بيىل جاڭا وقۋ جىلىنان باستاپ مەكتەپ ديرەكتورلارىن تاعايىنداۋ ەرەجەسى وزگەردى. ەندى ولاردى بۇرىنعىداي اۋداندىق, قالالىق ءبىلىم بولىمدەرىنىڭ باسشىلارى تاعايىندامايدى. بۇل جاڭالىقتى جۇرتشىلىق جىلى قابىلدادى. ايتپەسە ءبىر ورنىندا ۇزاق جىل وتىرىپ, ەشقانداي جەتىستىككە جەتپەگەن باسشىلاردى بىلەمىز. نە بولماسا, اۋىلدىق جەرلەردە ديرەكتورلىققا كەشە عانا وقۋ ءبىتىرىپ كەلگەن, ەشقانداي تاجىريبەسى جوق جاستاردى قويىپ جاتادى. وسىنىڭ ءبارى ءبىلىم ساپاسىنا كادىمگىدەي اسەر ەتەدى. قازىر مەكتەپ ديرەكتورى ۋاقىت تالابىنا ىلەسىپ, جاڭا تەحنولوگيانىڭ سىرىن ۇعا بىلەتىن مامان بولعان ءجون. وسى وزگەرىسكە بايلانىستى ازاماتتاردىڭ پىكىرىن بىلگەن ەدىك.
ارمان ءجۇنىسوۆ,
قر ءبىلىم جانە عىلىم مينيسترلىگىنىڭ ءباسپاسوز حاتشىسى:
– ءيا, بۇگىنگى تاڭدا مەكتەپ ديرەكتورلارىنىڭ كاسىبي دەڭگەيىن كوتەرۋ ماسەلەسىنە باسا نازار اۋدارىلىپ وتىر. سوعان بايلانىستى ديرەكتورلاردى تاعايىنداۋ قاعيداسى وزگەردى. جاڭا قاعيداعا سايكەس, ۇمىتكەر 4 كەزەڭنەن تۇراتىن كونكۋرستان وتەدى. الدىمەن ول مەكتەپتىڭ قامقورشىلىق كەڭەسىنەن ءوتۋ قاجەت. قامقورشىلىق كەڭەسكە جەرگىلىكتى اكىمدىك وكىلدەرى, مەكتەپ باسشىلىعى, تۇلەكتەر, اتا-انالار جانە ۇكىمەتتىك ەمەس ۇيىمداردىڭ وكىلدەرى كىرەدى. سودان كەيىن زاڭناما تەست سۇراقتارىن تاپسىرادى. وبلىستىق ءبىلىم باسقارماسىنىڭ كەلىسىمى, اۋداندىق, قالالىق ءبىلىم بولىمدەرىندە ءوزارا سۇحباتتاسادى. سونداي-اق, «دارىن» رەسپۋبليكالىق عىلىمي-تاجىريبەلىك ورتالىعىنىڭ كەلىسىمىن الادى. ورتالىقتىڭ كەلىسىمىنسىز ءبىلىم باسقارمالارى مەن بولىمدەرى ديرەكتوردى دەربەس قويا المايدى. مەكتەپ باسشىسى ءتورت جىلعا عانا تاعايىندالادى.
گۇلجاز بەكبولاتقىزى, مۇعالىم:
– مەكتەپ ديرەكتورلارىن ءار ءتورت جىل سايىن وزگەرتۋ دۇرىس شەشىم دەپ قابىلدايمىن. ءبىلىم باسقارماسى تۇرعاندا ولاردى تاعايىنداۋ ءۇشىن «دارىن» رەسپۋبليكالىق عىلىمي-تاجىريبە ورتالىعىنىڭ كەلىسىمىن الۋدى تۇسىنبەدىم. «دارىن» ورتالىعى وقۋشىلاردىڭ دارىنىن ۇشتاۋ كەرەك. سودان كەيىن ديرەكتوردى مۇعالىمدەر ەلەكتروندى داۋىس بەرۋ ارقىلى سايلاسا دەيمىن. مەندە ءبىر ۇسىنىس بار. بولسا دا مەكتەپ ديرەكتورلارىن سايلايتىن بولساق, ونىڭ ورىنباسارلارىن دا سايلاعان دۇرىس. سوندا كوماندا بولمايدى.
