مەملەكەتتىك ستيپەنديا جاۋاپكەرشىلىك جۇكتەيدى

قازىرگى زامانعى الەمدە ءبىر قىزىق وزگەرىستەر, ۇدەرىستەر بولىپ جاتىر. ونىڭ سىرىن ساراپشىلار عالامدانۋمەن تۇسىندىرگىسى بار. ادامزاتتىڭ ءوسىپ-وركەندەۋى, قازىرگى تولىسقان مارتەبەسىن يەمدەنۋى, عىلىمدى زەرتتەپ-ءبىلۋى, بيىك جەتىستىكتەرگە جەتۋىنىڭ ءتۇپ نەگىزىندە اللا تاعالا جاراتقان ۇلىق ءسوز,  ءسوز ونەرى, شىعارماشىلىق قۇبىلىستىڭ ەرەن قۇپيا اسەرى بار, بولعان ءارى دۇنيە تۇرعانشا بولا دا بەرەدى.

پرەزيدەنت نۇرسۇلتان ءابىشۇلى نازارباەۆتىڭ جىل سايىن ەلىمىزدىڭ كوپتەگەن ونەر قايراتكەرلەرىن قابىلداپ, الماتىداعى رەزيدەنتسيا­سىندا تاپسىراتىن مەملەكەتتىك ستيپەندياسىن بىرنەشە مارتە الدىم. ەلباسىمىز 2007 جىلى ءبىر توپ جازۋشىلاردى قابىلداعاندا بولدىم. بيىلعى ستيپەنديا ءۇشىن تاعى العىس ايتامىن.

قازاقستان جازۋشىلار وداعىنىڭ توراعاسى نۇرلان ورازالين سەناتور بولىپ سايلانعانىن ادەبيەت ءۇشىن ماڭىزدى ءىس دەپ قابىلدايمىن. جازۋشىلار وداعى ءوز مۇشەلەرىنە قولىنان كەلگەن قامقورلىعىن ۇنەمى جاساۋمەن كەلەدى. ول ادەبيەتتىڭ ءتۇپ تامىرى سولماۋى ءۇشىن جاس, ورتا بۋىنىنا كەزەڭىمەن مەملەكەت تاراپىنان باسپانا بەرىلۋىنە مۇددەلى بىردەن-ءبىر ۇيىم.

جاقىندا دۇنيەدەن وتكەن قازاقتىڭ اياۋلى اقىنى ەسەنقۇل جاقىپبەكتىڭ:  «ءتۇبى مەنىڭ تۇسىنىكسىز بايلىعىم, /تۇقىمىنداي كوبەيەدى ەشكىنىڭ, /بۇلىڭ-بۇلىڭ بۇلدىر بۇلتتار ىشىندە, /ورگە تارتىپ بارا جاتىر كوش جىرىم» دەگەن  ولەڭ جولدارى كوكەيىمە ورالادى. ماتەريالدىق ەمەس بايلىق كۇللى الەمدە جۇمباق داۋلەتكە اينالعان. ءبارىن اقشامەن ولشەيتىن توعىشار, نادان دۇنيە كەيدە ادەبيەتتى مەنسىنبەي, مۇقتاجدىق قىلماي, كەرەكسىنبەي استام قارايتىنىن نەسىن جاسىرامىز. وركەنيەتتى ەلدەردە بۇل سىناق شەكتەن ءوتىپ كەتىپ, كوككە ورلەپ زورايعانى انىق.

مەن ادەبيەت تەورياسى بويىنشا كاسىبي مامانمىن. جازۋشىلىعىم وتباسىمدى اسىراي المايدى. كاسىبي مامانداردى مىنا قوعام اسا كەرەكسىنبەيتىنىن سەزىنىپ جۇرگەن جاي بار. بۇل – مەنىڭ جەكە ويىم.

اقىن-جازۋشىنىڭ شىعارما­شىلىق ەڭبەگىنىڭ جالعىز وتەۋى قالاماقى بولسا, ونىڭ كوبىنەسە اتىمەن جوقتىعى, ءۇزىپ-جارىپ تولەنسە, ماردىمسىزدىعى جانعا باتادى. سويتە تۇرا, «ءبورى ارىعىن بىلدىرمەس, سىرتقا ءجۇنىن قامپايتار» دەگەن حالىق دانالىعىن ءسۇيىپ مويىندايمىن. ويتكەنى, جازۋدان باس تارتۋ مۇمكىن ەمەس. بۇل – سۇيەكپەن كەتەر قاستەرلى دۇنيە, ونىڭ دا سۇراۋى بولارى انىق. ءتۇبى ادەبيەت باعى جارقىرايدى. «مادەني مۇرا» ءتارىزدى قازاقتىڭ تەڭدەسى جوق رۋحانيات قازىناسىن جاڭعىرتقان كەرەمەت مەملەكەتتىك باعدارلامانى جۇزەگە اسىرعان تۋعان ەلىمنىڭ پوتەنتسيالىنا, كەلەشەگىنە رياسىز سەنەمىن.

سوندىقتان قالامنان وزگە بىلەرى جوق, جازۋدان وزگە شىن قالاۋى جوق   جازۋشىلار قاۋىمى ءۇشىن جىل سايىن مەملەكەتتىك ستيپەنديا تاعايىندالۋى ءارى قۇرمەت بەلگىسى بولسا, ءارى شىعارماشىلىق جاۋاپكەرشىلىكتى قاتار جۇكتەيدى.

ايگۇل كەمەلباەۆا,

جازۋشى, ادەبيەتتانۋشى, «دارىن» مەملەكەتتىك جاستار سىيلىعىنىڭ لاۋرەاتى