نۇر-سۇلتان قالاسى اكىمدىگىنىڭ №3 كوپبەيىندى قالالىق بالالار اۋرۋحاناسى ەمدەلۋشى بۇلدىرشىندەرگە ارناپ مەرەكەلىك ءىس-شارا ۇيىمداستىردى.
– «قالاۋىن تاپسا, قار جانادى» دەمەكشى, ءبىز, دارىگەرلەر, مەرەيلى مەرەكەدە قولدان كەلگەنشە بۇلدىرشىندەرگە مەرەكەلىك كوڭىل كۇي مەن جىلۋلىق سەزىمىن ۇيالاتۋعا تىرىستىق. بۇل ءىس-شارامىز تەك مەرەكە قارساڭىندا عانا ەمەس, بۇگىنگە دەيىن ءتۇرلى ۋاقىتتا ۇيىمداستىرىلىپ كەلەدى, – دەدى اۋرۋحانا ديرەكتورىنىڭ مەديتسينالىق ءبولىم جونىندەگى ورىنباسارى روزا وتەگەنوۆا.
بالالاردى مەرەكەمەن قۇتتىقتاپ, جىلى لەبىزىن بىلدىرگەننەن كەيىن ءىس-شاراعا قاتىسۋشى بۇلدىرشىندەر ولەڭ وقىپ, ولاردىڭ بەينەنۇسقاسى اۋرۋحانانىڭ الەۋمەتتىك جەلىلەرىندە جاريالاندى. ءتۇرلى تاقىرىپتا تاقپاقتاردى جاتقا ايتقان كىشكەنتايلارعا كورەرمەن قاۋىمنىڭ سۇيىسپەنشىلىگى زور بولدى.
سونداي-اق اتالمىش ەمدەۋ مەكەمەسىندە «دەنساۋلىق – بالالار كوزىمەن» تاقىرىبىندا سۋرەت سالۋ كورمەسى ۇيىمداستىرىلدى. سول ارقىلى ەمدەلۋشى بالالار «دەنساۋلىقتى قالاي تۇسىنەسىڭ؟», «دارىگەر دەگەن كىم؟», «باقىتتى بالالىق شاق», «مەرەكەنىڭ ەرەكشەلىگى قانداي؟» دەگەن سۇراققا جاۋابىن قاعاز بەتىندەگى سۋرەت ارقىلى جەتكىزۋگە تىرىستى. «دەنساۋلىق – بالالار كوزىمەن» تاقتايشاسىنا بۇلدىرشىندەر سالعان سۋرەتتەر ءىلىنىپ, شارلارمەن بەزەندىرىلدى.
شارا بارىسىندا تەك بۇلدىرشىندەرگە عانا ەمەس, ولاردىڭ انالارىنا دا كوڭىل ءبولدى. جاس انالار ءبىر-بىرىمەن جانە دارىگەرلەرمەن سۇراق-جاۋاپ ارقىلى پايدالى اقپارات الدى. مەرەكە كۇنى اۋرۋحانا ۇجىمى بالالاردى بەينەروليك ارقىلى قۇتتىقتادى. وندا قولدارىنا شار ۇستاعان قىزمەتكەرلەر بي ارقىلى جۇرەكتىڭ بەينەسىن جاساپ, ەمدەلۋشىلەرىنە دەگەن قۇرمەتى مەن سەزىمىن ءبىلدىردى.
اقتولقىن امانجول,
ل.گۋميلەۆ اتىنداعى ەۇۋ ستۋدەنتى
