كەشە ەلىمىزدىڭ بارلىق وڭىرىندە جىل سايىنعى جالپى رەسپۋبليكالىق «مەكتەپكە جول» اكتسياسى باستالدى. بۇل تۋرالى ءبىلىم جانە عىلىم مينيسترلىگىنىڭ ءباسپاسوز قىزمەتى مالىمدەدى. شارا وسىمەن بەسىنشى جىل وتكىزىلۋدە.
كۇنكورىسى تومەن جانە كوپ بالالى وتباسىلاردان شىققان بالالاردى جاڭا وقۋ جىلىنا دايىنداۋعا قولداۋ كورسەتۋ ماقساتىنداعى شارا بيىل «قايىرىمدىلىق جاساۋعا اسىعىڭدار» ۇرانىن تۋ ەتپەك.
اكتسيا بارىسىندا ءبىلىم بەرۋ ورگاندارى مەن ۇيىمدارى تامىز جانە قىركۇيەك ايلارى ارالىعىندا قاۋىپتى توپتاعى بالالاردى انىقتاۋ بويىنشا بىرقاتار ءىس-شارالار جۇرگىزەدى. رەيدتەردىڭ قورىتىندىسى نەگىزىندە قاۋىپتى توپتاعى بالالاردىڭ, الەۋمەتتىك كومەككە مۇقتاج وتباسىلار مەن بالالاردىڭ مەكەنجايلار بويىنشا ارنايى ءتىزىم جاسالادى. وسى بالالار تۋرالى مالىمەتتەر ءبىلىم بەرۋ ورگاندارىنا, دەمەۋشىلەر مەن مەتسەناتتارعا تاپسىرىلادى. سونداي- اق, بالالاردىڭ قۇقىقتارىن قورعاۋ دەپارتامەنتتەرىنىڭ سايتتارىنان كومەككە مۇقتاج بالالار تۋرالى اقپارات الۋعا بولادى. ءتورت جىلدا اكتسيا شەڭبەرىندە 802 مىڭنان استام بالاعا جالپى كولەمى 4,3 ميلليارد تەڭگەنىڭ ماتەريالدىق كومەگى بەرىلدى. سونىمەن قاتار, دەمەۋشىلەر مەن مەتسەناتتار تاراپىنان دا 1,7 ميلليارد تەڭگەگە قولداۋ كورسەتىلدى.
اكتسيا كەزەڭىندە بالالاردىڭ قۇقىقتارىن قورعاۋ كوميتەتىندە 74-25-28 شۇعىل جەلىسى قىزمەت اتقاراتىن بولادى. قاجەتتى اقپاراتتى كوميتەتتىڭ www.bala-kkk. kz سايتىنان الۋعا مۇمكىندىك بار. اكتسيا قورىتىندىسى وبلىستاردىڭ, استانا جانە الماتى قالالارىنىڭ اكىمدىكتەرى جانىنداعى كامەلەتكە تولماعانداردىڭ ءىسى جانە ولاردىڭ قۇقىقتارىن قورعاۋ جونىندەگى كوميسسيالاردىڭ وتىرىستارىندا قارالادى.
