رەسەيدىڭ «كۋلتۋرا» ارناسىن ءجيى قارايمىن. اسىرەسە, ماعان سونداعى تەاتر ونەرىنىڭ مايتالماندارى تۋرالى باعدارلامالار وتە ۇنايدى. جالپى, مۇنداي باعدارلاما كورشى ەلدىڭ بارلىق ارنالارىندا بار. جانە ول بىرەۋ ەمەس, بىرنەشەۋ.
ولار كۇن سايىن ۇزدىكسىز كورسەتىلىپ جاتادى. كەز كەلگەن اكتەردىڭ تۋعان كۇنى مەن مەرەيتويى نازاردان تىس قالمايدى. ومىردەن وزعان تالانتتى تۇلعالاردى دا ۇمىتپاي, ءجيى ەسكە الىپ وتىرادى. ماسەلەن, وسى كەشە عانا جەتپىس جاسقا تولعان رەسەيدىڭ حالىق ءارتىسى, تاماشا اكتريسا يرينا مۋراۆەۆانى اسپانعا كوتەرىپ جاتىر. ول تۋرالى دەرەكتى فيلم ۇسىنىپ, ارنايى باعدارلامالار كورسەتۋدە. ايتپاقشى, رەسەيدە بيىل «تەاتر جىلى» دەپ جاريالاندى.
ءبىر سوزبەن ايتقاندا, ۇلتتىڭ, ءتىلدىڭ قالىپتاسىپ, دامۋى وركەندەۋى ءۇشىن تەاتردىڭ الاتىن ورنى الابوتەن.
ال بىزدە قالاي؟ شىندىعىن ايتسام, وتاندىق ارنالاردا تەاتر سالاسىنا ارنالعان باعدارلامالار جوقتىڭ قاسى. ءبىزدىڭ ەلىمىزدە دە ءبىراز تەاتر بار. ءتىپتى, كەيبىر وبلىس ورتالىعىندا ەكى-ءۇش تەاتر جۇمىس ىستەيدى. باس قالانىڭ وزىندە 6-7 تەاتر ورنالاسقان. جانە تەاتردىڭ دا تۇرلەرى كوپ. بىراق سولاردىڭ ءبارى ءوز دەڭگەيىندە ناسيحاتتالىپ جاتقان جوق. سول ونەر وردالارىنىڭ تىنىس-تىرشىلىگى, اكتەرلاردىڭ دەڭگەيى, ءورىسى جايىندا دا ەشتەڭە بىلمەيمىز.
بيىل قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى ءامينا ومىرزاقوۆانىڭ عاسىرلىق مەرەيتويى يۋنەسكو كولەمىندە اتاپ وتىلەدى. كەيىنگى جاس ۇرپاق ءامينا اپايدى ەل اراسىنا كوبىرەك تاراعان «تاقيالى پەرىشتە» كومەديالىق فيلمىندەگى ۇلىنا قالىڭدىق ىزدەگەن انانىڭ ءرولى ارقىلى جاقسى بىلەدى. ال ول كىسىنىڭ ساحنادا 150-دەن استام رولدەردى سومداعانىن كوبى بىلمەيدى.
بۇگىندە قازاق تەاتر ونەرىن بيىككە كوتەرگەن ءسابيرا مايقانوۆا, حاديشا بوكەەۆا, فاريدا ءشارىپوۆا, بىلتىر عانا دۇنيەدەن وتكەن زامزاگۇل ءشارىپوۆالاردىڭ ەسىمدەرى دە كوپ ايتىلمايدى. ءتىپتى, ۇلتتىق ساحنا ونەرىنىڭ كوش باسىندا تۇرعان – قاليبەك قۋانىشباەۆ, ەلۋباي ومىرزاقوۆ, سەركە قوجامقۇلوۆ, قاپان بادىروۆ, شاكەن ايمانوۆ سەكىلدى كورنەكتى تۇلعالارىمىزدىڭ ءومىر جولدارى دا كەيىنگى جاس بۋىنعا بەيمالىم.
قازىر ارامىزدا جۇرگەن گۇلجان اسپەتوۆا, تورعىن تاسىبەكوۆا, تىلەكتەس مەيراموۆ سەكىلدى دارىندى اعا-اپالارىمىزدىڭ دا ءومىر جولىنان كوپ وي تۇيۋگە بولادى. وسى كىسىلەردى باعدارلاماعا شاقىرىپ, سويلەتە بىلسەك, قانشاما تاعىلىمدى دۇنيەگە كۋا بولار ەدىك.
قورىتا كەلگەندە, بۇگىندە ارنالاردى جاۋلاپ العان شوۋلاردىڭ سانىن ازايتىپ, ونىڭ ورنىنا تەاتر ونەرى مەن سوعان ەڭبەك سىڭىرگەن تۇلعالاردى دارىپتەيتىن باعدارلاما بولسا دەپ ويلايمىن.
