استانا قالاسىنىڭ «ءوندىرىس» تۇرعىن الابىنداعى وزەكتى ماسەلەنىڭ ءبىرى مەكتەپ جاعدايى بولىپ تۇر. قولدانىسقا جاراماي قالعان ەسكى مەكتەپ-كەشەننىڭ ورنىنا سالىنىپ جاتقان جاڭا مەكتەپتىڭ قۇرىلىس بارىسىنا تۇرعىندار نارازى بولىپ وتىر.
جاقىندا استانا قالاسىنىڭ ەكىنشى سايلاۋ وكرۋگىنان سايلانعان ءماجىلىس دەپۋتاتى داۋلەت تۇرلىحانوۆ قۇرىلىسى پروبلەماعا اينالىپ تۇرعان مەكتەپكە ارنايى بارىپ, مەردىگەر كومپانيانىڭ باسشىلارىمەن, قۇرىلىسشىلارمەن كەزدەستى. بۇل جيىنعا استانا قالاسى اكىمىنىڭ ورىنباسارى نۇرلان نۇركەنوۆ, باسقارما باسشىلارى, ءماسليحات دەپۋتاتتارى, Amanat پارتياسى قالالىق فيليالىنىڭ اتقارۋشى حاتشىسى ساقتاعان سادۋاقاسوۆ جانە تۇرعىن الاپتىڭ بەلسەندى تۇرعىندارى قاتىستى.
بۇل مەكتەپ ەسكى №12 مەكتەپ-كەشەننىڭ ورنىنا سالىنىپ جاتىر. ەكى قاباتتى ەسكى مەكتەپ-كەشەندە بالاباقشا دا بولعان ەدى. ابدەن توزىعى جەتىپ, اپاتتى جاعدايدا دەپ تانىلعان سول مەكتەپتىڭ وقۋشىلارى 2020 جىلدان بەرى باسقا مەكتەپتەرگە اۋىستىرىلعان. ال 600 ورىنعا لايىقتالىپ سالىنىپ جاتقان جاڭا مەكتەپتىڭ قۇرىلىسى ءتۇرلى سەبەپپەن كەشىكتىرىلىپ جاتىر. وسى ماسەلە بويىنشا داۋلەت تۇرلىحانوۆ قۇرىلىس كومپانياسى باسشىلارىمەن, قالا اكىمىنىڭ ورىنباسارىمەن, قالالىق ءماسليحات دەپۋتاتتارىمەن بىرقاتار ماسەلەنى تالقىلاپ, قۇرىلىستىڭ نەلىكتەن باياۋلاپ تۇرعانىنىڭ سەبەپ-سالدارىن ايقىندادى. قۇرىلىستى جۇرگىزۋشى «گيدروپروم» جشس ديرەكتورى يسلامبەك كۋلتۋمانوۆ ەڭ باستى ماسەلە قارجىلاندىرۋعا بايلانىستى بولىپ وتىرعانىن ايتادى. قالا اكىمىنىڭ ورىنباسارى نۇرلان نۇركەنوۆ مەكتەپ قۇرىلىسىن باستاعان ءبىرىنشى مەردىگەردىڭ تاراپىنان جوبالاۋ جۇمىسىندا قاتەلىك كەتكەنىن, كەيىننەن ول قۇرىلىس كومپانياسىمەن شارتتىڭ بۇزىلعانىن, وسىنداي جاعدايعا بايلانىستى جوبالاۋ-سمەتالىق ءىس-شارالار قايتا جاسالعانىن جەتكىزدى. دەمەك, وسىنداي سەبەپتەرگە بايلانىستى قارجىلاندىرۋ پروتسەسى قايتا قارالعان, وزگەرگەن.
«قازىرگى كەزدە قاجەتتى قاراجات كولەمى ناقتىلاندى, قۇرىلىستى جەدەل جۇرگىزۋ ءۇشىن قارجىلاندىرۋ اشىلدى. كۇنى كەشە 200 ميلليون جىبەرىلدى, ودان كەيىنگى رەتىمەن جۇرگىزىلەدى» دەدى قالا اكىمىنىڭ ورىنباسارى.
بۇگىنگى تاڭدا مەكتەپ قۇرىلىسىندا 120 ادام جۇمىس ىستەپ جاتىر. قۇرىلىستى جۇرگىزۋگە مۇددەلى تاراپتارمەن اعىمداعى ماسەلەنى تالقىلاپ بولعان سوڭ, ءماجىلىس دەپۋتاتى داۋلەت تۇرلىحانوۆ قولدا بار مۇمكىندىكتىڭ ءبارىن مەيلىنشە ءتيىمدى پايدالانا وتىرىپ, مەكتەپ قۇرىلىسىن بەلگىلەنگەن مەرزىمنەن قالدىرماي ءبىتىرۋ قاجەتتىگىن ايتتى.
– بۇل جاعداي قالا شەتىندە تۇراتىن ادامدارعا الەۋمەتتىك قيىندىق تۋعىزىپ وتىر. قانشاما اتا-انا مەن بالالاردىڭ پروبلەماسى. سوندىقتان بۇل ماسەلە شەشىلۋى كەرەك. بالالار وقۋىن جاڭا جىلدا جاڭا مەكتەپتە جالعاستىرۋى قاجەت. اكىمدىك تە, ءماسليحات تا, باسقا دا تاراپتار وزىنە ءتيىستى جۇمىستى اتقارادى, – دەدى د.تۇرلىحانوۆ.
قالا شەتىندەگى تۇرعىن الاپتىڭ, ەل ىشىندە «كيرپيچنىي» دەپ اتالاتىن اۋداننىڭ الەۋمەتتىك پروبلەماسى بولىپ تۇرعان مەكتەپ قۇرىلىسىن دەپۋتات ۇدايى نازاردا ۇستايتىنىن ايتتى.
سونىمەن قاتار جيىن بارىسىندا قالا اكىمىنىڭ ورىنباسارى ن.نۇركەنوۆ تۇرعىن الاپتا قوعامدىق كەڭىستىك جانە جەكەمەنشىك بالاباقشا سالىناتىنىن ايتتى. بۇل باعىتتا جوبالاۋ جۇمىسى باستالعانىن جەتكىزدى.
