڭەيمىن. ول اۋرۋحاناعا تۇسكەندە ءوز بولمەسىنەن شىعا المايتىن, قاتتى دەمىكپەسى بار ەدى. ۇنەمى دارىگەردىڭ باقىلاۋىندا بولدى. قازىر جاعدايى جاقسى, دالادا سەرۋەندەيدى, سپورت زالدا جاتتىعادى, ءتىپتى باسسەينگە دە تۇسە الادى» دەدى ۇلتتىق عىلىمي كارديوحيرۋرگيا ورتالىعىنىڭ باسشىسى يۋري پيا.
بۇرىن تەك توسەككە تاڭىلىپ جاتقان يسمايل وپەراتسيادان ەكى كۇننەن كەيىن اياعىنان تىك تۇرعانىن, ءوزىن جاقسى سەزىنەتىنىن, سالماعى 94 كەلىدەن 67 كەلىگە تۇسكەنىن ايتتى.
التىن قولدى, ۇلكەن جۇرەكتى يۋري پيا وسىدان 50 جىل بۇرىن الەمدە تۇڭعىش رەت قىتايدا, وڭتۇستىك افريكادا جۇرەك ترانسپلانتاتسياسى جاسالعانىن, ال ەندى ادام ءومىرىن ۇزارتقان تۇڭعىش جاساندى جۇرەك يملانتانتىن ورناتۋ استانادا جۇزەگە اسقانىن ايتىپ, اعىنان جارىلدى. ول بۇنىڭ قازاقستان مەديتسيناسىنىڭ الەۋەتىن كورسەتەتىنىن, جۇرەك جەتىسپەي تۇرعان جاعدايدا شىن مانىندە سەرپىندى جوبا بولعانىن جانە حالىقارالىق جوبانىڭ ەلىمىزدە ورىندالعانىنا ماقتاناتىنىن جەتكىزدى.
حالىقارالىق ستاتيستيكاعا سايكەس الەمدە 26 ميلليون ادام سوزىلمالى جۇرەك جەتكىلىكسىزدىگى اۋرۋىنا ۇشىراعان. بۇلاردىڭ قاتارى جىل سايىن 900 مىڭعا ارتادى. ونىڭ ىشىندە 800 مىڭ ناۋقاسقا جۇرەك ترانسپلانتاتسياسى قاجەت. دونور جەتپەي بەس جىلدا قايتىس بولعانداردىڭ سانى 7%-دان 50%-عا دەيىن جەتەدى ەكەن. ال قازاقستاندا 200 ادام جۇرەك الماستىرۋعا مۇقتاج بولسا, سونىڭ 10-ىنا عانا ترانسپلانتاتسيا جاسالادى.
يۋري پيانىڭ ايتۋىنشا, بۇل پاتولوگيانى ەمدەۋدىڭ التىن ستاندارتى – ترانسپلانتاتسيا. الايدا دونور جەتىسپەگەندىكتەن, جۇرەكتىڭ مەحانيكالىق كومەكشى قۇرالىن قولدانۋ بەلسەندى دامىپ كەلەدى. سوندىقتان LeviticusCardioLtd كومپانياسى جاساپ شىعارعان FIVAD قۇرىلعىسىنا ەۋروپالىق سەرتيفيكات الىپ, ەۋروپادا جانە امەريكادا ەكسپەريمەنت جۇرگىزىلمەك. سودان كەيىن يننوۆاتسيالىق قۇرىلعىنى تەگىن مەديتسينالىق كومەكتىڭ ساناتىنا قوسىپ, قازاقستاندىقتارعا تەگىن ورناتۋعا مۇمكىندىك بار.