تۇرار شاكەن, اتا-انا:
– مەكتەپ ديرەكتورلارىن تاعايىنداۋ ماسەلەسىنە ەنگىزىلگەن ءوزگەرىستى ءوز باسىم تولىعىمەن قولدايمىن. شىن مانىندە, كەز كەلگەن لاۋازىمدى قىزمەتتىڭ مەرزىمى بولۋى كەرەك دەپ ويلايمىن. جاڭا قاعيدالارعا سايكەس, مەكتەپ ديرەكتورىنا ۇمىتكەر ءتورت كەزەڭنەن تۇراتىن كونكۋرستان وتەدى ەكەن. ونىڭ ءبىرىنشى كەزەڭى مەكتەپتىڭ قامقورشىلار كەڭەسى ەكەن. ءوزىم اتا-انا بولعاندىقتان, وسى ءبىرىنشى كەزەڭىنە توقتالايىن.
بىرىنشىدەن, بالاسى سول مەكتەپتە وقىپ جاتقان قامقورشىلار كەڭەسىنە مۇشە اتا-انا مەكتەپ ديرەكتورىنا ۇمىتكەر تۇلعانى جان-جاقتى تانيدى, بىلەدى, ونىڭ باسشىلىق, ۇيىمداستىرۋشىلىق قابىلەتتەرىن دە جاقىننان كورىپ-ءبىلىپ جۇرگەن ادام. سوندىقتان دا ۇمىتكەر تۇلعانىڭ وسى ءبىرىنشى كەزەڭنەن ءوتۋى ماڭىزدى دەپ سانايمىن. بىراق بۇل جەردە قامقورشىلار كەڭەسىنىڭ مۇشەلەرى تەك قانا مەكتەپ اتا-انالارى بولعانىن قالار ەدىم. ويتكەنى بالالارى سول مەكتەپتە وقيتىن اتا-انا عانا ءوز بالاسى وقىپ جاتقان مەكتەبىنە جاناشىرلىق تانىتادى.
ەكىنشىدەن, قازىر ەڭبەك ءوتىلى جوق, ول مەكتەپتىڭ قىر-سىرىن تۇسىنبەيتىن, باسشىلىق, ۇيىمداستىرۋشىلىق قابىلەتتەرى جوق جاستاردى مەكتەپ ديرەكتورى ەتىپ تاعايىنداپ جاتادى. مەن وعان تۇبەگەيلى قارسىمىن. ويتكەنى كەز كەلگەن قىزمەتتى العاشقى باسپالداقتان باستاۋ كەرەك سياقتى, مەكتەپ ديرەكتورلىعىن دا قاراپايىم مۇعالىمدىكتەن باستاپ, مەكتەپ ورىنباسارلارىنا دەيىن كوتەرىلىپ, سوسىن عانا مەكتەپ ديرەكتورلىعىنا سايلانۋ كەرەك. بالا وقىتىپ كورمەگەن, بالامەن تىكەلەي قارىم-قاتىناسقا تۇسپەگەن جاس قىزمەتكەر قالاي بىردەن باسشى بولا الادى؟ تاجىريبە كەرەك. ءوزىم بىرنەشە جىل قاتارىنان مەكتەپتىڭ اتا-انالار كوميتەتىنىڭ ءتورايىمى بولعان, ۇرپاق تاربيەسىنە بەي-جاي قارامايتىن اتا-انا بولعاندىقتان, مەكتەپتەردىڭ ماسەلەسىن جاقسى بىلەمىن. ەلوردا مەكتەپتەرىندە تاجىريبەلى, تولىققاندى ءپىسىپ-جەتىلگەن مەكتەپ ديرەكتورلارىنىڭ ورىنباسارلارى جەتكىلىكتى.
ۇشىنشىدەن, مەكتەپ ديرەكتورلىعىنا, جالپى مۇعالىمدىككە ەر-ازاماتتاردى تارتۋ كەرەك دەپ ويلايمىن.
