استانا قالاسىنىڭ بايقوڭىر اۋداندىق ارداگەرلەر كەڭەسىنىڭ باستاماسىمەن «جاستاردى پاتريوتتىق جانە رۋحاني تاربيەلەۋدەگى ارداگەرلەردىڭ ءرولى» تاقىرىبىندا «دوڭگەلەك ۇستەل» شاراسى ءوتتى.
«تۇران» كوللەدجىندە ۇيىمداستىرىلعان جيىن بارىسىندا «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ توراعاسى ومىرزاق وزعانباەۆ, استانا قالاسى قوعامدىق كەڭەسىنىڭ توراعاسى سانسىزباي ەسىلوۆ, «نۇر وتان» پارتياسى استانا قالالىق فيليالىنىڭ ءبولىم مەڭگەرۋشىسى قازبەك قازكەنوۆ قوعام ومىرىندەگى جاستاردىڭ الەۋمەتتىك ماقسات-مۇددەسى جونىندە, مەملەكەت باسشىسى نۇرسۇلتان نازارباەۆتىڭ بيىلعى جىلدى «جاستار جىلى» دەپ جاريالاۋىنىڭ ءمان-ماعىناسى جايىندا اڭگىمەلەپ بەردى.
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى, فيلولوگيا عىلىمىنىڭ دوكتورى ديحان قامزابەكۇلىنىڭ جاستارعا قاراتىپ ايتقان ءسوزى جيىنعا قاتىسقان ستۋدەنتتەر مەن جۇمىسشى جاستاردىڭ ساناسىنا سەرپىن بەردى. «تاريحقا جۇگىنسەك, سوناۋ قيلى-قيلى كەزەڭدە سماعۇل سادۋاقاسوۆ, عاني مۇراتباەۆ سىندى جالىندى جاستار ەل مەن جەردىڭ بىرلىگى مەن بەرەكەسى ءۇشىن الدىمەن ءبىلىم مەن ەڭبەككە سۇيەنۋ كەرەكتىگىن ايتىپ وتكەن. ولار سول زاماندا جاپ-جاس بولا تۇرا بۇكىل تىرلىكتىڭ قاينار بۇلاعىن جاستاردىڭ بەلسەندىلىگىمەن بايلانىستىرعان. باعامداق قاراساق, بۇل مۇراتتار بۇگىنگى زامانعا دا قاتىستى. قازىر جاستار ءۇشىن جان-جاقتى جاعدايلار جاسالىپ وتىر. ءبىلىم الۋعا دا, ەڭبەك ەتۋگە, ءاربىر جاستىڭ بويىنداعى تالابى مەن تالانتىن اشۋعا مۇمكىندىك بار. ال ەلباسىمىزدىڭ بيىلعى جىلدى «جاستار جىلى» دەپ جاريالاۋى وسى مۇمكىندىكتەردى كەڭىنەن پايدالانۋعا جول اشادى. دەمەك, سىزدەر ءۇشىن ەلدىك مۇددەنى ويلاۋ, قىزمەت ەتۋ مۇرات بولۋ كەرەك» دەپ ءسوزىن تۇيىندەدى.
استانا قالاسى قوعامدىق دامۋ ىستەرى باسقارماسىنىڭ ءبولىم مەڭگەرۋشىسى باقىتجان جۇنىسبەكوۆ بۇگىنگى تاڭدا ەلوردالىق جاستار ءۇشىن اكىمدىك تاراپىنان جان-جاقتى جاعداي جاسالىپ جاتقانىن, وسى رەتتە قالادا «جاستاردىڭ جول كارتاسى» ازىرلەنگەنىن, ونىڭ اياسىندا 11 باعىت بويىنشا 153 جوبانى جۇزەگە اسىرۋ كوزدەلگەنىن جەتكىزدى. وسى ورايدا استانا اكىمدىگى جاستاردىڭ يدەياسىن تىڭداۋعا, جاڭا باستامالارعا قولداۋ بەرۋگە ءازىر ەكەنىن دە ايتىپ ءوتتى. استانا جاستارى ءۇشىن جاعىمدى جاڭالىقتىڭ ءبىرى قالاداعى «جاستار» سارايىندا جاستار حابى قۇرىلىپ وتىر. ەندى مۇندا كەشەندى ءىس-شارالاردى وتكىزۋگە, جۇمىسپەن قامتۋ, ەرىكتىلەر قوزعالىسى, اۋلالار كلۋبىن دامىتۋ جۇمىستارىن جۇيەلى جۇرگىزۋگە مۇمكىندىك اشىلماق.
جيىن كەزىندە «استانا سۋ ارناسى» كاسىپورنىنىڭ تەحنيكالىق شەبەرحانا باستىعى الەكساندر بەرگەر دە ءوز ويىن ورتاعا سالىپ, جۇمىسشى جاستاردىڭ كاسىبي شەبەرلىگىن كوتەرۋ ءۇشىن جاسالىپ جاتقان جۇمىستار جونىندە, سونىمەن قاتار الەۋمەتتىك ماسەلەلەردى دە وڭتايلى شەشۋ كەرەكتىگىن ايتتى. بۇل رەتتە جۇمىسشى جاستار ءۇشىن جاتاقحانالار سالۋ نەمەسە تۇرعىن ءۇي الۋدىڭ جەڭىلدەتىلگەن جۇيەلەرى قاجەتتىگىن ۇسىنىس رەتىندە ءبىلدىردى.
ال اۋداندىق ارداگەرلەر كەڭەسىنىڭ «ءىنجۋ» باستاۋىش ۇيىمىنىڭ جەتەكشىسى يمانتاي الپەيىسوۆ الداعى ۋاقىتتا ارداگەر قاۋىممەن جاستار اراسىنداعى ساباقتاستىقتى جالعاستىرۋ ماقساتىندا ءتۇرلى شارالار وتكىزۋدى جوسپارلاپ وتىرعانىن ايتىپ, جيىنعا جينالعان جاستارعا يگى تىلەكتەرىن ايتىپ, باتاسىن بەردى.
جيىن سوڭىندا بايقوڭىر اۋداندىق ارداگەرلەر كەڭەسىنىڭ توراعاسى سارسەنباي مىڭباەۆ وسى باسقوسۋدىڭ ءتۇيىنىن جاساپ, استانا قالاسىنىڭ اتقارۋشى ورگاندارىنا, سونداي-اق ارداگەرلەر ۇيىمدارىنا ۇسىنىمدار بەرىلەتىنىن جاريا ەتتى.
