اي مەن كۇننىڭ امانىندا الماتىداعى نازارباەۆ زياتكەرلىك مەكتەبىنەن شۋ شىقتى. شۋعا سەبەپ بولعانى – مەكتەپكە تۇسۋگە ۇمىتكەرلەرگە گرانت بولۋدەگى ادىلەتسىزدىك. وعان جانى توزبەگەن 50 شاقتى اتا-انا مەكتەپكە جينالىپ, مەملەكەتتىك ءتىلدىڭ مۇددەسىن جانىن سالىپ قورعاپ جۇرگەن ءماجىلىس دەپۋتاتى قازىبەك يساعا بەينە-ارىز جىبەردى. ولار مەكتەپكە قۇجات تاپسىرعان قازاق بالالارى ورىس سىنىبىنا تاپسىرۋشىلاردان ەكى ەسەگە كوپ بولعاندىقتان تالاپكەرلەردى قازاق-ورىس دەپ ءبولۋدى, ەكەۋىنە بىردەي 100 بالادان قابىلداۋدى «بۇل بارىپ-تۇرعان الالاۋ!», «مەملەكەتتىك ءتىلدى كەمسىتۋ!» دەيدى.
الماتىداعى حيميا-بيولوگيا باعىتىندا ءبىلىم بەرەتىن نازارباەۆ زياتكەرلىك مەكتەبىنە 2022-2023 وقۋ جىلىنا 2178 وقۋشى تەستى تاپسىرعان. سونىڭ ىشىندە 1483-ءى – قازاق تىلىندە (68 پايىز), 695-ءى – ورىس تىلىندە (32 پايىز) تاپسىرعاندار. مىسالى, شامالعانداعى مەكتەپكە قۇجات تاپسىرعان 1500 بالانىڭ اراسىنان 1174 بالل العان وقۋشى بار. ول 111-ءشى ورىندا تۇر. ال ورىس توبىنداعى 7-ءشى ورىندا تۇرعان بالانىڭ جيناعان بالى ونىكىنەن 48 باللعا تومەن. سوندا دا از بالل جيناعان بالا وقۋعا ءتۇسىپ تۇر. بۇل – مەملەكەتتىك ءتىلدى قورلاۋ, الالاۋ دەپ ءتۇسىنۋ كەرەك! ءبىلىمدى, ساۋاتتى, ۇزدىك, وزات بولعانى ءۇشىن وقۋعا تۇسە الماي پۇشايمان بولعان بالانىڭ جان جاراسى كىم جازادى؟
دەپۋتات ق. يسا مۇنداي سوراقىلىقتىڭ الماتىدا عانا ەمەس, وسكەمەندە دە بولعانىن ايتادى. «مۇنداي قياناتتىڭ كورسەتكىشى وسكەمەندە 200 بالل ايىرماشىلىقتى كورسەتىپ تۇر. بۇل نە ماسقارا! اتا-انالار ايتقانداي, وقۋشىلاردى تەڭگەرمەشىلىكپەن ەكىگە ءبولىپ تاستاماي, گرانت بارىنە بىردەي تالاپپەن بولۋى كەرەك. اۋزىنا قۇم تولتىرىپ العانداي نازارباەۆ مەكتەبى باسشىلىعىنان ءالى تىرس ەتكەن ءۇن جوق! نازارباەۆ زياتكەرلىك مەكتەبىنىڭ كۇلاش ءشامشيددينوۆا باستاعان باسشىلارى وسى مەكتەپتەردىڭ قاي مەملەكەتتە ورنالاسقىندىعىن جانە تاۋەلسىزدىك العانىمىزعا 30 جىلدان اسىپ كەتكەنىن بىلە مە ەكەن؟!. مۇنداي جىمىسقى ساياساتتىڭ ماقساتى – كەلەر جىلى قورلىققا شىداماعان ەل بالالارىن ورىس سىنىبىنا بەرە باستايدى» دەيدى ول.
سايىپ كەلگەندە, ءۇش ءتىلدى بىلەتىن قازاق توبىنداعى بالالاردىڭ ارتىقشىلىعى بار. ياعني, كەرىسىنشە, قازاق تىلىندە سىناق تاپسىراتىندارعا باسىمدىق بەرۋ كەرەك! بىلىمگە قۇمار ءار بالا جاقسى مەكتەپتە وقۋعا, ءبىلىم الۋعا قۇقىلى.
