كارانتيندىك شەكتەۋلەردەن كەيىن بيىل بالالاردىڭ جازعى دەمالىسىن ۇيىمداستىرۋ ءىسى قايتا جاندانىپ جاتىر. ءبىلىم جانە عىلىم ءمينيسترىنىڭ ورىنباسارى شولپان كارينوۆانىڭ ايتۋىنشا, جازعى ۋاقىتتا 3,3 ملن وقۋشىنى قامتۋ جوسپارلانعان. ال 2,3 ملن وقۋشى ساۋىقتىرۋ لاگەرىندە دەمالاتىن بولادى. جالپى, ەل بويىنشا جازعى ساۋىقتىرۋ ناۋقانىن قارجىلاندىرۋ ءۇشىن 4,53 ملرد تەڭگە قاراستىرىلعان. سونىمەن قاتار رەسپۋبليكا بويىنشا 11 مىڭنان اسا مەكتەپ جانىنداعى, قالا ماڭىنداعى, شاتىرلى, سپورتتىق جانە كيىز ءۇي لاگەرى جۇمىس ىستەيدى.
رەسپۋبليكا بويىنشا جازعى مەكتەپتەر جۇمىسى 17 ماۋسىمعا دەيىن جالعاسادى. ساباقتار ماتەماتيكا, مازاق جانە اعىلشىن تىلدەرى, فيزيكا, حيميا جانە ت.ب. پاندەر بويىنشا ۇيىمداستىرىلۋدا. جازعى مەكتەپتىڭ ەرەكشەلىگى – مۋزەي مەن تاريحي نىساندارعا بارۋ, تازا اۋادا وتەتىن ساباقتار دەپ ايتار ەدىك. سونداي-اق ءۇي تاپسىرماسى بەرىلمەيدى. جوعارى وقۋ ورىندارى جانىنان اشىلعان جازعى مەكتەپتەر دە بار. وندا وقۋشىلار ءتىل, IT-تەحنولوگيا مەن روبوتوتەحنيكا, بيوتەحنولوگيا, كاسىپكەرلىك نەگىزدەرىن وقيدى.
نۇر-سۇلتان قالاسى بويىنشا, مەكتەپ جانىنداعى لاگەرلەردەن بولەك, 2 ءپروفيلدى, 2 قالا سىرتىنداعى (اقمولا وبلىسىنداعى اقكول اۋدانىندا ورنالاسقان «ارمان» جانە «بوروۆيچوك») جانە 2 شاتىرلى («باتىر» جانە «تۇلپار») لاگەر جۇمىس ىستەيدى. بۇل 176025 وقۋشىنى قامتىپ وتىر. ەلوردالىق ءبىلىم باسقارماسىنىڭ مالىمەتىنشە, 2 قالا سىرتىنداعى (1440 بالا), 2 شاتىرلى (960 بالا), 2 بەيىندى (700 بالا), سونداي-اق وقۋشىلار سارايى جانىنداعى جازعى لاگەر (ولار ءۇش ماۋسىمعا ەسەپتەلگەن) جۇمىس ىستەيدى.
جاز ايلارىندا بالالاردىڭ بوس ۋاقىتىن ۇيىمداستىرۋ ءۇشىن جەكە ءبىلىم بەرۋ جانە مادەنيەت مەكەمەلەرى ءوز ۇسىنىستارىن ازىرلەگەن. اتاپ ايتقاندا, استانالىق Stars Studio ستۋدياسىندا وقۋشىلار ءۇشىن ءتورت باعىت بويىنشا توپتىق ساباقتار ۇيىمداستىرىلادى. ولار: اكتەرلىك شەبەرلىك, ۆوكال, بي جانە بەينەلەۋ ونەرى.
