ەلوردانىڭ تۋعان كۇنىنە وراي ۇيىمداستىرىلعان مەرەكەلىك ءىس-شارالار لەگىن كەشە «مۋزارت» توبى قورىتىندىلادى. حالىقتىڭ سۇيىكتىسىنە اينالعان اتالمىش ۇجىمنىڭ 15 جىلدىق مەرەيتويى «قازاقستان» ورتالىق كونتسەرت زالىندا ءوتتى. وعان استانا قالاسىنىڭ مادەنيەت باسقارماسى تىكەلەي قولداۋ كورسەتتى. «كورگەن دە ارماندا, كورمەگەن دە ارماندا» دەگەن تەڭەۋ ءدال وسىنداي كەشتەرگە ارنالىپ ايتىلسا كەرەك.
كونتسەرت «مۋزارت» مۇشەلەرىنىڭ اسەرلى ەستەلىكتەرىمەن باستالدى. «ءدال بۇگىن شىندىقتى ايتۋدىڭ رەتى كەلىپ تۇر. توپ قۇراردا مەيرامبەك پەن ماقسات ءوزارا اقىلداسىپ, العاشىندا سايات مەدەۋوۆتى الماقشى بولادى. كەيىن مەنى كورىپ قالىپ, تالانتتى ءارى قازاقي جىگىت ەكەن دەپ ۇناتىپتى. وسىلايشا ۇشەۋمىز تريو رەتىندە ساحناعا شىقتىق» دەگەن ساكەن مايعازيەۆ جينالعان جۇرتشىلىقتى ادەمى ازىلدەرىمەن قاعىتىپ, دۋ كۇلدىرىپ قويدى. ءۇش جىگىتتى «مۋزارت» ءانسامبلى مەن استانا قالاسى اكىمدىگى جانىنداعى ەسترادالىق-سيمفونيالىق وركەستر سۇيەمەلدەدى. ءتۇرلى اسپاپتىڭ قۇلاعىندا وينايتىن ونەرپاز جاستار كونتسەرتتى ودان ءارى جانداندىرىپ, كورەرمەننىڭ قۇلاق قۇرىشىن قاندىردى.
رەتى كەلگەندە ايتا كەتەيىك, قازىرگى تاڭدا قازاقستاننىڭ تۇكپىر-تۇكپىرىندە مۋزارت ەسىمدى سابيلەر بار ەكەن. جاقىندا عانا اتىراۋ وڭىرىندە تانىمال توپپەن اتتاس تاعى ءبىر بوبەك دۇنيە ەسىگىن اشىپتى. مۇنداي ۇردىسكە ريزاشىلىعىن بىلدىرگەن مۋزىكالىق ۇجىم ءاۋ باستاعى يدەيالارى تۋرالى ءتۇسىندىرۋدى ۇمىتقان جوق.
– تريوعا قانداي ات قويامىز دەپ كوپ ويلاندىق. توپ تۇگىلى, ادامنىڭ اتىن قويۋ قيىن عوي كەيدە. باستاپقىدا جارتى جىلداي اتاۋسىز شىعىپ جۇردىك. كەيىننەن ونەردەگى اعامىز ءارى دوسىمىز, بەلگىلى ساتيريك ساعادىلدا ءۇسىپالى وسى اتاۋدى ۇسىندى. «مۋزارت» ءسوزى ەكى ۇعىمنان تۇرادى. «ۋز» – تۇركى ءسوزى, قازاقشالاعاندا سال-سەرى, ءانشى, ناعىز ەر دەگەن ماعىنانى بىلدىرەدى. «ارت» ءسوزى تاۋدىڭ ۇشار بيىگى, قۇزار شىڭى دەگەنگە سايادى, – دەدى توپ مۇشەلەرى.
كەش بارىسىندا تۇساۋى كەسىلگەن جاڭا اندەردى قالىڭ قاۋىم وتە جاقسى قابىلداپ, قوشەمەتتەرىن ايامادى. ال «ەسىڭە ال», «سەن كەلەرسىڭ ءبىر كۇنى», «جايلاۋكول كەشتەرى», «ۇشقوڭىر» سەكىلدى اندەرگە بۇقارا ەرىكسىز قوسىلىپ, بىرگە ورىندادى. «بۇلاردى ەسكى اندەر ەمەس, ەستى اندەر دەسە دۇرىس شىعار» دەپ «مۋزارت» جىگىتتەرى ايتقانداي, ءانى مەن ءماتىنى ۇيلەسكەن ساپالى تۋىندىلار ەشقاشان ۇمىتىلماي, ءار كەز جوعارى باعالاناتىنىنا تاعى ءبىر مارتە كوز جەتكىزدىك. ايتپاقشى, «ساعىندىم الماتىمدى» ءانى شىرقالعاندا, زالدىڭ ءىشى تۇگەل تەڭسەلىپ, ۇيالى تەلەفونداردىڭ جىپىرلاعان شامىنان جاپ-جارىق كەيىپكە ەندى. ءاندى تىڭداعان كىسىنىڭ جۇرەگى قاتتىراق دۇرسىلدەمەۋى, كەۋدەسى شىمىرلاماۋى مۇمكىن ەمەس ەدى. ءان اياقتالعان سوڭ ساكەن:
– استانا اۋىسقان شاقتا وسى ءاندى كونگرەسس-حولدا ايتقانبىز. ول ۋاقىت تۇرمىستىڭ قىسىلتاياڭ كەزەڭى بولدى. تىرلىك ىزدەگەن حالىقتىڭ الماتىدان استاناعا كوشىپ كەلىپ, ەرلى-زايىپتىلاردىڭ ءبىرى – الماتىدا, ءبىرى استانادا جۇرگەن تۇسى عوي. سىزدەرگە وتىرىك, بىزگە شىن, سوندا ءاندى ەستىپ وتىرىپ زالداعىلاردىڭ 80 پايىزى ەگىلىپ كوزدەرىنە جاس العان, – دەدى.
ءار ءان تامامدالعاندا قىزىلدى-جاسىلدى گۇل شوعىن قۇشاعىنا قىسىپ, ساحناعا ۇمتىلعان كىسىلەر قاتارى ەش سيرەمەدى. ءبارى دە ساكەن مايعازيەۆ, مەيرامبەك بەسپاەۆ, كەنجەبەك جانابىلوۆكە اپپاق العىستارىن جاۋدىرىپ, مەرەيتويلارىمەن قۇتتىقتاۋعا اسىقتى. سولاردىڭ ءبىرى استانالىق اقساقال ۇجىمعا «ونەردەگى ومىرلەرىڭ ءبىر عاسىرعا سوزىلسىن. ونەرلەرىڭ ءمىنسىز, ومىرلەرىڭ مۇڭسىز بولسىن!» دەپ باتاسىن بەردى. بۇل تىلەككە ءبىز دە قوسىلىپ, بەت سيپادىق.
بوتاگوز ماراتقىزى
