كەشە م.وتەمىسۇلى اتىنداعى وقۋشىلار سارايىندا ەلوردالىق ءبىلىم باسقارماسىنىڭ وكىلدەرى قوعامدىق قابىلداۋ كۇنىن وتكىزدى.
ءىس-شاراعا كەلگەن قالا تۇرعىندارى ءبىلىم سالاسىنا قاتىستى سۇراقتارىن اتالمىش باسقارما باسشىسى ءانۋار جانعوزين مەن ءبولىم جەتەكشىلەرىنە قويۋعا مۇمكىندىك الدى. جيىندا ءجيى كوتەرىلگەن ماسەلەلەر قاتارىندا الەۋمەتتىك تۇرمىسى تومەن وتباسىدان شىققان جانە مۇمكىندىگى شەكتەۋلى بالالار جايى بولدى.
ءوزىن ءنازيپا احمەتجانوۆا دەپ تانىستىرعان اجەي نەمەرەلەرىمەن بىرگە جاقىندا استاناعا كوشىپ كەلگەنىن ايتىپ, از قامتىلعان وتباسى بالالارى ءۇشىن مەكتەپ تاراپىنان قانداي كومەك كورسەتىلەتىنىن سۇرادى. قوسىمشا ءبىلىم بەرۋ جانە كامەلەتكە تولماعانداردى الەۋمەتتەندىرۋ ءبولىمى مامانىنىڭ ايتۋىنشا, مۇنداي ساناتقا جاتاتىن وقۋشىلار ءۇشىن مەكتەپتەن قىسقى جانە ماۋسىمدىق سىرتقى كيىم, اياق كيىم, كەڭسە تاۋارلارى, جول ءجۇرۋ بيلەتى, جازعى ساۋىقتىرۋ لاگەرىنە جولداما, سونداي-اق 1-4 سىنىپ وقۋشىلارىنا تەگىن تاماق بەرىلەدى ەكەن.
بۇدان بولەك, تۇرعىندار تاراپىنان بالالاردى ۇيدە جەكە وقىتۋ, كوپ بالالى وتباسى بالالارىن بالاباقشاعا ورنالاستىرۋ, ۇلتتىق بىرىڭعاي تەستىلەۋ جانە وليمپياداعا قاتىسۋعا قاتىستى سۇراقتار كوپ قويىلىپ, ولارعا ءتيىستى جاۋاپتار بەرىلدى.