ءال-فارابي اتىنداعى وقۋشىلار سارايىندا بالالارعا ارنالعان 3 ورتالىق جۇمىس ىستەيدى. اتاپ ايتقاندا, «Sana» جانە «Tanym» كرەاتيۆتى تەحنولوگيالار ورتالىقتارى. مۇندا 1-11-سىنىپ وقۋشىلارى روبوت, ويىن مەن قوسىمشالار جاساۋدى تەگىن ۇيرەنەدى. ال «نۇرسايا» تۇرعىن ءۇي كەشەنىندە ورنالاسقان «ءبىلىم-پارك» ونەر-ءبىلىم ورتالىعىندا 15-كە جۋىق ۇيىرمە بار. ولاردىڭ ىشىندە حورەوگرافيا مەن IT ۇيىرمەسىنە سۇرانىس جوعارى. ودان باسقا وقۋشىلار روبوتوتەحنيكا, كەمە جاساۋ, اۆيامودەلدەۋ, ۆيدەوگرافيكا دومبىرا, بوكس, شاحمات سەكتسيالارىنا تەگىن قاتىسا الادى.
قالا سىرتىنداعى دەمالىس
نۇر-سۇلتاننان 260 شاقىرىم جەردە بۋراباي مەن ششۋچينسك كۋرورتتارى ورنالاسقان. مۇندا دا بالالارعا ارنالعان ارنايى جازعى دەمالىس باعدارلاماسى بار. بۋراباي كولىنىڭ سولتۇستىك جاعالاۋىنداعى Edelweiss Borovoe لاگەرىندەگى 10 كۇندىك دەمالىس ءۇشىن 75 مىڭ تەڭگە تولەۋ كەرەك. «جۇلدىزدى كونتينەنت» بالالار ساۋىقتىرۋ-ويىن-ساۋىق ورتالىعىنا 10 كۇنگە جولداما 80-نەن 95 مىڭ تەڭگە ارالىعىندا بولادى. بىراق نۇر-سۇلتاننان لاگەرگە دەيىنگى جول شىعىنى بۇل باعاعا كىرمەيدى.
شىلدە ايىنان باستاپ ەلوردادان 30 مينۋتتىق جەردە ورنالاسقان قىزىلجار ورمان شارۋاشىلىعى اۋماعىندا «سارجايلاۋ» ەتنولاگەرى اشىلادى. مۇندا بالالارعا ۇلتتىق ويىندار مەن سالت-داستۇرلەرى ۇيرەتىلەدى. سونداي-اق كيىز ءۇي قۇرىلىپ, ۇلتتىق تاعامداردىڭ جاسالۋ ءادىسى كورسەتىلەدى. ەتنولاگەر 12-16 جاستاعى بالالارعا ارنالعان. وتىنىشتەر 15 ماۋسىمنان باستاپ قابىلدانادى.
ەلوردالىق وقۋشىلارعا ارنالعان اقىلى شەتەلدىك لاگەرلەر دە بار. ماسەلەن, تۇركياداعى كەمەر قالاسىنىڭ بەلديبي كۋرورتتىق قالاشىعىنداعى ءبىلىم بەرۋ لاگەرىندە 7-11 سىنىپ ارالىعىنداعى وقۋشىلار قابىلدانادى. ءبىر وقۋشىنىڭ 10 كۇندىك دەمالىسى 2750 ەۋرونى قۇرايدى. بۇل باعاعا ۇشۋ بيلەتى (نۇر-سۇلتاننان), جاتىن ورىن, تاماقتانۋ, وقۋ جانە مەديتسينالىق ساقتاندىرۋ كىرەدى. وقىتۋدىڭ ءارتۇرلى فورماتتارى بار. مۇندا توپتىق ەكسكۋرسيالار مەن شەتەلدىك جوعارى وقۋ ورىندارىنا تۇسۋگە دايىندىق ۇيرەتىلەدى.
بالالار تومەندەگى ساناتتار بويىنشا جازعى لاگەرگە تەگىن جولداما الادى:
- اتاۋلى الەۋمەتتىك كومەك الاتىن وتباسىلار;
- ورتاشا تابىسى ەڭ تومەنگى كۇنكورىس دەڭگەيىنەن تومەن وتباسىلار;
- جەتىم جانە اتا-اناسىنىڭ قامقورلىعىنسىز قالعان بالالار;
- وتباسىنداعى بالالار شۇعىل كومەكتى قاجەت ەتەتىن وتباسىلار.
تەگىن قىزمەت الۋ ءۇشىن egov.kz نەمەسە ءبىلىم باسقارماسىنا جازباشا ءوتىنىش بەرۋ كەرەك.
ايزادا جايىققىزى
