مەيىرگەر قىزمەتىنىڭ مەرەيى
كەشە ەلوردادا «مەديتسينالىق-سانيتاريالىق العاشقى كومەك كورسەتۋدە مەيىرگەر قىزمەتىنىڭ ءرولى» اتتى رەسپۋبليكالىق عىلىمي-تاجىريبەلىك كونفەرەنتسيا ءوتتى.
– مەيىرگەر قىزمەتى الەۋەتى زور, دەنساۋلىق ساقتاۋ جۇيەسىنىڭ ماڭىزدى قۇرامداس بولىگى بولىپ تابىلادى, – دەدى قازاقستان رەسپۋبليكاسى دەنساۋلىق ساقتاۋ ءمينيسترى س.قايىربەكوۆا ءوزىنىڭ قۇتتىقتاۋ سوزىندە. بۇگىنگى تاڭدا مەديتسينالىق-سانيتاريالىق كومەكتى جەتىلدىرۋ – دەنساۋلىق ساقتاۋ ءىسىنىڭ نەگىزگى باعىتتارىنىڭ ءبىرى. بۇل «سالاماتتى قازاقستان» مەملەكەتتىك باعدارلاماسىنىڭ ەكىنشى كەزەڭىن ىسكە اسىرۋدىڭ كەشەندى شارالارى مەن الماتى دەكلاراتسياسىنىڭ نەگىزگى قاعيداتتارىنا ساي ءوز دارەجەسىندە دامىپ كەلەدى.
سوڭعى جىلدارى مەيىرگەرلەر قىزمەتىنىڭ مارتەبەسى ارتىپ, دارىگەردىڭ كەيبىر وكىلدىكتەرىن اتقارۋ وسى ماماندارعا جۇكتەلىپ ءجۇر. دەنساۋلىق ساقتاۋ جۇيەسىندە الەۋمەتتىك قىزمەتكەرلەر ەنگىزىلىپ, ۋچاسكەلىك دارىگەرلەرگە, جالپى ءتاجىريبەدەگى دارىگەرلەرگە بەكىتىلەتىن مەيىربيكەلەر سانى ارتىپ, ولاردىڭ قاجەتتىلىگى باعالانۋدا.
اتالمىش شارا بارىسىندا فينليانديا, ليتۆا ەلدەرى ماماندارىنىڭ تاجىريبەسى, مەديتسينالىق قاۋىمداستىقتاردىڭ وسى سالانى دامىتۋداعى باياندامالارى تالقىلاندى. ەلىمىزدىڭ 2020 جىلدارعا دەيىنگى مەيىرگەر ءىسىن دامىتۋ تۇجىرىمداماسى تالقىلانىپ, اۋىلدىق جەرلەردەگى دەنساۋلىق ساقتاۋ ماماندارىنا ارنالعان ترەنينگتەر, شەبەرلىك ساباقتارى ۇيىمداستىرىلدى.
ايگۇل ۋايسوۆا